ދިވެހިރާއްޖޭގެ ކަނޑާއި އެއްގަމުގެ ވެށީގައިވާ ދިރުންތަކުގެ މުއްސަނދިކަމާއި ސިންދަފާތާ ގުޅޭގޮތުން ރާއްޖޭގައި ނެރޭ ފުރަތަމަ މަޖައްލާ މިއަދު ރަސްމީކޮށް ނެރެފި އެވެ.
ފުވައްމުލަކުގައި ބޭއްވި ހާއްސަ ރަސްމިއްޔާތެއްގައި މި މަޖައްލާ ނެރެދެއްވީ "ޕެލާޖިކް ޑައިވާސް ފުވައްމުލައް" ޑައިވް ސެންޓަރުގެ މެނޭޖިން ޑައިރެކްޓަރ އަހުމަދު އިނާހް އެވެ. އިނގިރޭސި ބަހުން ޝާއިއުކުރާ މި މަޖައްލާއަކީ ރާއްޖޭގެ ގުދުރަތީ ރީތިކަމާއި، ތާރީހާއި، ސަގާފަތް ދުނިޔެއަށް އިޝްތިހާރުކުރުމަށް އަމާޒުކޮށްގެން ނެރޭ މަސައްކަތެކެވެ.
މި މަޖައްލާއަކީ ފުވައްމުލަކަށް އުފަން ލިޔުންތެރިޔާ ޔާސިރު ސާލިހު އަމިއްލަ ނަމުގައި ރަޖިސްޓްރީކޮށްގެން ނެރޭ މަސައްކަތެކެވެ. އަހަރަކު ދެ ފަހަރު ނެރުމަށް ހަމަޖެހިފައިވާ މި މަޖައްލާގައި ހިމެނޭ އާޓިކަލްތައް ބަހާލެވިފައިވަނީ މައިގަނޑު ތިން ބަޔަކަށެވެ. އެއީ ބަޔޯޑައިވާސިޓީ ނުވަތަ ދިރުންތަކުގެ ސިންދަފާތާއި، މަސްވެރިކަމުގެ އިތުރުން ތާރީހާއި ސަގާފަތުގެ ބައެވެ. މި މަޖައްލާގެ ފުރަތަމަ އަދަދުގެ ބޭރުގަނޑުން ޖާގަ ދީފައިވަނީ ފުވައްމުލަކު ކަނޑުގެ ސަރަހައްދުގައި އުޅޭ މަޝްހޫރު ޓައިގާ ޝާކް ނުވަތަ ފެލަނި މިޔަރަށެވެ.
މި މަޖައްލާގެ އެންމެ ފާހަގަކޮށްލެވޭ އެއް ސިފައަކީ، މިއީ ރާއްޖޭގައި މިހާތަނަށް އެންމެ މީހަކު ހުރިހާ އާޓިކަލްތަކެއް ލިޔެ ޝާއިއުކޮށްގެން ނެރޭ ފުރަތަމަ މަޖައްލާއަށް ވުމެވެ. މަޖައްލާގެ ފައުންޑަރު އަދި ލިޔުންތެރިޔާ ޔާސިރު ސާލިހަކީ ރާއްޖޭގެ ރަށްތަކާ ގުޅޭ މައުލޫމާތު ފޯރުކޮށްދޭ ވެބްސައިޓެއް ކަމަށްވާ މޯލްޑިވްސް މައި އައިލެންޑްސްގެ ވެސް ބާނީ އެވެ.
އޭނާ ލިޔާ މި އާޓިކަލްތަކުގައި ސައިންޓިފިކް ހޯދުންތަކުގެ މައުލޫމާތާއި، ދިވެހިންގެ ތަޖުރިބާތަކާއި، ދިވެހިރާއްޖޭގެ ތާރީހީ ފްލޯކް ވާހަކަތައް ވަރަށް ފުރިހަމައަށް ހިމަނާފައިވެ އެވެ.
ކިޔުންތެރިންނަށް ޝައުގުވެރިވާނެ ފަދަ ތަފާތު ފަރުމާއަކަށް ތައްޔާރުކޮށްފައިވާ މި މަޖައްލާގައި މައުލޫމާތުތައް ގެނެސްދީފައިވަނީ ކުދި ބްލޮކްތަކެއްގެ ގޮތުގަ އެވެ. މީގެ އިތުރުން މައުލޫމާތުތައް އިތުރަށް ސާފުކޮށްދިނުމަށްޓަކައި ފެންވަރު ރަނގަޅު ފޮޓޯތަކާއި އިލަސްޓްރޭޝަންތައް ބޭނުންކޮށްފައިވެ އެވެ.
މި މަޖައްލާގައި ކަނޑުއަޑީގެ މަންޒަރުތަކާއި، މަސްމަހާމެއްސާއި، ރަށްތަކުގެ ވަށައިގެން އުޅޭ ދޫނިސޫފާސުއްޕާއި، ދިވެހިންގެ އިހުގެ މަސްވެރިކަމާއި މިހާރުގެ މަސްވެރިކަމުގެ ތަފާތުތައް ތަފްސީލުކޮށް ބަޔާންކޮށްފައިވެ އެވެ.
މި މަޖައްލާއަކީ ހަމައެކަނި ރާއްޖެއަށް އަމާޒުކޮށްގެން ނެރޭ މަޖައްލާއެއް ނޫނެވެ. މިއީ ބައިނަލްއަގުވާމީ ބާޒާރުގައި ވެސް ފެތުރިގެންދާނެ އުފެއްދުމެކެވެ. އެގޮތުން އެމެރިކާ، އިނގިރޭސިވިލާތް އަދި އިންޑިއާ ފަދަ ގައުމުތަކުގައި މި މަޖައްލާ ޑިސްޓްރިބިއުޓް ކުރުމަށް ވަނީ ހަމަޖެހިފަ އެވެ. މީގެ ސަބަބުން ރާއްޖޭގެ ތިމާވެށީގެ މުއްސަނދިކަމާއި ދިވެހިންގެ އާދަކާދަތައް ބޭރުގެ ފަތުރުވެރިންނަށާއި ދިރާސާކުރާ ފަރާތްތަކަށް ފަސޭހަކަމާއެކު އެނގިގެންދާނެ ކަމަށް ބެލެވެ އެވެ.
