އިންޑިއާގެ އިލެކްޝަން ކޮމިޝަނުގެ އިސްވެރިޔާގެ އިސްތިއުފާއަށް ގޮވާލައި އިދިކޮޅު ލީޑަރު ރާހުލް ގާންދީ އާއި އިދިކޮޅު މެންބަރުން ކުރިއަށްގެންދިޔަ މުޒާހަރާ ފުލުހުން ރޫޅާލުމާ ގުޅިގެން، ނިއު ދިއްލީގައި ވަރަށް ބޮޑަށް މަސްލަހަތު ގޯސްވެ ހަމަނުޖެހުން ހިނގައިފި އެވެ.
އިދިކޮޅު ފަރާތްތަކުން މުޒާހަރާ ކުރަމުންދަނީ ވޯޓުލާ މީހުންގެ ދަފުތަރު އިސްލާހު ކުރުމުގައި އޮޅުވާލުންތަކެއް ހުރި ކަމަށް ބުނެ އެވެ.
ފުލުހުން ގަދަކަމުން ރާހުލް ގާންދީ ބަހަކަށް އަރުވާ މަންޒަރާއި، ބަހުގެ ކުޑަދޮރުން އޭނާ ބޭރަށް ނިކުންނަން އުޅުމުން އެކަން ހުއްޓުވާ މަންޒަރު ފެންނަ ވީޑިއޯތައް ސޯޝަލް މީޑިއާގައި މިހާރު ވަނީ ވަރަށް ބޮޑަށް ފެތުރިފަ އެވެ.
މި މުޒާހަރާއަކީ އިންޑިއާގެ އިލެކްޝަން ކޮމިޝަނާއި އިދިކޮޅު އިއްތިހާދާ ދެމެދު އުފެދިފައިވާ ނުތަނަވަސްކަން އިތުރަށް ގޯސްވެގެން ދިޔަ ކަމެކެވެ.
އިދިކޮޅު ޕާޓީތަކުން ތުހުމަތު ކުރާ ގޮތުގައި، ޗީފް އިލެކްޝަން ކޮމިޝަނަރު ގްޔަނޭޝް ކުމާރު ވޯޓުލާ މީހުންގެ ދަފުތަރަށް ބަދަލު ގެންނަވަނީ ވެރިކަންކުރާ ބާރަތިޔާ ޖަނަތާ ޕާޓީ (ބީޖޭޕީ) އަށް ފައިދާވާނެ ގޮތަށެވެ. ނަމަވެސް ބީޖޭޕީ އާއި އިލެކްޝަން ކޮމިޝަނުން ވެސް ވަނީ މި ތުހުމަތުތައް ދޮގުކޮށްފަ އެވެ.
ރާހުލް ގާންދީ އާއި އޭނާގެ ކޮއްކޮ ޕްރިޔަންކާ ގާންދީ ވަދްރާގެ އިތުރުން އިދިކޮޅު އެހެން މެންބަރުން އިލެކްޝަން ކޮމިޝަނުގެ އޮފީހަށް ބޭއްވި ހިނގާލުން ފުލުހުން ހުއްޓުވުމުން، އެ ސަރަހައްދުގައި ހުރި އިމާރާތެއްގެ ކައިރީގައި މުޅި ދުވަހު އިށީނދެ ތިބެގެން މުޒާހަރާ ކޮށްފައިވެ އެވެ.
އިލެކްޝަން ކޮމިޝަނުން ބުނީ އިދިކޮޅު ފަރާތްތަކާ ބައްދަލުކުރަން ތައްޔާރަށް އޮތް ނަމަވެސް، ޕާލަމެންޓުގައި 240 މެންބަރުންގެ ވަފުދަކާ ބައްދަލުކުރަން އިދިކޮޅުން ހުށަހެޅި ހުށަހެޅުމަށް އިއުތިރާޒު ކުރާ ކަމަށެވެ.
އަންގާރަ ދުވަހުގެ ރޭ އެ ކޮމިޝަނުން ނެރުނު ބަޔާނެއްގައި ބުނެފައިވަނީ، ބައްދަލުވުމަކަށް އެދެންވާނީ ޕާޓީގެ މަންދޫބެއްގެ ފަރާތުން ކަމަށާއި، ބައްދަލުވުންތައް ބާއްވާނީ ކޮމިޝަނުގެ އިދާރާގައި ކަމަށެވެ.
އެ ދުވަހުގެ ކުރީކޮޅު ރާހުލް ގާންދީ ވިދާޅުވީ، އިދިކޮޅު ފަރާތްތަކުން ބޭނުންވަނީ ހަމައެކަނި އިލެކްޝަން ކޮމިޝަނަރުންނާ ބައްދަލުކޮށް، ވޯޓުލާ މީހުންގެ ދަފުތަރު އިސްލާހު ކުރުމާ ގުޅޭ ގޮތުން ސުވާލު ކުރަން ކަމަށެވެ.
އަންގާރަ ދުވަހު އިލެކްޝަން ކޮމިޝަނުގެ މައި އިދާރާ ހިމެނޭ ސަރަހައްދުގެ ސަލާމަތީ ކަންކަން ވަނީ ވަރުގަދަކޮށްފަ އެވެ. ޕާލަމެންޓާއި ކޮމިޝަނުގެ އޮފީހާ ދެމެދު އޮންނަ މަގުތަކުގައި ފުލުހުން ވަނީ ބެރިކޭޑް ޖަހައި ބަންދުކޮށްފަ އެވެ.
ރިޕޯޓުތައް ބުނާ ގޮތުގައި، ކޮމިޝަނުގެ އޮފީހަށް ދާ މަގުމަތީގައި މުޒާހަރާގެ ބައިވެރިންނަށް ވުރެ ފުލުހުންގެ އަދަދު ގިނަ އެވެ. ބައެއް ފުލުހުން ތިބީ މުގުރި ހިފައިގެން އަދި ޔުނީފޯމުގައި ބޮޑީ ކެމެރާ ހަރުކޮށްގެންނެވެ.
ރާހުލް ގާންދީ އާއި ޕްރިޔަންކާ ގާންދީ ވެސް ފުލުހުންގެ ބަހެއްގައި ގެންދިޔަ ނަމަވެސް، ކުޑަ އިރުކޮޅެއްގެ ތެރޭގައި ވަނީ ދޫކޮށްލާފަ އެވެ. ދޫކޮށްލުމާއެކު އެ ބޭފުޅުން އަލުން ހިނގާލުން ކުރިއަށް ގެންގޮސް، އިލެކްޝަން ކޮމިޝަނުގެ މައި އިދާރާ ކައިރީގައި ހުންނަ އާކާޝްވާނީ ބަވަން ކައިރީގައި އިށީނދެ ތިބެގެން މުޒާހަރާ ކުރިއަށް ގެންދިޔަ އެވެ.
މި ހަރަކާތުގެ ތެރެއިން ހައްޔަރުކުރީ ކިތައް މެންބަރުން ކަމެއް ފުލުހުން ހާމައެއް ނުކުރެ އެވެ. ނަމަވެސް އިދިކޮޅު ފަރާތްތަކުން ބުނާ ގޮތުގައި ތަފާތު ޕާޓީތަކަށް ނިސްބަތްވާ 237 މަޖިލިސް މެންބަރުން މި ހިނގާލުމުގައި ބައިވެރިވި އެވެ.
އަންގާރަ ދުވަހުގެ މި މުޒާހަރާ ކުރިއަށް މިދިޔައީ، ޒުވާނުން އިސްވެ އޮންނަ "ކޮކްރޯޗް ޖަންތާ ޕާޓީ" (ސީޖޭޕީ) އިން މުމްބާއީ އާއި ދިއްލީގައި ސީއީސީގެ އިސްތިއުފާއަށް ގޮވާލައި މުޒާހަރާ ކުރިތާ ހަތަރު ދުވަސް ފަހުންނެވެ. އެ ޖަމާއަތުން ބުނާ ގޮތުގައި މިއީ މުޅި ގައުމަށް ފުޅާކުރާ ކެމްޕޭނެއްގެ ފެށުމެވެ. އަދި އޮކްޓޯބަރު 10 ވަނަ ދުވަހު އިތުރު މުޒާހަރާތަކެއް ބޭއްވުމަށް ވެސް ވަނީ ގޮވާލާފަ އެވެ.
މި ހުރިހާ ހަމަނުޖެހުމެއްގެ އަސްލަކީ "ސްޕެޝަލް އިންޓެންސިވް ރިވިޝަން" (އެސްއައިއާރު) ގެ ނަމުގައި ވޯޓުލާ މީހުންގެ ދަފުތަރު އިސްލާހު ކުރުމަށް ކުރިއަށްގެންދާ މަސައްކަތެވެ. މި މަސައްކަތް 2025 ވަނަ އަހަރުގެ ޖޫން މަހު ބިހާރު ސްޓޭޓުން ފެށުމަށް ފަހު، މިހާރު ވަނީ ގައުމުގެ އެހެން ސަރަހައްދުތަކަށް ފުޅާކޮށްފަ އެވެ.
އިލެކްޝަން ކޮމިޝަނުން ބުނާ ގޮތުގައި މި މަސައްކަތުގެ ބޭނުމަކީ ވޯޓުލާ މީހުންގެ ލިސްޓުގައި ތަކުރާރުވެފައިވާ ނަންތަކާއި، ވޯޓުލުމުގެ ޝަރުތު ހަމަނުވާ މީހުންގެ ނަންތައް އުނިކުރުމެވެ. މިހާތަނަށް މުޅި ގައުމުން 130 މިލިއަނަށް ވުރެ ގިނަ ނަން ޑްރާފްޓް ލިސްޓުން އުނިކޮށްފައިވާ ކަމަށް އެ ކޮމިޝަނުން ބުނެ އެވެ.
ނަމަވެސް އިދިކޮޅު ޕާޓީތަކާއި އެކްޓިވިސްޓުން ތުހުމަތު ކުރާ ގޮތުގައި، ޝަރުތު ހަމަވާ ގިނަ ބަޔަކު ވަނީ ލިސްޓުން ބޭރުކޮށްފަ އެވެ. އަދި އިލެކްޝަން ކޮމިޝަނުން މި މަސައްކަތް ކުރިއަށްގެންދަނީ އުސޫލުން ބޭރުން ކަމަށް ވެސް އެ ފަރާތްތަކުން ބުނެ އެވެ.
