ހައުސިން އެންޑް ކޮންސްޓްރަކްޝަން މިނިސްޓްރީގައި އުސޫލުން ބޭރުން ހުޅުވާފައި ހުރީ ބޭރުގެ ކުންފުންޏަކަށް ރަސްމާލެ ދޫކޮށްލަން ހަދައިގެން އުޅޭ އެގްރިމެންޓު އޮތް ލޮކަރުކަން އަދަދު އަށް ޔަގީންވެއްޖެ އެވެ.
ހައުސިން މިނިސްޓްރީގެ ލޮކަރެއް އުސޫލުން ބޭރުން ހުޅުވާފައި ހުރިކަން އެނގުނީ މިދިޔަ ހުކުރު ދުވަހެވެ. ހަމަ އެ ދުވަހު ފުލުހުން ވަނީ މިނިސްޓްރީގެ އޮފީސް ހިންގާ ތަނަށް ގޮސް އެ މައްސަލަ ބަލަން ފަށައިފަ އެވެ.
އެ ދުވަހު ހުޅުވާފައި ހުއްޓާ ފެނުނީ ރަސްމާލޭގެ ކޮންޓްރެކްޓުގެ ހާޑު ކޮޕީއެއް އޮތް ލޮކަރެއް ކަމަށް އެކަމުގެ މައުލޫމާތު އެނގޭ މީހަކު ނޫހުގައި ނަން ނުޖެހުމަށް އަދި އަދަދު އާ ވާހަކަ ދައްކަވަމުން ބުންޏެވެ.
އެ މައްސަލައިގައި ފުލުހުން ނެރުނު ބަޔާނެއްގައި ބުނީ، ލޮކަރު ހުޅުވާފައި ހުރިކަމުގެ މައުލޫމާތު ލިބިގެން އެތަނަށް ގޮސް ފުލުހުންގެ ހާޒިރުގައި މުވައްޒަފުން ލޮކަރު ޗެކްކުރިއިރު، އެތަނުން އެއްޗެއް ގެއްލިފައިވާކަން ފާހަގަ ކުރެވިފައި ނުވާ ކަމަށެވެ.
ޔޫއޭއީގެ އީގަލް ހިލްސް ކުންފުންޏަށް ރަސްމާލެ ދޫކޮށްލީ 99 އަހަރަށް ކަމަށް ސަރުކާރުން ބުނި ނަމަވެސް އެގްރިމެންޓު ފަރުމާކޮށްފައި ވަނީ ދުވަހަކު ވެސް ދިވެހިންނަށް އަނބުރާ އެތަން ނުލިބޭ ގޮތަށެވެ.
ރަސްމާލެއިން ވިއްކާ އެޕާޓްމަންޓެއް ނުވަތަ ބިމުގެ ފުރަތަމަ 99 އަހަރު ހަމަނުވަނީސް ވިއްކާލައިފި ނަމަ ނުވަތަ ވާރުތައިން ދީފި ނަމަ, އަލަށް ގަންނަ މީހާއަށް ވެސް އަލުން އިތުރު 99 އަހަރަށް އެތަން ލިބޭނެ އެވެ. އެގޮތަށް ކިތަންމެ ފަހަރަކު ވެސް އެތަން ވިއްކާލެވިދާނެ އެވެ.
"މިތަނުގެ ޕްރޮޕަޓީސްތައް ކުއްޔަށް ދޭނީ ދިވެހިރާއްޖޭގެ ގާނޫނުތަކުގެ ދަށުން 99 އަހަރަށް. އެތަންތަނުގެ ހައްގުތައް ވިއްކައިގެން ނުވަތަ ވާރުތައިން ވެސް އެހެން ފަރާތަކަށް ބަދަލުކޮށްފި ނަމަ 99 އަހަރުގެ އާ ކުލީގެ މުއްދަތެއް ފެށޭނެ. މީގެ ސަބަބުން އެތަން ގަންނަ ފަރާތްތަކުގެ އަތުގައި އެތައް ޖީލަކަށް އެތަންތަން ދެމިގެންދާނެ،" ރަސްމާލެ ހޯދި އީގަލް ހިލްސް އިން ބުނެފައިވެ އެވެ.
