ރާއްޖޭގެ މަތީ ތައުލީމާއި ތަމްރީނުގެ ގާނޫނުގެ ދަށުން ރާއްޖޭގައި ޔުނިވާސިޓީތައް ރަޖިސްޓްރީކޮށް ހިންގުމުގެ ގަވާއިދު މަތީ ތައުލީމާއި ތަމްރީނުގެ ކަންކަން ބަލަހައްޓާ މިނިސްޓްރީން އެކުލަވާލައިފި އެވެ.
މި ގަވާއިދު އެކުލަވާލީ ރާއްޖޭގއި ޔުނިވާސިޓީ ރަޖިސްޓްރީކުރުމާއި، ޔުނިވާސިޓީ ހިންގުމާއި، ޔުނިވާސިޓީ އުވައިލުމާ ގުޅޭ ކަންކަމުގައި އެއް މިންގަނޑެއްގެ ދަށުން އަމަލުކުރާނެ އުސޫލުތައް ކަނޑައެޅުމާއި ޔުނިވާސިޓީގެ މިންގަނޑުތައް ކަނޑައެޅުމަށެވެ.
ރާއްޖޭގައި ޔުނިވާސިޓީއެއްގެ ގޮތުގައި ރަޖިސްޓްރީ ކުރެވޭނީ ކޮލެޖެއްގެ ގޮތުގައި މެދުނުކެނޑި 15 އަހަރު ހިންގާފައިވުން ނުވަތަ ރާއްޖެއިން ބޭރު ގައުމެއްގައި އެ ގައުމެއްގެ ސަރުކާރުން ބަލައިގަންނަ ޔުނިވާސިޓީއެއްގެ ގޮތުގައި ރަޖިސްޓްރީވެގެން ހިންގާތާ މަދުވެގެން 10 އަހަރުވެގެންނެވެ.
ކޮލެޖެއް ޔުނިވާސިޓީއަކަށް ބަދަލުވާން އެދޭއިރު ރާއްޖޭގެ ގައުމީ ސަނަދުތަކުގެ އޮނިގަނޑުގެ ލެވެލް 7 އާއި ލެވެލް 9 މަދުވެގެން ތިން ދާއިރާއަކުން ކޮލެޖެއްގެ އަމިއްލަ ޕްރޮގްރާމްތައް ނުވަތަ ބޭރުގެ ޔުނިވާސިޓީއެއްގެ ޕްރޮގްރާމް ހިންގަމުން ދިޔުން ހިމެނެ އެވެ.
ޔުނިވާސިޓީއަކަށްވުމަށް ހަމަވާންޖެހޭ ޝަރުތުތައް:
- ދިވެހިރާއްޖޭގެ ގައުމީ ސަނަދުތަކުގެ އޮނިގަނޑު ލެވެލް ހަތެއް އަދި ނުވައެއްގެ، މަދުވެގެން ތިން ދާއިރާއަކުން އެ ކޮލެޖެއްގެ އަމިއްލަ ޕްރޮގްރާމްތައް ނުވަތަ ބޭރުގެ ޔުނިވާސިޓީއެއްގެ ޕްރޮގްރާމްތައް ހިންގުން.
- އެ ކޮލެޖެއްގައި ހިންގާ ދިވެހިރާއްޖޭގެ ގައުމީ ސަނަދުތަކުގެ އޮނިގަނޑު ލެވެލް ހަތަކުން ފެށިގެން މަތީގެ ކޯސްތަކުގައި މަދުވެގެން 1،000 ދަރިވަރުން ކިޔެވަމުންދިޔުން.
- ބައިނަލްއަގްވާމީ ޔުނިވަރސިޓީ ރޭޓިންގއެއް ނުވަތަ ރޭންކިންގއެއްގައި ބައިވެރިވެ ރޭޓުކުރެވި ނުވަތަ ރޭންކުކުރެވިފައިވާ ކޮލެޖަކަށްވުން
- ބައިނަލްއަގްވާމީ ޔުވަނިވާސިޓީތައް ބައިވެރިވާ ޖަމާއަތެއްގެ މެންބަރެއްގެ ގޮތުގައާއި، ބައިނަލްއަގްވާމީ ކޮލިޓީ އެޝުއަރަންސް ޖަމާޢަތެއްގެ މެންބަރެއްގެ ގޮތުގައި މަދުވެގެން ފަސް އަހަރުދުވަސް ހޭދަކޮށްފައިވުން؛
- ބައިނަލްއަގްވާމީ ފެންވަރުގެ ރިސާޗް މަސައްކަތްތައް، ބޭރުގެ ޔުނިވާސިޓީތަކާއި، ޖަމާޢަތްތަކާއެކު ހިންގުމުގެ ތަޖުރިބާ ލިބިފައިވުން؛
- އެ ކޮލެޖެއްގެ އެކަޑެމިކް ޕްރޮގްރާމްތަކުގައި ކިޔަވައިދޭ އެކަޑެމިކް މުވައްޒަފުންގެ މަދުވެގެން 10 ޕަސަންޓަކީ ޕީއެޗްޑީ ހާސިލުކޮށްފައިވާ މުވައްޒަފުންނަށްވުން؛
މީގެއިތުރުން މި ގަވާއިދުގައި ޔުނިވާސިޓީ ރަޖިސްޓްރީ ކުރުމާއި، ޔުނިވާސިޓީގެ ގާނޫނީ ހައިސިއްޔަތާއި، ޔުނިވާސިޓީގެ ޗާޓަރާއި، ޔުނިވާސިޓީގެ މަޖިލިސް، ޔުނިވާސިޓީގެ ޕްރޮގްރާމްތައް ހިންގުމާއި، އެކަޑަމިކް ސެންޓަރާއި އެހެނިހެން ކަންކަމާ ގުޅޭގޮތުން ވަރަށް ތަފްސީލުކޮށް ބަޔާންކޮށްފައިވެ އެވެ.
ފަނަރަ އަހަރު ހިންގާފައިވާ ކޮލެޖުތައް ޔުނިވާސިޓީއަކަށް ބަދަލު ކުރެވޭ ގޮތަށް މަތީ ތައުލީމާއި ތަމްރީނާ ބެހޭ ގާނޫނަށް ރައްޔިތުންގެ މަޖިލީހުން ގެނައި އިސްލާހު ރައީސް މުހައްމަދު މުއިއްޒު ތަސްދީގުކުރެއްވީ މިދިޔަ އަހަރެވެ.
ގާނޫނަށް ގެނައި ބަދަލުން 15 އަހަރު ރާއްޖޭގައި ކޮލެޖެއްގެ ގޮތުގައި ހިންގާފައިވާ ނުވަތަ ބޭރު ގައުމެއްގެ ޔުނިވާސިޓީއެއްގެ ގޮތުގައި ހިންގަމުން އަންނަތާ 10 އަހަރުވެފައިވާ މަރުކަޒަކަށް ޔުނިވާސިޓީއެއްގެ ގޮތަށް ރާއްޖޭގައި ރަޖިސްޓްރީ ކުރެވޭނެ އެވެ. ގާނޫނުގައި ކުރިން އޮންނަ ގޮތުން ޔުނިވާސިޓީއަކަށް ބަދަލުކުރެވޭނީ މަދުވެގެން 20 އަހަރު ހިންގާފައިވާ ކޮލެޖުތަކެވެ.
