ހިމާލަޔާ ސަރަހައްދުގައި ދިރިއުޅޭ ދޫންޏެއް ކަމަށްވާ "މޮނާލް" އުޅޭ މާހައުލަށާއި އެ ސަރަހައްދުގެ އިންސާނީ ހަރަކާތްތަކަށް އައި ބޮޑު ބަދަލުގެ ސަބަބުން، އޭގެ ދިރިއުޅުމަށާއި މުއާމަލާތްކުރުމުގެ ވައްޓަފާޅިއަށް ނޭދެވޭ އަސަރުތަކެއް ކުރަމުންދާކަން އިންޑިއާގެ ދިރާސާވެރިން ބުނެފި އެވެ.
ހިމާލަޔާގެ ފަރުބަދަމަތީ ޖަންގަލިތަކަށް ނިސްބަތްވާ "ފެޒަންޓް" އާއިލާގެ މި ދޫންޏަކީ އެ ސަރަހައްދުގެ ސަގާފަތާއި، ފޯކްލޯރް އަދި އަމިއްލަވަންތަކަމާ ވަރަށް ބޮޑަށް ލާމެހިފައިވާ ދޫންޏެކެވެ. ފިރިހެން ދޫނީގެ ފަތްތަކުގައި ހުންނަ ފެހި، ނޫ އަދި ކޮޕާ ކުލަތަކުގެ ސަބަބުން ގިނަ ބައެއްގެ ސަމާލުކަން ހޯދާފައިވާ މި ދޫންޏަކީ އިންޑިއާގެ އުއްތަރަކަންޑް ސްޓޭޓްގެ "ރަސްމީ" ދޫންޏެވެ. އަދި މިއީ ނޭޕާލްގެ ގައުމީ ދޫނި ވެސް މެއެވެ. މިއިން ދޭހަކޮށްދެނީ މުޅި ހިމާލަޔާ ސަރަހައްދުގައި މި ދޫންޏަށް ދެވިފައިވާ ސަގާފީ މުހިންމުކަމެވެ.
ނަމަވެސް، އެ ސަރަހައްދުގައި ކުރިއަށްދާ އުމްރާނީ ތަރައްގީގެ މަޝްރޫއުތަކާއި ފަތުރުވެރިކަން އިތުރުވުމުގެ ސަބަބުން މޮނާލް ދިރިއުޅޭ މާހައުލު ހަނިވަމުންދާކަން ދިރާސާތަކުން ދައްކަ އެވެ. މީގެ އިތުރުން، އިންސާނީ ހަރަކާތްތަކުގެ ސަބަބުން އުފެދޭ އަޑުގަދަވުމުގެ ނަތީޖާއެއްގެ ގޮތުން، އެ ދޫނިތައް އެކަތި އަނެކައްޗާ މުއާމަލާތްކުރުމަށާއި ބައިވެރިން ހޯދުމަށް ބޭނުންކުރާ އަޑުތަކަށް ވެސް ބަދަލުތަކެއް އަންނަމުންދާކަން ވަނީ ފާހަގަކުރެވިފަ އެވެ.
އުއްތަރަކަންޑްގެ ދިރާސާވެރިން ފަސް އަހަރު ދުވަހުގެ މުއްދަތަށް ކުރިއަށްގެންދިޔަ ދެ ދިރާސާއަކުން ވަނީ މި ދޫންޏަށް ކުރިމަތިވެފައިވާ މައިގަނޑު ނުރައްކާތައް ފާހަގަކޮށްފަ އެވެ.
މީގެ ތެރެއިން އެއް ދިރާސާއިން ދައްކާ ގޮތުގައި، ފަރުބަދަތަކުގެ މަތީގައި އިންސާނުން ގިނަވެ ބާރުބޮޑުވުމުގެ ސަބަބުން، މޮނާލް ދޫނިތަކަށް ވަނީ އޭގެ ގުދުރަތީ މާހައުލު ދޫކޮށް ފަރުބަދަތަކުގެ މާ މަތީ ހިސާބުތަކަށް ހިޖުރަކުރަން މަޖުބޫރުވެފަ އެވެ. ދެވަނަ ދިރާސާއިން ހާމަވި ގޮތުގައި، މީހުން ގިނަ ވާދީތަކުގައި އުފެދޭ އިންސާނީ އަޑުގަދަވުމުގެ ތެރެއިން އެކަތި އަނެކައްޗަށް އަޑު އިއްވުމަށްޓަކައި، މޮނާލް ދޫނިތައް މިހާރު ދަނީ އޭގެ އަޑުގެ "ޕިޗް" ނުވަތަ ރާގަށް ބަދަލު ގެންނަމުންނެވެ.
"މި ދެ ދިރާސާއަކީ ނެތިދިއުމުގެ ބިރު އޮތް އެހެން ދިރުންތަކާ ގުޅޭ މުހިންމު އިންޒާރެއް. މޮނާލް ފަދަ ދޫންޏަކަށް އޭގެ އަޑާއި ދިރިއުޅޭ ތަން ބަދަލުކުރަން މަޖުބޫރުވާނަމަ، މިއަށްވުރެ ނާޒުކު އެހެން ދިރުންތަކަށް ކުރާނެ އަސަރު އަންދާޒާކޮށްލެވޭނެ،" ހިމާލަޔާގެ ތިމާވެއްޓާއި މޫސުމީ ބަދަލުތަކާ ބެހޭ މާހިރެއް ކަމަށްވާ ވިޝާލް ސިންގް ވިދާޅުވި އެވެ.
ދިރާސާވެރިން ފާހަގަކުރާ ގޮތުގައި، ބެލެހެއްޓުމެއް ނެތް ފަތުރުވެރިކަމާއި ހަލުވިކަމާއެކު ކުރިއަށްދާ އާބާދުވުމުގެ ސަބަބުން ނާޒުކު ފައްތަރެއްގައި އޮތް ހިމާލަޔާގެ ތިމާވެށީގެ ހާލަތު ދެނެގަތުމަށް މޮނާލް ދޫންޏަކީ ވަރަށް ރަނގަޅު މިސާލެކެވެ.
