ރަސްމާލޭ ވޯޓާފްރަންޓް އެންޑް މެރީނާ މަޝްރޫއު ހިންގަން ޔޫއޭއީގެ އީގަލް ހިލްސް ކުންފުންޏަށް 500 ހެކްޓަރުގެ ބިން ދީގެން ގައުމުގެ އަމާންކަމާއި އިސްތިގުލާލު ގެއްލުމުގެ ކުރިން އެކަމާ ދެކޮޅު ހަދަންޖެހޭ ކަމަށް ޝެއިހް ފަޒްލޫން މުހައްމަދު ވިދާޅުވެއްޖެ އެވެ.
ފަޒްލޫން އެކްސް ގައި ވިދާޅުވީ މި މަޝްރޫއަކީ އީގަލް ހިލްސްގެ ވެރިޔާގެ އެކުވެރި ޒަޔަނިސްޓުންނަށްވެސް ރާއްޖޭގެ އިމާރާތްތައް ވިއްކައި އެ އިމާރާތްތައް ޒަޔަނިސްޓުންގެ ޖީލުތަކަށް ލިބޭ ގޮތަށް ފަރުމާކޮށް، ރާއްޖޭގައި ޒަޔަނިސްޓުން ވަޒަންކުރެވޭނެ ފަދައިން ހިންގޭ އަޑި ނޭނގޭ އަނދިރި ޖަރީމާއެއް ކަމަށެވެ.
"މިއީ އީގަލް ހިލްސްގެ ވެރިޔާގެ އެކުވެރި ޒަޔަނިސްޓުނައްވެސް ދިވެހިރާއްޖޭގެ އިމާރާތްތައް ވިއްކައި އެ އިމާރާތްތައް ޒަޔަނިސްޓުންގެ ޖީލުތަކަކަށް ލިބޭގޮތައް ފަރުމާކޮށް، ދިވެހި ރާއްޖޭގައި ޒަޔަނިސްޓުން ވަޒަންވެރިކުރެވޭނެ ފަދައިން ހިންގޭ އަޑި ނޭގޭ އަނދިރި ޖަރީމާއެއް. މިއަދު މިކަމާ ދެކޮޅު ނަހަދައިފިނަމަ މާދަމާ ހިތާމަކުރަންޖެހޭނެ. ގައުމުގެ އަމްނާ އަމާންކަމާ އިސްތިގުލާލު ގެއްލިގެން ދިއުމުގެ ކުރިން މިކަމާ ދެކޮޅުހަދަންޖެހޭ،" އޭނާ ވިދާޅުވި އެވެ.
ފަޒްލޫން ވިދާޅުވީ މުޅި މަޝްރޫއުގެ އެއްބަސްވުމުގެ މައުލޫމާތާއި ވަށައިގެންވާ ކަންކަމަށް ބަލާއިރު ފެންނަނީ ބޮޑެތި ކަންބޮޑުވުންތައް ކަމަށެވެ. އޭނާ ވިދާޅުވީ އީގަލް ހިލްސްގެ ވެބްސައިޓުގައިވާގޮތުން އެތަން ދެނީ 99 އަހަރުގެ މުއްދަތަކަށް އަދި އެތަނުގެ ޕުރޮޕަޓީއެއްގެ ވެރިފަރާތް ބަދަލުވާ ކޮންމެ ފަހަރަކު އާ ވެރިފަރާތަށް 99 އަހަރަށް އެތަން ލިބޭ ގޮތަށް ކަމަށެވެ.
"98 ވަނަ އަހަރު ވާރުތައިގެ ގޮތުން ނުވަތަ ގަނެގެންވިޔަސް އާ ވެރިޔަކަށް އެ ޕޮރޮޕަޓީ ލިބިއްޖެނަމަ އެތަން އެމީހަކަށް އިތުރު 99 އަހަރަށް ލިބޭ ގޮތަށް. އެމީހުންގެ ވެބްސައިޓުގައިވާގޮތުންނަމަ މިއީ ނިމުމެއް ނެތި ކުރިއަށްދާނޭ ސިލްސިލާއެއް،" އޭނާ ވިދާޅުވި އެވެ.
ރަސްމާލެ ތަރައްގީ ކުރަން ނިންމާފައި ވަނީ ފަތުރުވެރިކަމުގެ މަންޒިލެއްގެ ގޮތުގަ އެވެ. އެތަން ތަރައްގީ ކުރަނީ ބިދޭސީންނަށް އެތަނުގައި ދިގު މުއްދަތަކަށް ދިރިއުޅެވޭނެ ގޮތަށެވެ. ރަސްމާލޭގައި ބިނާ ކުރާ އެޕާޓްމަންޓުތަކާއި ވިލާތައް ބިދޭސީންނަށް ވިއްކަން އީގަލް ހިލްސް އިން މިހާރު ވެސް ވަނީ ހުޅުވާލައިފަ އެވެ.
ރަސްމާލޭގައި ދިރިއުޅޭ މީހުންނަށް ހިދުމަތް ދޭން ހޮސްޕިޓަލަކާއި ސްކޫލަކާއި މުނިފޫހިފިލުވައިދޭ ތަންތަން ވެސް ބިނާ ކުރާނެ އެވެ. އެތަނުގައި ހިދުމަތް ދޭނީ ހަލާލު ޓޫރިޒަމުގެ މޮޑަލަށް ކަމެއް އަދި ނޭނގެ އެވެ. ސަރުކާރުން އެކަން އަދި ހާމައެއް ނުކުރެ އެވެ.
ސަރުކާރުން އަންދާޒާ ކުރަނީ، ކުރިއަށް އޮތް 10 އަހަރު ދުވަހުގެ ތެރޭގައި މި ޕްރޮޖެކްޓުގެ ހުރިހާ މަރުހަލާއެއް ނިމި ފުރިހަމަ ވުމުން، ރަސްމާލެއަށް އެކަނި އެއް މިލިއަން ޓޫރިސްޓުން އަންނާނެ ކަަމަށެވެ.
މީގެއިތުރުން މި ޕްރޮޖެކްޓުގެ ދަށުން ތަންތަަން ތަރައްގީކުރުމުގެ މަރުހަލާގެ ތެރޭގައި ދައުލަތަށް 11 ބިލިއަން ޑޮލަރު ވަންނާނެ ކަމަށެވެ. އޭގެ އިތުރުން، 54000 ވަޒީފާ އުފެދިގެން ދާނެ ކަމަށް ވެސް ސަރުކާރުން ވަނީ ބުނެފަ އެވެ.
