އެލޮން މަސްކްގެ ސެޓެލައިޓް އިންޓަނެޓް ކުންފުނި، ސްޓާލިންކަށް އިންޑިއާގައި ޚިދުމަތް ދިނުމަށް ބޭނުންވާ އެންމެ ފަހުގެ ހުއްދަތައް ހޯދުމުގައި ދަތިތަކާ ކުރިމަތިވަމުންދާތީ، އިންޑިއާގެ މަހުޖަނު މުކޭޝް އަމްބާނީއަކީ އެ ގައުމުގެ "އަސްލު ބޮސް" ތޯ މަސްކް ސުވާލު އުފައްދައިފި އެވެ.
މަސްކް މި މޭރުމުން ވާހަކަދައްކާފައި މިވަނީ، ނުފޫޒުގަދަ ވިޔަފާރިވެރިންތަކެއް އިސްވެ ސްޓާލިންކް އިންޑިއާއަށް ވަނުމަށް ހުރަސްއަޅަމުންދާ ކަމަށް ބުނެ އޭނާ ތުހުމަތުކުރިތާ އެއް ދުވަސް ފަހުންނެވެ. މަސްކް ވަނީ އިންޑިއާގެ އެންމެ ބޮޑު މޮބައިލް ނެޓްވޯކް ކަމަށްވާ "ޖިއޯ" ހިންގާ ރިލަޔަންސް ކުންފުނީގެ ވެރިޔާ މުކޭޝް އަމްބާނީގެ ނަން ވަކިން ފާހަގަކޮށް ފާޑުކިޔާފަ އެވެ.
މަސްކްގެ މި ތުހުމަތުތައް އިންޑިއާ ސަރުކާރުން ވަނީ ދޮގުކޮށްފަ އެވެ. އިންޑިއާ އިން ބުނާ ގޮތުގައި އެ ގައުމުގެ ސެޓެލައިޓް މުއާސަލާތީ ގަވާއިދުތަކަކީ ހުރިހާ ފަރާތްތަކަކަށް ވެސް ހަމަހަމަ އަދި ވަކި ފަރާތަކަށް ތަފާތުކުރުމެއް ނެތް އުސޫލުތަކެކެވެ.
މަސްކްގެ މި ވާހަކަތަކާ ގުޅިގެން އަމްބާނީ ނުވަތަ ރިލަޔަންސް ގްރޫޕުން މިހާތަނަށް އެއްވެސް ރައްދެއް ދީފައެއް ނުވެ އެވެ.
މި މައްސަލަ ހޫނުވެފައި މިވަނީ އިންޑިއާގެ ސެޓެލައިޓް އިންޓަނެޓް މާކެޓުގައި ވާދަވެރިކަން އިތުރުވެ، ރިލަޔަންސް ޖިއޯ އާއި ބާރްތީ އެއާޓެލް އިން ވެސް އެ ޚިދުމަތް ފެށުމަށް ތައްޔާރުވަމުންދާ ދަނޑިވަޅެއްގަ އެވެ.
މި ވާދަވެރިކަން އިތުރަށް އޮޅުންބޮޅުން ވަނީ، ސްޓާލިންކުން އަމްބާނީގެ ރިލަޔަންސް ޖިއޯ އާއި ބާރްތީ އެއާޓެލްއާ އެކު ވެސް ޕާޓްނަޝިޕް ހަދާފައިވާތީ އެވެ.
މާޗު 2025 ގައި، ސަރުކާރުގެ ހުއްދަ ލިބުމުން ސްޓާލިންކްގެ އިކުއިޕްމަންޓާއި ޚިދުމަތްތައް އިންޑިއާގައި ފޯރުކޮށްދިނުމަށް އެ ދެ ކުންފުނިން ވަނީ ސްޕޭސްއެކްސްއާ އެކު އެއްބަސްވުންތަކެއްގައި ސޮއިކޮށްފަ އެވެ. މީގެ އިތުރުން، ނެޓްވޯކް އިންފްރާސްޓްރަކްޗާ ހިއްސާކުރުމުގެ ފުރުސަތު އޮތް ކަމަށް ވެސް އެ ކުންފުނިތަކުން ބުނެފައިވެ އެވެ.
މަސްކް އެންމެ ފުރަތަމަ މި ތުހުމަތުތައް ކުރީ މިދިޔަ ބުދަ ދުވަހު އެވެ. އޭނާ ބުނި ގޮތުގައި "ވަކި ބަޔަކު" ދަނީ އިންޑިއާގެ ކޮންސިއުމަރުންގެ މައްޗަށް މޮނޮޕޮލީއެއް ހިންގުމަށް މަސައްކަތް ކުރަމުންނެވެ.
މިކަމާ ގުޅިގެން ބުރާސްފަތި ދުވަހު އިންޑިއާގެ މިނިސްޓްރީ އޮފް ކޮމިއުނިކޭޝަންސް އިން ބުނީ، ސްޓާލިންކާއި، ޔޫޓެލްސެޓް ވަންވެބް އަދި ޖިއޯ ސެޓެލައިޓް ކޮމިއުނިކޭޝަންސް އަށް ވެސް ހުއްދަ ދިނުމުގެ މަރުހަލާ އޮތީ ގާތްގަނޑަކަށް އެއް ހަމައެއްގައި ކަމަށެވެ. ވިޔަފާރި އުސޫލުން ޚިދުމަތް ފެށުމުގެ ކުރިން މި ތިން ކުންފުންޏަށް ވެސް ސެކިއުރިޓީ ކްލިއަރެންސާއި ސްޕެކްޓްރަމް ދޫކުރުމުގެ މަރުހަލާ ކުރިއަށްދާ ކަމަށް މިނިސްޓްރީން ބުންޏެވެ.
މަސްކްގެ ނަން ސީދާ ބޭނުންނުކޮށް މިނިސްޓްރީން ބުނީ، ހުއްދަ ދިނުމުގެ އުސޫލުތަކަކީ ބޭއިންސާފު ނުވަތަ ތަފާތުކުރުންތަކެއް ހުރި އުސޫލުތަކެއް ކަމަށް ބުނާ ބުނުމަކީ އެއްވެސް އަސާސެއް ނެތް، ކުށްހީއެއްގެ މައްޗަށް ބިނާވެފައިވާ ވާހަކައެއް ކަމަށެވެ.
ނަމަވެސް، މަސްކް ވަނީ ލައިސަންސް ލިބުން ލަސްވާތީ އަދިވެސް ސުވާލު އުފައްދާފަ އެވެ. އޭނާ ބުނީ ސްޓާލިންކަށް މިހާރުވެސް 165 އަށް ވުރެ ގިނަ ގައުމުގައި ލައިސަންސް ލިބިފައިވާ ކަމަށެވެ.
މަސްކްގެ ސްޕޭސްއެކްސް ކުންފުނީގެ ދަށުން ހިންގާ ސްޓާލިންކަކީ ބިމާ ކައިރި އޯބިޓްގައިވާ ސެޓެލައިޓްތައް ބޭނުންކޮށްގެން އިންޓަނެޓް ފޯރުކޮށްދޭ ޚިދުމަތެކެވެ. މިއީ ޚާއްސަކޮށް މޮބައިލް ނެޓްވޯކާއި ބްރޯޑްބޭންޑް ކޭބަލް އެޅުމަށް ދަތި އަދި ޚަރަދު ބޮޑު ދުރު ހިސާބުތަކަށް އަމާޒުކޮށްގެން ދޭ ޚިދުމަތެކެވެ.
ސްޓާލިންކުން އިންޑިއާގެ މާކެޓަށް ވަނުމަށް މަސައްކަތް ކުރަމުންދާތާ މިހާރު ވަނީ ހަތަރު އަހަރު ވެފަ އެވެ. އެ ކުންފުންޏަށް ބައެއް މުހިންމު ލައިސަންސްތައް ލިބިފައިވީ ނަމަވެސް، ވިޔަފާރި ފެށުމަށްޓަކައި އަދިވެސް އެންމެ ފަހުގެ ސެކިއުރިޓީ ކްލިއަރެންސާއި ސްޕެކްޓްރަމް އެލޮކޭޝަން ބޭނުންވެ އެވެ.
ބުދަ ދުވަހުގެ މި ބަހުގެ ހަމަލާތައް ބަދަލުކުރެވުނީ، ދިއްލީގައި ބޭއްވި "އިންޑިއާ މޮބައިލް ކޮންގްރެސް" ގައި ސްޓާލިންކާއި، ރިލަޔަންސް ޖިއޯ އަދި ބާރްތީ އެއާޓެލްގެ އިސްވެރިން ބައިވެރިވެ، ސެޓެލައިޓް އިންޓަނެޓާ ބެހޭގޮތުން މަޝްވަރާ ކުރަމުންދިޔަ ވަގުތެއްގަ އެވެ.
އިންޑިއާއަކީ ދުނިޔޭގެ އެންމެ ބޮޑު އެއް އިންޓަނެޓް މާކެޓް ކަމަށް ވިޔަސް، ދުރު ހިސާބުތަކުގައި އިންޓަނެޓްގެ ޚިދުމަތް ލިބުމުގައި ބޮޑެތި ފަރަގުތަކެއް އެބަހުއްޓެވެ. އެއީ މޮބައިލް ނެޓްވޯކާއި ފައިބާ ކޭބަލް އެޅުމަކީ އެފަދަ ސަރަހައްދުތަކުގައި ވަރަށް ޚަރަދު ބޮޑު ކަމަކަށް ވާތީ އެވެ.
އިންޑިއާގައި ޚިދުމަތް ދޭނެ އަގުތައް ސްޓާލިންކުން އަދި އިއުލާނެއް ނުކުރެ އެވެ. ނަމަވެސް ބައެއް މާހިރުން ބުނާ ގޮތުގައި އެހެން ގައުމުތަކުގައި ސްޓާލިންކްގެ އަގުތައް ހުރި ގޮތަށް ބަލާއިރު، އިންޑިއާގެ ގިނަ އާއިލާތަކަށް އެއީ އަތްފޯރާވަރުގެ އަގަކަށް ނުވުން އެކަށީގެންވެ އެވެ.
އެމެރިކާގައި ސްޓާލިންކްގެ އާންމު ޕްލޭންތައް މަހަކު 55 ޑޮލަރުން ފެށޭއިރު، ޕްލޭނާއި ސަރަހައްދުގެ ގޮތުން އަގުތަކާއި އިކުއިޕްމަންޓަށް ހިނގާ ޚަރަދު ތަފާތުވެ އެވެ.
