ވިލިނގިލި އެއާޕޯޓު ތަރައްގީކުރަން ހުށަހެޅީ ބޭރު ކުންފުންޏާއި ޖަނާ ގުޅިގެން ހަދާފައިވާ ޖޭވީއަކުން

ގއ. ވިލިނގިލި މަތިން ނަގާފައިވާ މަންޒަރެއް: ކައިރީގައި އެއާޕޯޓެއް އޮއްވައި ވިލިނގިލީގައި އަޅަނީ އިންޓަނޭޝަނަލް އެއާޕޯޓެއް -- ފޮޓޯ: ގއ. ވިލިނގިލި ފޭސްބުކް ޕޭޖު

ގއ. ވިލިނގިލި މަތިން ނަގާފައިވާ މަންޒަރެއް: ކައިރީގައި އެއާޕޯޓެއް އޮއްވައި ވިލިނގިލީގައި އަޅަނީ އިންޓަނޭޝަނަލް އެއާޕޯޓެއް -- ފޮޓޯ: ގއ. ވިލިނގިލި ފޭސްބުކް ޕޭޖު

ގއ. ވިލިނގިލީގައި އިންޓަނޭޝަނަލް އެއާޕޯޓެއް ތަރައްގީ ކުރާށާއި އިންޓަގްރޭޓަޑް ޓޫރިޒަމް ޒޯނެއް ތަރައްގީކުރަން ހަވާލުކުރީ އެ މަސައްކަތް ކުރަން ސޮއިކުރި އެންވީ ބެސިކްސް ކުންފުންޏާއި ވިޔަފާރިވެރިޔާ މުހައްމަދު އަލީ ޖަނާހު ހިއްސާވާ ޖޮއިންޓް ވެންޗާ (ޖޭވީ) އަކުން ކަން "އަދަދު" އަށް އެނގިއްޖެ އެވެ.

ވިލިނގިލީ އެއާޕޯޓު މަޝްރޫއާ ގުޅޭގޮތުން މި ނޫހަށް ލިބިފައިވާ ލިޔުންތަކުން އެނގޭ ގޮތުގައި މިއީ ކުރީ ސަރުކާރުން ގެންގުޅުނު އަދި މި ސަރުކާރުން އުވާލާފައިވާ އަންސޮލިސިޓަޑް ޕްރޮޕޯސަލްސް ހުށަހެޅުމުގެ ގަވާއިދުގެ ދަށުން ހުސްވި އަހަރުގެ ތެރޭގައި ރައީސް އޮފީހަށް އައި ހުށަހެޅުމެކެވެ. އެ ހުށަހެޅުން ލިބުނު ތާރީހަކީ ޖުލައި 13, 2023, އެވެ.

އެންވީ ބެސިކްސް އާއި ޖަނާ ގުޅިގެން ސަރުކާރަށް ހުށަހެޅީ:

  • ޑޮމެސްޓިކް ފްލައިޓުތަކާއި އިންޓަނޭޝަނަލް ޕްރައިވެޓް ފްލައިޓުތަކަށް ހިދުމަތްދޭ ގޮތަށް 2.2 ކިލޯމީޓަރުގެ ރަންވޭއަކާއި ހުރިހާ ހިދުމަތެއް ލިބޭ ގޮތަށް ވިލިނގިލީގައި އެއާޕޯޓެއް ތަރައްގީކުރުން
  • އެއާޕޯޓު ސަރަހައްދުގައި ޓްރާންސިޓު ހޮޓަލަކާއި ކޮމާޝަލް ފެސިލިޓީތައް ތަރައްގީކުރުން
  • ބަދަލުގައި އިންޓަގްރޭޓަޑް ޓޫރިޒަމް ޕްރޮޖެކްޓެއް ހިންގަން ވިލިނގިލި ކައިރި ސަރަހައްދަކުން ދެ ފަޅު

މީގެ ތެރެއިން އެއާޕޯޓު ތަރައްގީކުރަން ހަރަދުވާނެ ކަމަށް ލަފާކުރަނީ 65 މިލިއަން ޑޮލަރެވެ. އަދި އިންޓަގްރޭޓަޑް ޓޫރިޒަމް ޒޯނަށް ހަރަދުވާނެ ކަމަށް ލަފާކުރަނީ 120 މިލިއަން ޑޮލަރެވެ. މި ހުރިހާ ފައިސާއެއް އިންވެސްޓު ކުރާނީ އިންވެސްޓަރެވެ. ސަރުކާރުން ފޯރުކޮށްދޭން ޖެހެނީ އެއާޕޯޓާއި ރިސޯޓު ހޮޓަލަށް 329 ހެކްޓަރުގެ ބިން އަދި އިންޓަގްރޭޓަޑް ޓޫރިޒަމް ޑިވެލޮޕްމަންޓް ޒޯނަށް 425 ހެކްޓަރުގެ ބިމެވެ.

މި ފަޅުތައް ހަވާލުކުރަން އެދިފައިވަނީ ކްރޮސް ސަބްސިޑީ މޮޑެލްގެ ދަށުންނެވެ. އަދި ދެ ފަޅާއި އެއާޕޯޓުގެ ބިމުގެ ސަރަހައްދު އެއްކޮށްލީމައިވާ 754 ހެކްޓަރުގެ ބިމުގެ ތެރެއިން ޓޫރިޒަމް ސަރަހައްދަށްވާ ބިމަށް ލީސް އެކުއިޒިޝަން ކޮސްޓަށް ދައްކަން ޖެހޭނެ ކަމަށް ލަފާކުރީ 7،375،000 ޑޮލަރެވެ.

މި ހުށަހެޅުމާ ގުޅޭގޮތުން ކުރީ ސަރުކާރުގެ އިކޮނޮމިކް ކައުންސިލުން މިދިޔަ އަހަރުގެ ޖުލައި 24 ގައި ބައްދަލުވުމެއް ބޭއްވި އެވެ. މި ބަައްދަލުވުމުގައި ކުރެވުނު މަޝްވަރާތަކާ ގުޅޭގޮތުން ލިބިފައި ހުރި މައުލޫމާތުން އެނގޭ ގޮތުގައި ވިލިނގިލީގައި އެއާޕޯޓެއް އެޅުން، އެ ރަށާ ކައިރީގައި އޮންނަ ކޫއްޑޫއާ ބްރިޖަކުން ގުޅާލުމަށް ވުރެ ދެކޮޅު ޖެހެ އެވެ.

ފާހަގަކޮށްލެވޭ ގޮތުގައި މި މަޝްރޫއާ ގުޅޭގޮތުން އިކޮނޮމިކް ކައުންސިލުގެ ހުރި މައިގަނޑު ކަންބޮޑުވުމަކީ ތިނަދޫގައި އެއާޕޯޓެއް ތަރައްގީ ނުކޮށް ވިލިނގިލީގައި އެއާޕޯޓެއް ތަރައްގީ ކުރަން ސިޔާސީ ގޮތުން ހުރި ގޮންޖެހުންތަކެވެ. އެހެންވެ އޭރުގެ ސަރުކާރުގެ ވިސްނުން ހުރީ ވަކިވަކިން މި ދެ ރަށުގައި އެއާޕޯޓެއް ތަރައްގީކުރުމުގެ މަޝްރޫއު އިއުލާނުކުރުމުގެ ބަދަލުގައި އެކުއެކީގައި ކުރާށެވެ.

މިހެން ނަމަވެސް ވިލިނގިއްޔަށް ވުރެ ތިނަދޫގައި އިންޓަނޭޝަނަލް އެއާޕޯޓެއް އެޅުން މާ ބޮޑަށް ދެކޮޅު ޖެހޭނެ ކަމަށާއި އެކަމަކު މި ދެ ތަނުގައި ވެސް އިންޓަނޭޝަނަލް އެއާޕޯޓެއް ތަރައްގީކުރުމުން މިހާރު ވެސް ދެކޮޅު ނުޖެހިގެން އުޅޭ އަދި ގެއްލުމުގައި ހިންގާ ގަން އިންޓަނޭޝަނަލް އެއާޕޯޓަށް ނުރަނގަޅު އަސަރު ކުރާނެ ކަމުގެ ކަންބޮޑުވުން އިކޮނޮމިކް ކައުންސިލުގައި ހުއްޓެވެ.

މިއީ ކުރު ރާސްތާގައި ދިމާވާނެ ގޮންޖެހުމެއްގެ ގޮތުގައި ފާހަގަކުރަމުން، އިކޮނޮމިކް ކައުންސިލުން ނިންމީ ހުވަދޫ އަތޮޅުގައި ޓޫރިޒަމް ފުޅާކުރަން މެދުރާސްތާގައި އެއާޕޯޓެއް ބޭނުންވާނެ ކަމަށެވެެ. އެހެންކަމުން ވިލިނގިލީގައި ފަހުން އިންޓަނޭޝަނަލް އެއާޕޯޓަކަށް ތަރައްގީކުރާ ގޮތަށް މި ހުށަހެޅުމަށް ރުހުން ދޭން އެ ކައުންސިލުން އޮތީ ނިންމާފަ އެވެ.

ލިޔެކިޔުންތަކުގައި މިހެން އޮތް ނަމަވެސް މި ސަރުކާރުން ބުނަނީ ވިލިނގިލީގައި ހިންގާ އެއާޕޯޓާއި ޓޫރިޒަމް މަޝްރޫއަކީ 750 މިލިއަން ޑޮލަރުގެ ޕްރޮޖެކްޓެއް ކަމަށެވެ. ބެލެވޭ ގޮތުގައި އަގު ބޮޑުވީ ކުރީ ސަރުކާރަށް ހުށަހެޅި ދެ ފަޅުގެ ބަދަލުގައި ނުވަ ރަށެއް ދޭން ނިންމުމުންނެވެ. މިއީ ކޮން ރަށްތަކެއް ކަމެއް ނޫނީ މި މަޝްރޫއާ ގުޅޭ އިތުރު ތަފުސީލެއް ސަރުކާރުން ހާމައެއް ނުކުރެ އެވެ.

ސަރުކާރުން ބުނަނީ އެ މީހުންނާ އެކީ ސޮއިކުރީ އެއާޕޯޓެއް އަޅަން "ފެންވަރު ބެލުމުގެ ފަހުމުނާމާއެއްގައި" ކަމަށެވެ. އަދި ރަސްމީ އެއްބަސްވުމުގައި ސޮއިކުރާނީ މި މަސައްކަތް ނިމުމުން ކަމަށެވެ.

ކޮމެންޓް

ފަހުގެ ޚަބަރު

ދިރާގު ރޯޑް ރޭސް 5،500އަށްވުރެ ގިނަ ދުވުންތެރިންނާއެކު ބާއްވައިފި

ދިރާގު މޯލްޑިވްސް ރޯޑް ރޭހުގެ 17 ވަނަ އެޑިޝަން 5،500 އަށްވުރެ ގިނަ ދުވުންތެރިންނާއެކު ހުޅުމާލެ ސެންޓްރަލް ޕާކުގައި ވަނީ ބާއްވާފައެވެ. މި ދުވުމުގެ ލައިވް އަޕްޑޭޓްތަކާއި، ނަތީޖާ އަދި ދުވުންތެރިންގެ ރޭންކިންގ ބަލައިލުމުގެ ފުރުސަތު ދިރާގުން ވަނީ ޚާއްޞަ މޮބައިލް އެޕްލިކޭޝަނެއް މެދުވެރިކޮށް ފަހިކޮށްދީފައެވެ.

ޕީއެންސީގެ މެންބަރުންގެ އަދަދު ލައްކައަކަށްވުރެ ދަށަށް

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އެރިތާ 24 ގަޑިއިރު ނުވަނީސް، އަލުން އެ އަދަދު ލައްކައަކަށް ވުރެ ދަށަށް ގޮސްފިއެވެ. އިދިކޮޅު ފަރާތްތަކުން ތުހުމަތުކުރާ ގޮތުގައި މި އަދަދު ހަމަކުރުމަށްޓަކައި ވަޒީފާގެ ބިރުދެއްކުމާއި ރިޝްވަތުގެ ގޮތުގައި ފައިސާ ބޭނުންކޮށްފައިވެއެވެ. އީސީގެ ތަފާސްހިސާބުތަކުން ދައްކާގޮތުގައި އެ ޕާޓީގެ މެންބަރުންގެ އަދަދު މިހާރު ވަނީ 99,930 އަށް ތިރިވެފައެވެ.

ރަސްމާލޭގެ ޑީލުގައި ސޮއިނުކުރަން އެދި އަލައްބާރަށް ސިޓީއެއް

ރަސްމާލެ މަޝްރޫއުގެ މިހާރުގެ ޝަރުތުތަކާއި ގާނޫނުއަސާސީއާ ފުށުއެރުންތަކެއް ހުރި ކަމަށާއި، އެކަމުގައި އެކަށީގެންވާ ގޮތެއްގައި ރައްޔިތުންގެ ހިޔާލު ހޯދާފައި ނުވާތީ، ދެން އަންނަ ސަރުކާރަކުން ވެސް މި މަޝްރޫއުގެ އެއްބަސްވުން އަލުން މުރާޖައާކުރުމަށް ނުވަތަ އެއްކޮށް ބާތިލުކުރުމުގެ ފުރުސަތު އޮތް ކަމަށް އެ ސިޓީގައި ބުނެފައިވޭ.

"ރަސްމާލެ މައްސަލައިގައި މުއިއްޒު ވަނީ އަނގަވަތަށް ވެއްޓިފައި"

ރަސްމާލެ މަޝްރޫއަކީ ރާއްޖޭގެ ސިޔާދަތަށް އުނިކަންލިބޭ، ބޭރުގެ ފަރާތްތަކަށް ބިން ދިނުމަށް ހިންގާ ހީލަތްތެރި ރޭވުމެއް ކަމަށް ވިދާޅުވެ ކުރީގެ ރައީސް ޔާމީން ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ. މި މަޝްރޫއުގެ ސަބަބުން ރައީސް މުއިއްޒު ރައްޔިތުންގެ ކުރިމަތީގައި ބޭޒާރުވެފައިވާ ކަމަށާއި، މި ސަރުކާރަށް ދެވަނަ ދައުރެއް ރައްޔިތުން ނުދޭނެ ކަމަށް ޔާމީން ވިދާޅުވިއެވެ.

ރަސްމާލެ ދޫކޮށްލުމާ ދެކޮޅުވެރިކަމެއް ނެތްކަމުގެ އިޝާރާތެއް

ރަސްމާލެއިން ބައެއް ބޭރުގެ ކުންފުންޏަކަށް ދޫކޮށްލުމާ ދެކޮޅު ހަދަނީ މަދު ބަޔަކު ކަމަށާއި، ދިވެހިން އަބަދުވެސް އިސްކުރަނީ ގައުމީ ތަރައްގީކަން މުއިއްޒު ފާހަގަކުރެއްވި. މީގެކުރިންވެސް ރާއްޖެއަށް އައި ބޮޑެތި ބަދަލުތަކާ ބައެއް މީހުން ދެކޮޅު ހެދި ނަމަވެސް، ގިނަ ރައްޔިތުން ތާއީދުކުރީ ގައުމީ ކުރިއެރުމަށްކަން އެމަނިކުފާނު ބަޔާންކޮށްދެއްވި.

ހުލާސާކޮށް އިއްޔެ: ސިޔާސީ ޕާޓީތަކުގެ ދަފްތަރަށް އައި ބޮޑު ބަދަލު

ޕީއެންސީގެ މެންބަރުންގެ އަދަދު އެއްލައްކައަށް އެރުމާއެކު، ޖުމްހޫރީ ޕާޓީ އާއި އަދާލަތު ޕާޓީ ފަދަ ދުވަސްވީ ޕާޓީތަކުން ގިނަ އަދަދެއްގެ މެންބަރުންނާއި އިސް ބޭފުޅުން ވަނީ ވަކިވެފައެވެ. މީގެ އިތުރުން، ރަސްމީ ޖަލްސާތަކުގެ ޕްރޮޓޮކޯލަށް ބަދަލުތަކެއް ގެނެސްފައިވާއިރު، ރަސްމާލެ މަޝްރޫއާ ގުޅޭގޮތުން އިލްމުވެރިންނާއި ސިޔާސީ ފަރާތްތަކުގެ މެދުގައި ވަނީ ޚިޔާލުތަފާތުވުންތަކެއް އުފެދިފައެވެ.

ވަޒީފާގެ ބިރުދައްކައިގެން އެއްލައްކަ މެންބަރުން ހަމަކޮށްފި

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އަރާފައިވާއިރު، މިއީ ވަޒީފާގެ ބިރުދައްކައިގެންނާއި ރިޝްވަތު ދީގެން ހޯދި އަދަދެއް ކަމަށް ވަނީ ތުހުމަތުކުރެވިފައި. އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި މިދިޔަ އަހަރާ އަޅާބަލާއިރު އެ ޕާޓީގެ މެންބަރުންގެ އަދަދު ވަނީ 26،000 އަށްވުރެ އިތުރުވެފައި.

Newsletter

Get the latest news delivered straight to your inbox