އިންޑިއާގެ ވެރިރަށް ދިއްލީގައި ކުރިއަށްދާ މުޒާހަރާތަކުގެ ތެރެއިން، އެ ގައުމުގެ ފުލުހުންގެ ފަރާތުން ޖިންސީ ފުރައްސާރަ ކުރިމަތިވި ކަމަށް އަންހެން ތިން ނޫސްވެރިއަކު ތުހުމަތުކޮށްފި އެވެ.
އިލެކްޝަން ކޮމިޝަނަރުގެ އިސްތިއުފާއަށް ގޮވާލައި މުޒާހަރާ ކުރި ގިނަ އަދަދެއްގެ ޒުވާނުން ފުލުހުންގެ ބެލުމުގެ ދަށަށް ގެންގޮސްފައި ވަނިކޮށް، ނޫސްވެރިން މި ތުހުމަތުތައް ކުރީ ހޮނިހިރު ދުވަހު އެވެ.
މި މައްސަލައާ ގުޅިގެން ދިއްލީ ފުލުހުން ސޯޝަލް މީޑިއާގައި ކުރި ޕޯސްޓެއްގައި ބުނީ، ނިއު ދިއްލީ ޑިސްޓްރިކްޓަށް އެ ޝަކުވާ ލިބިފައިވާ ކަމަށާއި، އިންސާފުވެރި އަދި ވަކި ފަރާތަކަށް ނުޖެހޭ ތަހުގީގެއް ހިންގުމަށްޓަކައި އެ މައްސަލަ މިހާރު ކްރައިމް ބްރާންޗަށް ބަދަލުކޮށްފައިވާ ކަމަށެވެ.
ވޯޓުލާ މީހުންގެ ދަފުތަރަށް ގެނައި ބޮޑެތި ބަދަލުތަކާ ގުޅިގެން، ޗީފް އިލެކްޝަން ކޮމިޝަނަރު ގިޔާނޭޝް ކުމާރު އިސްތިއުފާ ދިނުމަށް ގޮވާލައި އާދީއްތަ ދުވަހު ވެސް ދިއްލީ އާއި މުމްބާއީގައި އެތައް ހާސް ބަޔަކު ވަނީ ތިންވަނަ ދުވަހަށް މުޒާހަރާ ކޮށްފަ އެވެ.
އިލެކްޝަން ކޮމިޝަނުން ބުނާ ގޮތުގައި މި ބަދަލުތަކަކީ އެއް ނަމެއް ދެ ފަހަރަށް އޮތުމާއި ޝަރުތު ހަމަނުވާ މީހުންގެ ނަންތައް އުނިކުރުމަށް ކުރާ މަސައްކަތެކެވެ. އަދި މިހާތަނަށް 130 މިލިއަން މީހުންގެ ނަން ވޯޓުލާ މީހުންގެ ލިސްޓުން ވަނީ އުނިކޮށްފަ އެވެ.
އިންޓަނެޓުގައި ދައުރުވަމުންދާ ވީޑިއޯތަކުން ފެންނަ ގޮތުގައި، މެދުތެރޭ ދިއްލީގެ ޖަންތަރު މަންތަރު ސަރަހައްދުގައި މުޒާހަރާ ކުރަމުންދިޔަ މީހުންގެ ގައިގައި ހިފައި ދަމާފައި ފުލުހުން ވަނީ އެ ސަރަހައްދުން ދުރުކޮށްފަ އެވެ.
އަންހެން ނޫސްވެރިން ކުރި ތުހުމަތުތަކުގެ ތެރޭގައި، ބައެއް ފުލުހުން އެ މީހުންގެ ހަށިގަނޑުގައި ނޭދެވޭ ގޮތަށް އަތްލައި ފުރައްސާރަކުރުން ހިމެނެ އެވެ.
މި ހާދިސާއާ ގުޅިގެން އިދިކޮޅު ލީޑަރު ރާހުލް ގާންދީ ވިދާޅުވީ، އަންހެނުން ތިބީ އެ މީހުންގެ ސަލާމަތާ މެދު ބިރުވެރިކަމެއްގެ ތެރޭގައި ކަމަށާއި، މިކަމަށް ހޯމް މިނިސްޓްރީން ޖަވާބުދާރީވާން ޖެހޭނެ ކަމަށެވެ.
ޕްރެސް ކްލަބް އޮފް އިންޑިއާއިން ވަނީ ނޫސްވެރިންނާ މެދު އަމަލުކުރި ގޮތުން ހައިރާންކަމާއި ކަންބޮޑުވުން ފާޅުކޮށް، ފުލުހުންގެ މައްޗަށް ކުރެވޭ މި ތުހުމަތުތަކާ ގުޅިގެން ވަގުތުން ފިޔަވަޅު އެޅުމަށް ގޮވާލާފަ އެވެ.
