މިހާރުގެ ހާލަތަށް ބެލުމުން ފެންނަނީ ރާއްޖޭގައި އިސްލާމީ ޝަރީއަތުގެ މަގްސަދުތައް ހާސިލް ކުރަން އަމިއްލަ ނަފުސުތަކުން ޖިހާދު ކުރަންޖެހިފައިވާ މަންޒަރު ކަމަށް ކަމަށް ރައީސް މުހައްމަދު މުއިއްޒު މިރޭ ވިދާޅުވެއްޖެ އެވެ.
ރާއްޖެ އިސްލާމްވުމާ ގުޅިގެން ހުޅުމާލެ ސެންޓްރަލް ޕާކުގައި ބޭއްވި ޖަލްސާގައި މުއިއްޒު ވިދާޅުވީ އިސްލާމީ ޝަރީއަތުގެ މަގްސަދުތައް ހާސިލުކުރަން އަމިއްލަ ނަފްސުތަކުން ޖިހާދު ކުރަންޖެހެނީ މުޅި ގައުމުގެ ސަލާމަތަށްޓަކައި ކަމަށާއި އެކަމަށް ތަސައްވަރެއް އެކުލަވާލައި ތަންފީޒުކުރަންވީ އަމަލީ ފިޔަވަޅުތައް އެކުލަވާލަން ޖެހޭ ކަމަށެވެ.
"މުސްތަގުބަލުގެ އުދަރެހަށް ބެލީމާ ފެންނަނީ އަޅުގަނޑުމެން ހާސިލުކުރަންޖެހޭ މަގްސަދުތައް. އިސްލާމީ ޝަރީއަތުގެ މަގްސަދުތައް. އަޅުގަނޑުމެންނަށް ސިފަވަނީ އެކަމަށްޓަކައި އަޅުގަނޑުމެންގެ އަމިއްލަ ނަފްސުތަކުން ކުރަންހުރި ޖިހާދުތައް. އަޅުގަނޑުމެން ވާންހުރި މަތިވެރި ގުރުބާނީތައް. މުޅި ގައުމުގެ ސަލާމަތަށްޓަކައި ހުރިހާ ފަރާތްތަކުން ގުޅިގެން އުފައްދަންވީ ތަސައްވަރުތައް،" މުއިއްޒު ވިދާޅުވި އެވެ.
"ތަންފީޒުކުރަންވީ އަމަލީ ފިޔަވަޅުތައް. ބަވަނަވެފައިވާ ދުނިޔޭގެ އޮއެވަރުގެ ތެރެއިން އަޅުގަނޑުމެންގެ ޅަ ހިތްތަކާއި ލޯތަކަށް ހުށަހެޅެމުންދާ ހުށަހެޅުންތަކުން އީމާންތެރިކަމަށް އިއްވާ ބިރުވެރި ރަނގަބީލުތަކަށް ސަހަރޯވެ، ދޭންޖެހޭ ހާއްސަ ސަމާލުކަން."
މުއިއްޒު ވިދާޅުވީ ރާއްޖެ އިސްލާމްވިތާ 900 އަހަރު ފާހަގަކުރާއިރު މާޒީއަށް ބެލުމުން ފެންނަނީ ގައުމަށް ލިބުނު ނަސީބު ކަމަށެވެ. ނަމަވެސް ހާލަތުގެ މަންޒަރަށް ބެލުމުން ފެންނަނީ އެކި ދިމަދިމާލުގައި ލަކުނުލައި ޒަހަމްވެފައިވާތައް ފެންނަ ކަމަށް އެމަނިކުފާނު ވިދާޅުވި އެވެ.
"މިއަދު އަޅުގަނޑުމެން ފާޅުކުރަނީ ސައްތައިން ސައްތަ އިސްލާމީ ގައުމެއް ގޮތުގައި 900 އަހަރު ހޭދަކުރި އިއްޒަތްތެރި ޒިކުރާގެ އުފާ. އެހެންކަމުން މާޒީގެ ލޯގަނޑަށް ބެލީމާ ފެންނަނީ އަޅުގަނޑުމެންނަށް ލިބުނު ނަސީބު. އެކަމަކު ހާލަތުގެ މަންޒަރަށް ބެލީމަ ފެންނަނީ ބައެއް ދިމަދިމާގައި ލަކުނުލައި ޒަހަމްތައް އުފެދިފައިވާތަން،" މުއިއްޒު ވިދާޅުވި އެވެ.
މި ގައުމު ސައްތައިންސައްތަ މުސްލިމު ގައުމެއްގެ ގޮތުގައި ދަމަހައްޓަންޖެހޭކަން ފާހަގަކުރައްވާ މުއިއްޒު ވިދާޅުވީ ދުނިޔެއާއި އާހިރަތުގެ ބާއްޖަވެރިކަން ކަށަވަރުކުރުމަށް ދިވެހި ކޮންމެ ރައްޔިތަކު ވެސް މަސައްކަތް ކުރަން ނަސޭހަތްތެރިވާ ކަމަށެވެ.
އިސްލާމީ ޝަރީއަތާ އެއްގޮތަށް ރާއްޖޭގައި މަރުގެ އަދަބު ދިނުމާ ގުޅޭ ގޮތުން ނިމިދިޔަ މަޖިލީހުގެ ދައުރަށް ބިލެއް ހުށަހަޅުއްވާނެ ކަމަށް މުއިއްޒު ވިދާޅުވި ނަމަވެސް، އެ ބިލު މަޖިލީހަށް ހުށަހެޅިފައެއް ނުވެ އެވެ.
ރާއްޖޭގައި މަރުގެ އަދަބު ތަންފީޒު ކުރާނެ ކަމަށް އަނެއްކާ ވެސް ރައީސް ވިދާޅުވެއްޖެ
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މުއިއްޒު ވިދާޅުވީ މަރުގެ އަދަބު ތަންފީޒުކުރުމަށް ހާއްސަ ގާނޫނެއް ގެނައުމަށް ބަންޑާރަނައިބުގެ އޮފީހުން ބިލެއް ތައްޔާރުކުރަމުންދާ ކަމަށާއި އެ ބިލު މަޖިލީހުގެ މިހާރު ހިނގަމުންދާ ދައުރުގައި ހުށަހަޅާނެ ކަމަށް.
އެޓާނީ ޖެނެރަލް އަހްމަދު އުޝާމް މިދިޔަ މެއި މަހު ވިދާޅުވީ މި އަހަރުގެ ދެވަނަ ދައުރުގައި މަރުގެ އަދަބު ދިނުމާ ގުޅޭ ބިލު މަޖިލީހަށް ހުށަހެޅޭނެ ކަމަށާއި އެ ބިލުގެ މަސައްކަތުގެ ބޮޑުބައެއް މިހާރު ނިމިފައިވާ ކަމަށެވެ. އޭނާ ވިދާޅުވީ ބިލު މަޖިލީހަށް ހުށަހެޅުމުގެ ކުރިން ދީނީ ގޮތުންނާއި އަދި އެހެނިހެން ގޮތްގޮތުން ބަލަންޖެހޭ ބައިވަރު ކަންކަން އެބަހުރި ކަމަށެވެ.
މަރުގެ ހުކުމް ތަންފީޒުނުކުރުމަކީ އޮޕްޝަނެއް ނޫންކަން ފާހަގަކުރައްވާ އުޝާމް ވިދާޅުވީ ކޯޓުތަކުން ކުރާ ކޮންމެ ހުކުމެއްވެސް ތަންފީޒުކުރަން ޖެހޭނެ ކަމަށް ގަބޫލުކުރައްވާ ކަމަށެވެ. ނަމަވެސް މިހާރު އޮތް ގަވާއިދުގެ ތެެރެއިން މަރުގެ ހުކުމް ތަންފީޒުކުރުމުގެ ބަދަލުގައި ގާނޫނެއްގެ ދަށުން އެކަން ކުރަން ޖެހޭ ކަމަށް އޭނާ ވިދާޅުވި އެވެ.
