އިންޑިއާގެ އިލެކްޝަން ކޮމިޝަނުގެ އިސްވެރިޔާ އިސްތިއުފާ ދިނުމަށް ގޮވާލައި އެ ގައުމުގެ ޒުވާނުން ފެށި އިހުތިޖާޖު ހުއްޓުވުމަށްޓަކައި، ހޮނިހިރު ދުވަހު ދިއްލީގެ ސަލާމަތީ ކަންކަން ވަރުގަދަކޮށް ފުލުހުން އެތައް ހާސް ބަޔަކު ހައްޔަރުކޮށްފި އެވެ.
ދަތުރުފަތުރާއި މުވާސަލާތީ ހިދުމަތްތައް ކަނޑާލައިގެން މުޅި ސަރަހައްދު ވަނީ ފުލުހުންގެ ބަންދެއްގެ ދަށަށް ގެނެސްފަ އެވެ.
"ކޮކްރޯޗް" ނުވަތަ "ކުރަފި" ޒުވާނުންގެ ހަރަކާތުން އިންތިޒާމުކުރި މި އިހުތިޖާޖަކީ، ވޯޓުލާ މީހުންގެ ލިސްޓަށް ގެނައި ބަދަލުތަކާ ގުޅިގެން ޗީފް އިލެކްޝަން ކޮމިޝަނަރު ގްޔަނޭޝް ކުމާރާ ދެކޮޅަށް ކުރިއަށްގެންދާ ހަރަކާތެކެވެ. ފާޑުކިޔާ ފަރާތްތަކުން ބުނާ ގޮތުގައި އެ ބަދަލުތައް ގެނެސްފައިވަނީ ބޮޑުވަޒީރު ނަރެންދުރަ މޯދީގެ ބާރަތިޔާ ޖަނަތާ ޕާޓީ (ބީޖޭޕީ) އަށް ފައިދާވާ ގޮތަށެވެ.
ޓީވީން ދެއްކި މަންޒަރުތަކުން ފެންނަ ގޮތުގައި، ނިއު ދިއްލީގެ ވިޔަފާރި މަރުކަޒީ ސަރަހައްދުގައި އިހުތިޖާޖު ކުރަމުންދިޔަ ޒުވާނުންގެ ފަހަތުން ފުލުހުން ދުވެ، އެ މީހުން އަތުލައިގަނެގެން އުޅަނދުތަކަށް އަރުވައިގެން ވަނީ ގެންގޮސްފަ އެވެ.
އެ ސަރަހައްދުން ގާތްގަނޑަކަށް 200 އެއްހާ މީހުން ހައްޔަރުކޮށްފައިވާ ކަމަށް ފުލުހުންގެ މަސްދަރަކުން ރޮއިޓާސް ނިއުސް އެޖެންސީއަށް މައުލޫމާތު ދީފައިވެ އެވެ. ފުލުހުންގެ ތަރުޖަމާނަކު ވިދާޅުވި ގޮތުގައި، ދިއްލީގެ ބޭރުން ހައްޔަރުކުރި މީހުންގެ ތެރޭގައި މި އިހުތިޖާޖަށް ތާއީދުކުރާ ޔޫޓިއުބްގެ މަގުބޫލު ޝަހުސިއްޔަތެއް ކަމަށްވާ ދްރޫވް ރާތީ ވެސް ހިމެނެ އެވެ.
މެޓްރޯ ސްޓޭޝަންތަކާއި މާރުކޭޓުތައް ބަންދުކޮށް، މޯބައިލް އިންޓަނެޓްގެ ހިދުމަތް ކަނޑާލާފައިވާއިރު، ސިޓީއަށް ވަންނަ ހުރިހާ މަގުތަކެއް ބަންދުކޮށް ފުލުހުން ދަނީ ބަސްތަކާއި ކާރު ފަދަ އުޅަނދުތައް ޗެކްކުރަމުންނެވެ. ރޮއިޓާސްގެ ރިޕޯޓަރުން ބުނި ގޮތުގައި، އިހުތިޖާޖު ކުރާ މީހުން ސިޓީއަށް ވަނުން ހުއްޓުވުމަށްޓަކައި ފުލުހުން ދަނީ ބަސްތަކަށް އަރައި މީހުން ބަލައި ފާސްކުރަމުންނެވެ.
މަގުތަކުގައި ބެރިކޭޑްތަކާއި ކޮންކްރީޓް ގަލުން ހުރަސް އަޅާފައިވާއިރު، މުޒާހަރާ ރޫޅާލުމަށް ބޭނުންކުރާ ކަރުނަގޭސް ޖަހާ ބަޑި ހަރުކޮށްފައިވާ އުޅަނދުތައް މައި މަގުތަކުގައި ވަނީ އަތުރާލާފަ އެވެ.
"ގައުމުގެ ޒުވާނުންނާއި ރައްޔިތުން ދެކެ ބޮޑުވަޒީރު މިހާ ބޮޑަށް ބިރުގަންނަނީ ކީއްވެގެންތޯ؟" މި އިހުތިޖާޖަށް ގޮވާލި 'ކޮކްރޯޗް ޖަނަތާ ޕާޓީ' ގެ ބާނީ އަބީޖީތު ދިޕްކޭ ހޮނިހިރު ދުވަހު ދިއްލީއަށް ދިއުމުގެ ކުރިން ސުވާލު އުފެއްދި އެވެ.
މުމްބާއީގައި ހުރެ އޭއެންއައި ނިއުސް އެޖެންސީއަށް ދިން އިންޓަވިއުއެއްގައި އޭނާ ބުނީ، ރޭލު ދަތުރުތަކާއި މެޓްރޯ އަދި އިންޓަނެޓާއި މަގުތައް ބަންދުކުރަން ޖެހުނީ ސަރުކާރުން ބިރުގަންނާތީ ކަމަށެވެ.
އިހުތިޖާޖު ކުރާ މީހުން ބުނެފައިވަނީ، ހޮނިހިރު ދުވަހުގެ ހެނދުނު 10:00 ޖަހާއިރު ނިއު ދިއްލީގެ މެދުތެރޭގައި އޮންނަ، މުޒާހަރާ ކުރުމަށް ހާއްސަކޮށްފައިވާ ޖަންތަރު މަންތަރަށް އެންމެން އެއްވުމަށް ރާވާފައިވާ ކަމަށެވެ.
