ބޭރުގެ މަހުޖަނުން ދިރިއުޅުމަށްޓަކައި ރަސްމާލޭގައި ވޯޓާފްރަންޓް އެންޑް މެރީނާއެއް ތަރައްގީކުރަން ޔޫއޭއީގެ އީގަލް ހިލްސް ކުންފުންޏަށް 500 ހެކްޓަރުގެ ބިން 99 އަހަރަށް ދިނުމަކީ ގައުމަށް ވެވޭ ބޮޑު ހިޔާނާތެއްގެ ގޮތުގައި މާލެ ސިޓީގެ މޭޔަރު އާދަމް އާޒިމް ސިފަކުރައްވައިފި އެވެ.
ރަސްމާލެ ތަރައްގީ ކުރަން ނިންމާފައި ވަނީ ފަތުރުވެރިކަމުގެ މަންޒިލެއްގެ ގޮތުގަ އެވެ. އެތަން ތަރައްގީ ކުރަނީ ބިދޭސީންނަށް އެތަނުގައި ދިގު މުއްދަތަކަށް ދިރިއުޅެވޭނެ ގޮތަށެވެ. ރަސްމާލޭގައި ބިނާ ކުރާ އެޕާޓްމަންޓުތަކާއި ވިލާތައް ބިދޭސީންނަށް ވިއްކަން އީގަލް ހިލްސް އިން މިހާރު ވެސް ވަނީ ހުޅުވާލައިފަ އެވެ.
"ރަސްމާލެއިން ބޮޑު ބިމެއް ބޭރު ބަޔަކަށް ދޫކޮށްލީ ހަގީގަތުގައި ކުއްޔަކަށް ނޫން. ދިވެހި ރައްޔިތުންނަށް އެ ބިން ދުވަހަކުވެސް އަނބުރާ ނުލިބޭނެ ފަދަ ގޮތަކަށް އެއްބަސްވުމުގައި މާއްދާތައް ހިމަނައި، ހަމައެކަނި އެއްބަސްވުމުގެ ބޭރުގަނޑުގައި "ކުއްޔަށް ދިން އެއްބަސްވުން" ޖަހާލުމަކުން އެއީ ކުލީ އެއްބަސްވުމަކަށް ނުވާނެ،" އާޒިމް އެކްސްގައި ލިޔުއްވި އެވެ.
އެއީ ރައްޔިތުންގެ ލޮލުގައި އަނދުން އެޅުވުމަށް ސަރުކާރުން ދައްކަމުންދާ ބަހަނާތަކެއް ކަމަށް އާޒިމް ވިދާޅުވި އެވެ. އެ އެއްބަސްވުން ވަގުތުން ވަގުތަށް ބާތިލުކުރުމަށް އޭނާ ގޮވާލެއްވި އެވެ.
"މި އެއްބަސްވުމަކީ ދިވެހިރާއްޖޭގެ މިހާރުގެ ޖީލަށާއި، އަންނަން އޮތް މާދަމާގެ ޖީލުތަކަށް ވެވޭ ވަރަށް ބޮޑު ހިޔާނާތެއް، ދިވެހި ފަސްގަނޑާއި، ދިވެހިންގެ މުސްތަގުބަލު ބޭރުގެ ފަރާތްތަކަށް މިލްކުވާ ގޮތަށް ހަދާފައިވާ މި ނުރައްކާތެރި އެއްބަސްވުން ވަގުތުން ވަގުތަށް ބާތިލްކުރަންޖެހޭ،" އާޒިމް ވިދާޅުވި އެވެ.
ބިމަށް އަގެއް، ކުއްޔެއް ނުނަގާ ގޮތަށް ރަސްމާލެއިން 500 ހެކްޓަރު ދޫކޮށްލާތީ ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.
