ސުނާމީ ބިނާ އާއި އެމްޕީއެލްއާ ދެމެދު، ބޮޑުތަކުރުފާނު މަގުގައި ބަހައްޓާފައި ހުރި ހުރިހާ އުޅަނދެއް ކުރިއަށް އޮތް ތިން ދުވަސްތެރޭގައި ނަގަން ހައުސިން މިނިސްޓްރީން އަންގައިފި އެވެ.
އެ މިނިސްޓްރީން މިއަދު ކުރި އިއުލާނެއްގައި ބުނީ، އެ ސަރަހައްދުގެ މަގު ހެދުމުގެ މަސައްކަތް ވަރަށް އަވަހަށް ފެށުމަށް ހަމަޖެހިފައިވާ ކަމަށެވެ. އެހެންކަމުން، ބޮޑުތަކުރުފާނު މަގުގެ އެ ސަރަހައްދުގައި ހުރި ހުރިހާ ތަކެއްޗެއް އޮކްޓޫބަރު 3 ގެ ރޭގަނޑު 11:00 ޖެހުމުގެ ކުރިން ނެގުމަށް އެ އިއުލާނުގައި އަންގާފައިވެ އެވެ.
"މި ތާރީހުގެ ފަހުން މަގުގައި ނުނަގައި ހުންނަ ތަކެއްޗާއި ސުނާމީ ބިނާ ސަރަހައްދުގައި އަޅާފައިވާ އުޅަނދުފަހަރުތައް މި މިނިސްޓްރީގެ ފަރާތުން ނަގާނެ ވާހަކަ ދަންނަވަމެވެ،" އެ އިއުލާނުގައި ބުންޏެވެ.
އެ ސަރަހައްދުގައި ހުރި އުޅަނދުތައް ނަގަން މިނިސްޓްރީން އަންގާފައިވާއިރު، ބޮޑުތަކުރުފާނު މަގުގެ އެމްޕީއެލް އާއި ސުނާމީ ބިނާއާ ދެމެދު އަންނަ ނޮވެމްބަރު މަހުގެ ނިޔަލަށް ނިންމާނެ ކަމަށް ރައީސް މުހައްމަދު މުއިއްޒު ވަނީ ޖުލައި 25، 2026 ގައި ވިދާޅުވެފަ އެވެ.
ބޮޑުތަކުރުފާނު މަގު ތަރައްގީކުރުމުގެ ދެން އޮތް ފިޔަވަހީގެ މަސައްކަތް ހަތަރު މަސް ދުވަހުގެ ތެރޭގައި ނިންމާލާނެ ކަމަށް މުއިއްޒު ވިދާޅުވީ އެ ދުވަހު އެކްސްގައި ކުރެއްވި ޕޯސްޓެއްގަ އެވެ. އެ ޕޯސްޓުގައި މުއިއްޒު ވަނީ މިހާރު ތަރައްގީކޮށް ނިމިފައިވާ ބައި އިތުރަށް ތަރައްގީކުރާނެ ގޮތުގެ ކޮންސެޕްޓު ހިމެނޭ ވީޑިއޯ އާއި ފޮޓޯތަކެއް ވެސް ހިއްސާކުރައްވައިފަ އެވެ.
އެ މަންޒަރުތަކުން ދައްކުވައިދެނީ މާލޭގެ އުތުރު ފަރާތުން ލޯންޗުތައް ކައިރިކުރާ ސަރަހައްދުތަކުގައި ލަކުޑި ފާލަންތަކެކެވެ. މުއިއްޒު ވިދާޅުވީ މި ފާލަންތައް ތަރައްގީކުރުމުގެ މަސައްކަތް ވެސް ނޮވެމްބަރުގެ ނިޔަލަށް ނިމޭނެ ކަމަށެވެ.
