އައްޑޫ ލިންކް ރޯޑް އަލުން ހެދުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަނުން އަތުލުމަށްފަހު އެ މަސައްކަތް ޗައިނާގެ ރޯޓައިމް އިންޖިނިއަރިން އެންޑް ޓެކްނޮލޮޖީ ކޯ ލިމިޓެޑާ ހަވާލުކުރީ 446.1 މިލިއަން ރުފިޔާއަށް ކަމަށް ހައުސިން މިނިސްޓްރީން ބުނެފި އެވެ.
ހައުސިން މިނިސްޓްރީން އަދަދު އަށް ބުނީ މި މަޝްރޫއު ރޯ ޓައިމް އިންޖިނިއަރިން އެންޑް ޓެކްނޮލޮޖީއާ ހަވާލުކުރީ 446.1 މިލިއަން ރުފިޔާއަށް އެއް އަހަރު ދުވަހުގެ ތެރޭގައި ނިންމާ ގޮތަށް ކަމަށެވެ. އެގޮތުން މަޝްރޫއުގެ މަސައްކަތް އަންނަ އަހަރުގެ ސެޕްޓެމްބަރު 24، އަށް ނިންމަން ޖެހޭނެ އެވެ.
މި މަޝްރޫއަކީ ކޮންޓްރެކްޓާ ފައިނޭންސް އުސޫލުން ހިންގާ މަޝްރޫއެއް ކަމަށްވުމުން މަޝްރޫއަށް ހިނގާ ހަރަދު ހައުސިން މިނިސްޓްރީން ޗައިނާ ކުންފުންޏަށް ދައްކަންޖެހޭނީ ތިން އަހަރު ދުވަސް ތެރޭގައި ކަމަށްވެސް ހައުސިން މިނިސްޓްރީން ބުންޏެވެ.
އައްޑޫ ލިންކް ރޯޑު ހެދުމުގެ މަޝްރޫއުގެ އަމަލީ މަސައްކަތް ލަސްވެގެން އަންނަ އޮކްޓޯބަރު މަސް ނިމުމުގެ ކުރިން ފެށޭނެ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު މިދިޔަ ހަފްތާގައި ވިދާޅުވި އެވެ.
އައްޑޫ ލިންކް ރޯޑާއި ބައެއް އެހެން މަގުތައް ހަދަން އެޕްރީލް 8، 2025، ގައި ހަވާލުކުރީ 829,792,313.63 ރުފިޔާއަށް 1440 ދުވަހުން ނިންމާ ގޮތަށެވެ. ނަމަވެސް ދެން އާރްޑީސީން ލިންކް ރޯޑުގެ މަސައްކަތުގެ ބަދަލުގައި ކުރިއަށް ގެންދާނީ އެހެން މަގުތައް ހެދުމެވެ.
އެ މަޝްރޫއުގެ ދަށުން ލިންކްރޯޑުގެ 67.58 ކިލޯމީޓަރުގެ ސީޓީބީ އަޅާފައިވާ މަގުތަކުގައި ތާރުއެޅުމާއި ފޭދޫގައި ފެންހިންދާ ނިޒާމު ގާއިމްކުރުމާއި މަގުމަތީގައި ނިޝާންތައް ހަދައި ބޯޑު ހަރުކުރަން ކުރިން އޮތީ ރާވާފަ އެވެ.
މަގު ހެދުމުގެ ބައެއް މަސައްކަތްތައް އާރްޑީސީން ކުރިއަށް ގެންދާއިރު، މި ހިނގާ ސެޕްޓެމްބަރު މަހުގެ ތެރޭގައި ސަރުކާރުން ވަނީ އާރްޑީސީ އުވާލަން ނިންމާފަ އެވެ. އާރްޑީސީ އުވާލައި އެތަން އެއްކޮށްލަން ސަރުކާރުން ނިންމާފައިވަނީ އެމްޓީސީސީއާ އެވެ.
