އަމިއްލަ ފަރާތްތަކުން މަގު ކޮނުމުގެ މަސައްކަތް ކުރަމުންދަނިކޮށް ކޭބަލްތަކަށް ލިބޭ ގެއްލުމަށް އެ ފަރާތްތައް ޒިންމާކުރުވަން ނިންމާފައިވާ ކަމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން މިއަދު ބުނެފި އެވެ.
ސްޓެލްކޯއިން ބުނީ އަމިއްލަ ފަރާތްތަކުގެ އިހުމާލުން އެ ކުންފުނީގެ ކަރަންޓު ވިއުގައިގައި ހިމެނޭ ކޭބަލްތަކަށް ލިބޭ ގެއްލުންތަކުގެ މައްސަލަ ހައްލުކޮށް އަލުން ހިދުމަތްދޭން ހިނގާ ހަރަދު މީގެ ފަހުން ހޯދާނެ ކަމަށެވެ.
"މިފަދަ ހާދިސާތައް [ސްޓެލްކޯގެ ކޭބަލްތަކަށް ގެއްލުންވުން] ދުވަހެއް ދުވަހަކަށް އިތުރުވަމުންދާތީ، މަގު ކޮނުމުގެ މަސައްކަތްތައް ކުރިއަށްގެންދާ ފަރާތްތަކުގެ އިހުމާލުން މިފަދަ ކަމެއް ދިމާވެއްޖެ ހާލަތެއްގައި، އެ ފަރާތެއް ޒިންމާދާރު ކުރުވައި، އެ މައްސަލަ ހައްލުކޮށް އަލުން ހިދުމަތްދޭން ހިނގާ ހަރަދު އެ ފަރާތުން ނެގުމަށް މި ކުންފުނިން ވަނީ ނިންމާފައި،" ސްޓެލްކޯއިން ބުންޏެވެ.
ސްޓެލްކޯގެ ކަރަންޓު ވިއުގައިގައި ހިމެނޭ ކޭބަލްތަކަށް މަގު ކޮނުމުގެ އެކި މަސައްކަތްތަކުގެ ތެރެއިން ގެއްލުންވުމުގެ ސަބަބުން ކަރަންޓުގެ ހިދުމަތް މެދުކެނޑުމުގެ ސަބަބުން ރައްޔިތުންނަށް އެތަކެއް ތަކުލީފަކާއި ދަތިތައް ދިމާވާ ކަމަށް އެ ކުންފުނިން ބުންޏެވެ.
ސްޓެލްކޯއިން ބުނީ މި ނިންމުމަކީ ކަރަންޓުގެ ހިދުމަތް މެދުކެނޑުމުގެ ސަބަބުން އާންމު ރައްޔިތުންނަށް ދިމާވާ ދަތި އުނދަގޫތަކުން ސަލާމަތްކޮށް، ހިދުމަތުގެ ފެންވަރު ދެމެހެއްޓެނިވި ގޮތެއްގައި ފޯރުކޮށްދިނުމުގެ މަގުސަދުގައި ނިންމާފައިވާ ނިންމުމެއް ކަމަށެވެ.
އެހެންކަމުން، މަގު ކޮނުމުގެ އެންމެހާ މަސައްކަތްތައް ކުރިއަށްގެންދަވާ ހުރިހާ ފަރާތްތަކުންވެސް ސްޓެލްކޯގެ ކަރަންޓު ވިއުގައަށް ގެއްލުން ނުވާނެހެން ޒިންމާދާރުކަމާއެކު މަސައްކަތްތައް ރާވައި ކުރިއަށްގެންދިއުމަށް ވަނީ އިލްތިމާސްކޮށްފަ އެވެ.
