އެމެރިކާގައި މަރުގެ އަދަބު ތަންފީޒުކުރަން އުޅުމުގެ ތެރޭގައި ދިން ލީތަލް އިންޖެކްޝަނުން ސަލާމަތްވި ކްރިސްޓާ ޕައިކް މިހާރު ހޭއަރައި ވާހަކަދައްކަމުންދާ ކަމަށް އޭނާގެ ވަކީލުން ބުނެފި އެވެ.
އުމުރުން 50 އަހަރުގެ ޕައިކްގެ ވަކީލުން އަންގާރަ ދުވަހު ނެރުނު ބަޔާނެއްގައި ބުނީ، އޭނާ އަދިވެސް އޮތީ ހޮސްޕިޓަލުގައި ފަރުވާދެމުންދާ ހާލަތުގައި ކަމަށާއި، އޭނާ ބާއްވާފައި އޮތީ ބިޑިއަޅުވާފައި ކަމަށެވެ.
ނަވާރަ ސަތޭކަ ނުވަދިހަ ފަސްވަނަ އަހަރު ކޮލީން ސްލެމާ ނަމަކަށް ކިޔާ މީހަކު މަރާލި މައްސަލައިގައި މަރުގެ އަދަބު އިއްވާފައިވާ ޕައިކްގެ ގަޔަށް، މިދިޔަ ބުދަ ދުވަހު ޓެނެސީ ސްޓޭޓްގައި ދެ ފަހަރެއްގެ މަތިން ލީތަލް އިންޖެކްޝަން ޖެހި ނަމަވެސް އޭނާ މަރެއް ނުވި އެވެ. އެއާއެކު އޭނާ ހޮސްޕިޓަލަށް ބަދަލުކުރެވުނު އިރު، ހަށިގަނޑަށް ޖެހި ކެމިކަލްތައް ބޭރުކުރުމަށް ޑޮކްޓަރުން ކުރި މަސައްކަތުގެ ތެރޭގައި އޭނާ ދުވަސްތަކެއް ވަންދެން އޮތީ ހޭނެތިފަ އެވެ.
ކަމާބެހޭ މާހިރުންނާއި އޭނާގެ ގާނޫނީ ޓީމުން ބުނާ ގޮތުގައި، މިފަދަ އިންޖެކްޝަނަކަށް ފަހު މީހަކު ސަލާމަތްވުމަކީ މީގެ ކުރިން ދުވަހަކުވެސް ހިނގާފައިވާ ކަމެއް ނޫނެވެ. ބެލެވޭ ގޮތުގައި ޕައިކް އަކީ ލީތަލް އިންޖެކްޝަން ޖެހުމަށްފަހު މަރުނުވެ ސަލާމަތްވި ހަމައެކަނި މީހާ އެވެ.
އޭނާގެ ވަކީލުން ބުނީ ޕައިކްގެ ހާލަތު ރަނގަޅުވަމުން އަންނަ ގޮތަކީ ބޭސްވެރިކަމުގެ ދާއިރާގައި މީގެ ކުރިން ފެނިފައިނުވާ ފަދަ ކަމެއް ކަމަށެވެ. އަދި އޭނާގެ ސިއްހީ ހާލަތު ކުރިއަށް އޮތްތަނުގައި ހުންނާނެ ގޮތެއް އަދި ސާފުނުވި ނަމަވެސް، ފުރިހަމަ ދުޅަހެޔޮކަމަކަށް އެނބުރި ދިއުމަށް ގިނަ ދުވަސްތަކެއް ނަގާނެ ކަމަށް ބެލެވޭ ކަމަށްވެސް ވަކީލުން ބުންޏެވެ.
ފޯޑަމް ލޯ ސްކޫލްގެ ކްރިމިނޮލޮޖީ ޕްރޮފެސަރު ޑެބޯރާ ޑެނޯ ވިދާޅުވީ، ޕައިކް ހޭއަރައި ވާހަކަދައްކަން ފެށުމުން އޭނާ "އިންތިހާއަށް ހައިރާންވެފައިވާ" ކަމަށެވެ.
ޑެނޯ ވިދާޅުވީ، މީގެ ކުރިންވެސް މަރުގެ އަދަބު ތަންފީޒުކުރަން އުޅުމުގެ ތެރޭގައި ހަތް މީހަކު ސަލާމަތްވެފައިވާ ކަމަށެވެ. ނަމަވެސް އެ ހުރިހާ ހާލަތެއްގައިވެސް މަރުގެ އަދަބު ތަންފީޒުކުރާ މީހުންނަށް ކުށްވެރިޔާގެ ލޭހޮޅިއަށް ވިހަ މާއްދާ ފޮނުވައި ނުލެވޭ ކަމަށް އޭނާ ފާހަގަކުރެއްވި އެވެ.
ޕައިކް އަކީ ހަށިގަނޑުގެ ތެރެއަށް ވިހަ މާއްދާ ފޮނުވާލުމަށްފަހު ވެސް ސަލާމަތްވި ހަމައެކަނި މީހާ ކަމަށް ޑެނޯ ވިދާޅުވި އެވެ.
ޕައިކް މަރަން އަލުން މަސައްކަތް ކުރާނެތޯ ކަމާބެހޭ އިދާރާތަކުން އަދި ހާމައެއް ނުކުރެ އެވެ. އަދި އޭނާގެ ގަޔަށް "ޕެންޓޯބާބިޓަލް" ކެމިކަލް ޖެހުމަށްފަހު އެކަން ނާކާމިޔާބުވާން މެދުވެރިވި ސަބަބެއް ވެސް ކަމާބެހޭ ފަރާތްތަކުން ހާމަކޮށްފައެއް ނުވެ އެވެ.
މި ހާދިސާއާ ގުޅިގެން ޓެނެސީގެ ގަވަރުނަރު ބިލް ލީ ވަނީ މިއަހަރުގެ ނިޔަލަށް އެ ސްޓޭޓްގައި މަރުގެ އަދަބު ތަންފީޒުކުރުން މެދުކަނޑާލާފަ އެވެ. އަދި އެ ސްޓޭޓްގެ ޖަލުތަކާ ބެހޭ އިސްވެރިޔާ މަގާމުން އިސްތިއުފާ ދެއްވާނެކަން މިދިޔަ ހަފުތާ ބަންދުގައި ވަނީ އިއުލާން ކުރައްވާފަ އެވެ.
ޕައިކް އުމުރުން 18 އަހަރުގައި އޭނާގެ އޭރުގެ ލޯބިވެރިޔާ ޓަޑަރީލް ޝިޕްއާ ގުޅިގެން، އުމުރުން 19 އަހަރުގެ ސްލެމާ އަށް އަނިޔާކޮށް މަރާލީ، ޒުވާނުން ތަމްރީނުކުރާ ކޭމްޕަކުން ދިމާވުމަށް ފަހުގަ އެވެ.
