މީހަކު މަރާލިކަން ސާބިތުވެ މަރުގެ އަދަބު އިއްވާފައިވާ ކްރިސްޓާ ޕައިކްގެ ގަޔަށް ލީތަލް އިންޖެކްޝަން ޖަހައިގެން މަރުގެ އަދަބު ތަންފީޒުކުރަން އެމެރިކާގެ ޓެނެސީ ސްޓޭޓުން ކުރި މަސައްކަތް ނާކާމިޔާބުވެ، އޭނާގެ ހާލު ވަރަށް ބޮޑަށް ގޯސްވުމާ ގުޅިގެން، އެ ސްޓޭޓުގެ ޑިޕާޓްމަންޓް އޮފް ކަރެކްޝަންގެ އިސްވެރިޔާ މި މަހު މަގާމުން އިސްތިއުފާ ދެއްވާނެ ކަމަށް ސަރުކާރުގެ އޮފިޝަލުން ހޮނިހިރު ދުވަހު ވިދާޅުވެއްޖެ އެވެ.
ޕައިކްގެ ވަކީލުން ހުކުރު ދުވަހު ކޯޓަށް ހުށަހެޅި ލިޔުންތަކުގައިވާ ގޮތުން، މިދިޔަ ބުދަ ދުވަހު މަރުގެ އަދަބު ތަންފީޒުކުރުމަށް ކުރި މަސައްކަތް ނާކާމިޔާބުވުމާ ގުޅިގެން އޭނާ އޮތީ ހޭނެތިފަ އެވެ. އަދި ނޭވާލުމަށް ދަތިވުމުގެ ސަބަބުން އޭނާއަށް މިހާރު ފަރުވާ ދެމުންދަނީ ވެންޓިލޭޓަރުގެ އެހީގަ އެވެ. މިއީ މި އަހަރުގެ ތެރޭގައި ޓެނެސީ ސްޓޭޓުން މަރުގެ އަދަބު ތަންފީޒުކުރަން އުޅެ ނާކާމިޔާބުވި ދެވަނަ ފަހަރު ކަމަށްވާތީ، 2026 ވަނަ އަހަރުގެ ނިޔަލަށް އެ ސްޓޭޓުގައި މަރުގެ އަދަބު ތަންފީޒުކުރުން މަޑުޖައްސާލުމަށް ގަވަރުނަރު ބިލް ލީ ވަނީ އަމުރުކުރައްވާފަ އެވެ.
ގަވަރުނަރު ލީ ހޮނިހިރު ދުވަހު ވިދާޅުވީ، ކަރެކްޝަން ކޮމިޝަނަރުގެ މަގާމުން ފްރޭންކް ސްޓްރާޑާ އިސްތިއުފާ ދެއްވާފައިވާ ކަމަށާއި، މި މަސް ނިމުމުގެ ކުރިން އޭނާ މަގާމުން ވަކިވެވަޑައިގަންނަވާނެ ކަމަށެވެ. ސްޓޭޓުގެ ވެރިރަށް ނޭޝްވިލްގައި ހުންނަ ރިވަަބެންޑް މެކްސިމަމް ސެކިއުރިޓީ އިންސްޓިޓިއުޝަނުގައި މަރުގެ އަދަބު ތަންފީޒުކުރަން އުޅުމުގެ ތެރޭގައި ހިނގި މި ހާދިސާ މިނިވަން މުއައްސަސާއަކުން ތަހުގީގު ކުރުމަށް ގަވަރުނަރު ވަނީ މިހާރު އަމުރުކުރައްވާފަ އެވެ.
ސްޓްރާޑާ ނެރުއްވި ވަކި ބަޔާނެއްގައި ވިދާޅުވީ، އެ އިދާރާގެ މުވައްޒަފުން އަމަލުކުރީ ކަނޑައެޅިފައިވާ އުސޫލުތަކާ އެއްގޮތަށް ކަމަށް އޭނާ ގަބޫލުކުރެއްވި ނަމަވެސް، މި ހާދިސާގެ މިނިވަން ތަހުގީގެއް ކުރިއަށްދާއިރު މަގާމުން ދުރުވުމަކީ ޓެނެސީގެ ރައްޔިތުންނަށް އެންމެ ފައިދާހުރި ގޮތް ކަމަށް ދެކޭ ކަމަށެވެ.
ކަރެކްޝަންސްގެ ވަގުތީ ކޮމިޝަނަރަކު ފަހުން އިއުލާން ކުރައްވާނެ ކަމަށް ގަވަރުނަރުގެ އޮފީހުން ބުންޏެވެ.
ޕައިކްގެ ވަކީލުން ތުހުމަތުކުރާ ގޮތުގައި، އޭނާގެ ހަށިގަނޑުގެ ނާރުތައް ކުޑަވުމާއި "ތްރޮމްބޯސައިޓޯސިސް" ކިޔާ ލޭގެ ބައްޔެއް ހުންނާތީ، އައިވީ ގުޅުމަކީ ވަރަށް އުނދަގޫ ކަމެއް ކަމަށް ޑޮކްޓަރުން ކުރިން ދީފައިވާ އިންޒާރުތަކަށް ކަރެކްޝަންސްގެ އޮފިޝަލުން ވަނީ އިހުމާލުވެފަ އެވެ.
އުމުރުން މިހާރު 50 އަހަރުގެ ޕައިކްގެ މައްޗަށް ގަސްތުގައި މީހަކު މަރާލުމުގެ ކުށް ސާބިތުވީ މީގެ ތިރީސް އަހަރު ކުރިންނެވެ. އެއީ 1995 ވަނަ އަހަރު، އޭނާގެ އުމުރުން 18 އަހަރުގައި ކޮލީން ސުލެމާ ނަމަކަށް ކިޔާ 19 އަހަރުގެ އަންހެނަކަށް އަނިޔާކޮށް މަރާލި މައްސަލައިގަ އެވެ.
ޕައިކްގެ ވަކީލުން ހުކުރު ދުވަހު ބުނި ގޮތުގައި، އޭނާގެ ފުރާނަ ސަލާމަތް ކުރުމަށާއި ހަށިގަނޑަށް ފޮނުވާލި "ޕެންޓޯބާބިޓަލް" ނަމަކަށް ކިޔާ ކެމިކަލް ހަށިގަނޑުން ބޭރުކުރުމަށް ޑޮކްޓަރުން މިހާރު ދަނީ މަސައްކަތް ކުރަމުންނެވެ.
