ކްރިސްޓާ ޕައިކް މަރަން މިދިޔަ ހަފުތާގައި ކުރި މަސައްކަތް ނާކާމިޔާބުވި ފަހުން، ގަޔަށް ވިހަ އިންޖެކްޝަން ޖަހައިގެން ބުދަ ދުވަހުގެ އިރުއޮއްސުނު ވަގުތު ޓެކްސަަސްގައި މަރުގެ ހުކުމެއް ތަންފީޒުކޮށްފި އެވެ.
ސީބީއެސް ނިއުސްއިން ރިޕޯޓްކޮށްފައިވާ ގޮތުގައި، އުމުރުން 46 އަހަރުގެ ޖަމާލް ހޮވާޑްގެ ވަކީލުން ވަނީ މިދިޔަ ހަފުތާގައި ޕައިކްގެ ގަޔަށް އިންޖެކްޝަން ޖެހުމުގައި ދިމާވި މައްސަލަތަކަށް ރިއާޔަތްކޮށް، ހޮވާޑްގެ މަރުގެ އަދަބު ތަންފީޒުކުރުން ފަސްކޮށްދިނުމަށް ފަނޑިޔާރެއްގެ ކިބައިން އެދިފަ އެވެ.
ނަމަވެސް ކޯޓުތަކުން އެ އެދުމަށް އިންކާރުކުރުމާ ގުޅިގެން، ހަންޓްސްވިލްގައި ހުންނަ ސްޓޭޓް ޖަލުގައި އޭނާގެ ގަޔަށް ވަނީ "ޕެންޓޯބާބިޓަލް" ގެ ނުރައްކާތެރި ޑޯޒެއް ޖަހައި މަރުގެ ހުކުމް ތަންފީޒުކޮށްފަ އެވެ.
ހޮވާޑްގެ މައްޗަށް މަރުގެ ހުކުމް އިއްވީ 2000 ވަނަ އަހަރު ފިހާރައެއް ފޭރުމުގެ ތެރޭގައި އެތަނުގެ މުވައްޒަފަކު މަރާލި މައްސަލައިގަ އެވެ.
އޭނާގެ ވަކީލުން ބުނަމުންދިޔައީ، ޕައިކް މަރަން ބޭނުންކުރި "ޕެންޓޯބާބިޓަލް" ނަމަކަށް ކިޔާ ބޭސް ހޮވާޑްގެ ގަޔަށް ޖަހަން ޓެކްސަސްއިން ނިންމާފައިވާތީ، ޕައިކްއަށް ކުރިމަތިވި ފަދަ ނުރައްކާތަކެއް އޭނާއަށް ވެސް ކުރިމަތިވެދާނެ ކަމަށެވެ. މީގެ އިތުރުން، ޕައިކްގެ ވަކީލުން ވެސް ފާހަގަކޮށްފައިވާ ފަދައިން، ޓެކްސަސްގައި ހުރި އެ ބޭހުގެ ކޮލިޓީ ދަށްވެފައިވާ ކަމަށް ހޮވާޑްގެ ވަކީލުން ތުހުމަތުކުރި އެވެ.
ކޯޓުން ދެ ފަހަރެއްގެ މަތިން އެ އިލްތިމާސްތައް ބޭރުކޮށްލާފައިވާއިރު، އެމެރިކާގެ ސުޕްރީމް ކޯޓުން ވެސް ވަނީ ބުދަ ދުވަހުގެ ރޭ އެ މައްސަލަ ބަލައިނުގަތުމަށް ނިންމާފަ އެވެ.
ޓެކްސަސްގެ ފިހާރައެއްގައި މަސައްކަތް ކުރަމުންދިޔަ އުމުރުން 42 އަހަރުގެ ވިކީ ސްވާޓައުޓްގެ ގަޔަށް ބަޑިޖަހައި މަރާލިއިރު ހޮވާޑްގެ އުމުރަކީ 20 އަހަރެވެ. އެ ހާދިސާގައި އޭނާ ވަނީ ފިހާރައިގެ ވަތްގަނޑުން 114 ޑޮލަރާއި ސިނގިރޭޓް ކާޓަންއެއް ފޭރިގެންފަ އެވެ.
މަރުގެ ހުކުމް ތަންފީޒުކުރުމުގެ ކުރިން ފަހު ބަސް ބުނުމުގެ ފުރުސަތު ދިނުމުން ހޮވާޑް ވަނީ ވިކީ ސްވާޓައުޓްގެ އާއިލާގެ ކިބައިން މައާފަށް އެދިފަ އެވެ.
