މީގެ ކުރިން މަރުގެ ހުކުމް ގާއިމުކުރަން ތާއީދުކުރެއްވި ނަމަވެސް، މިހާރު އެކަމާ ދެކޮޅު ކަމަށް ކުރީގެ ރައީސް، އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ޕީއެންއެފްގެ އޮފީހުގައި ރޭ ބޭއްވި ޖަލްސާގައި ވާހަކަދައްކަވަމުން ޔާމީން ވިދާޅުވީ ރާއްޖޭގައި މިހާރު ތިބި ފަނޑިޔާރުންގެ އަދުލުވެރިކަމެއް ނެތް ކަމަށާއި މަރުގެ ހުކުމް އިއްވަން އެ މީހުންނާ ހަވާލުކުރަން ހެޔޮނުވާނެ ކަމަށެވެ.
"މަރުގެ ހުކުމް ކުރަނީ ކޮންބައެއްތޯ؟ އެއްކަލަ އަދުލުވެރިކަން ނެތް ފަނޑިޔާރުންނޭ. ފަނޑިޔާރުންގެ ނިޒާމު މިހެން އޮއްވައި. އަޅުގަނޑު ކުރިން ދެންނެވިން ދެއްތޯ އަޅުގަނޑަކީ މަރުގެ ހުކުމަށް ތަންފީޒުކުރަން އަޅުގަނޑަކީ ކުރީގައި އެކަމަށް ވަކާލާތުކުރި މީހެއް އިނގޭތޯ؟" ޔާމީން ވިދާޅުވި އެވެ.
"އެކަމަކު ފަނޑިޔާރުންގެ ނުކުޅެދުންތެރިކަން ނުވަތަ އަދުލުވެރިކަން ނެތްކަން ފެނުނީމާ އަޅުގަނޑު މަރުގެ ހުކުމާ ދެކޮޅު މިހާރު."
ޔާމީން އެހެން ވިދާޅުވީ އެމަނިކުފާނުގެ މައްޗަށް ދައުވާކުރި މައްސަލަތަކުގައި ފަނޑިޔާރުންނާއި ކުރީގެ ޕްރޮސެކިއުޓާ ޖެނެރަލްގެ އޮފީހުން ކަން ކޮށްފައި ހުރި ގޮތަށް ފާޑުވިދާޅުވުމަށް ފަހު އެވެ.
ސުޕްރީމް ކޯޓުން ނިންމީ ނުރައްކާތެރި ނިންމުމެއް ކަމަށް ރައީސް ޔާމީން ވިދާޅުވެއްޖެ
"ސުޕްރީމް ކޯޓުން ނިންމީ ނޫނެކޭ، ތިކަންކަމަށް ބަލާނެކަމެއް ނެތޭ، ރައްޔިތުންގެ މަޖިލިސް މެންބަރަކީ އޭނާގެ ޕާޓީ ދިފާއު ކުރަންޖެހޭ މީހާއޭ. އެހެންވީމާ ސުޕްރީމް ކޯޓުން މި އޮތީ [ސަރުކާރު ޒިންމާދާރު ކުރުވުމުގައި] މަޖިލީހުގެ ދައުރެއް ނޯންނަ ކަމަށް ނިންމާފަ،" ރައީސް ޔާމީން ވިދާޅުވި އެވެ.
ރޭގެ ޖަލްސާގައި ވާހަކަދައްކަވަމުން ޔާމީން ވަނީ ރައްޔިތުންގެ މަޖިލީހުގެ މެންބަރަކު ސިޔާސީ ޕާޓީއަކުން ވަކިކޮށްފި ނަމަ މަގާމު ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ބާތިލް ކުރަން ނުޖެހޭ ކަމަށް ސުޕްރީމް ކޯޓުން ކުރި ހުކުމަކީ ނުރައްކާތެރި ނިންމުމެއް ކަމަށް ވިދާޅުވެ އެކަމަށް ވެސް ފާޑުވިދާޅުފަ އެވެ.
"އެހަށް ދުވަހު ސުޕްރީމް ކޯޓުން ނިންމީ ވަރަށް ނުރައްކާތެރި ނިންމުމެއް. އެ ނިންމުމަށް އަޅުގަނޑު ފަރުދެއްގެ ހައިސިއްޔަތުން އަދި ސިޔާސީ މަސައްކަތުގައި އެތައް ޒަމާނެއް ވަންދެން އުޅެފައި ހުރި މީހެއްގެ ހައިސިއްޔަތުން އަޅުގަނޑު އެ ނިންމުމަކަށް އެއްބަހެއް ނުވަން،" ޔާމީން ވިދާޅުވި އެވެ.
ޔާމީން ވިދާޅުވީ، މަޖިލީހުގެ މެންބަރުންނަކީ ގާނޫނު ނަގަހައްޓައި، އާންމު މަސްލަހަތު ހިމާޔަތް ކުރަންޖެހޭ ބަޔެއް ކަމަށް ގާނޫނުއަސާސީގައި ބަޔާންކޮށްފައިވާ ކަމަށެވެ. ނަމަވެސް ސުޕްރީމް ކޯޓުން ނިންމި ގޮތުން މެންބަރުން ހިމާޔަތް ކުރަންޖެހޭނީ އެމީހެއްގެ ޕާޓީ ކަމަށް ޔާމީން ވިދާޅުވި އެވެ.
ރައްޔިތުންގެ މަޖިލީހުގެ މެންބަރުންގެ އެންމެ އިސް ޒިންމާއަކީ ސަރުކާރުން ޖަވާބުދާރީ ކުރުވުން ކަމަށް ޔާމީން ވިދާޅުވި އެވެ. ނަމަވެސް ކޯޓުން ނިންމީ ސަރުކާރު ޒިންމާދާރު ކުރުވުމުގައި ވެސް މަޖިލީހުގެ ދައުރެއް ނޯންނަ ގޮތަށް ކަމަށް ޔާމީން ވިދާޅުވި އެވެ.
"ސުޕްރީމް ކޯޓުން ނިންމީ ނޫނެކޭ، ތިކަންކަމަށް ބަލާނެކަމެއް ނެތޭ، ރައްޔިތުންގެ މަޖިލިސް މެންބަރަކީ އޭނާގެ ޕާޓީ ދިފާއު ކުރަންޖެހޭ މީހާއޭ. އެހެންވީމާ ސުޕްރީމް ކޯޓުން މި އޮތީ [ސަރުކާރު ޒިންމާދާރު ކުރުވުމުގައި] މަޖިލީހުގެ ދައުރެއް ނޯންނަ ކަމަށް ނިންމާފަ،" ރައީސް ޔާމީން ވިދާޅުވި އެވެ.
