އދ. ގެ އެންމެ ބާރު ގަދަ ގުނަވަންތަކުގެ ތެރޭގައި ހިމެނޭ ސަލާމަތީ މަޖިލީހުން ތަރައްގީވަމުން އަންނަ ކުދި ޖަޒީރާ ގައުމުތަކަށް (ސިޑްސް) ދާއިމީ އަދި ވަގުތީ ޖާގަތައް ދީ، އދ. ގެ ކަންކަން އިސްލާހުކުރަން އެ ޖަމިއްޔާގެ އަހަރީ އާންމު ބައްދަލުވުމުގައި ދިވެހިރާއްޖެއިން ގޮވާލައިފި އެވެ.
މި ބައްދަލުވުމުގައި ރާއްޖޭގެ ފަރާތުން ތަގުރީރުކުރައްވަމުން ނައިބު ރައީސް ހުސެއިން މުހައްމަދު ލަތީފު ވަނީ މެންބަރު ގައުމުތަކާ ގާތުން މަސައްކަތް ކުރަން ޖެހޭ ކަމަށް ވިދާޅުވެފަ އެވެ. އަދި، އިސްލާހުކުރުމުގެ މަސައްކަތް ކުރާއިރު، ހުރިހާ މެންބަރުން ބައިވެރިކޮށްގެން، ދެ ފުށް ފެންނަ ގޮތަކަށް އިސްލާހީ މަސައްކަތްތައް ބައްޓަން ކުރަން ގޮވާލައްވާފަ އެވެ.
އެ ގޮތުން މި އިސްލާހުތައް ގެންނައިރު، އޭނާ ވިދާޅުވީ، އދ. ގެ އެންމެ ދުވަސްވީ ބަލިކަށިކަން ކަމުގައިވާ ތަމްސީލުކުރުމުގައި މެންބަރުންގެ ހަމަހަމަކަމެއް ނެތުމާ ކުރިމަތިލާން ޖެހޭ ކަަމަށެވެ. އަދި، އޭގެ ތެރެއިން ކުދި ޖަޒީރާ ގައުމުތަކަށް ސަލާމަތީ މަޖިލީހުން ގޮނޑިތައް ދޭން ޖެހޭ ކަމަށް އޭނާ ވިދާޅުވި އެވެ.
"އަދުގެ ދުނިޔެއާ މެދު ގޮތެއް ނިންމާއިރު 1945 ވަނަ އަހަރުގައި ދުނިޔެއަށް އޮތް ހާލަތަށް ރިއާޔަތްކޮށްގެން ސަލާމަތީ މަޖިލީހަކަށް ކަންކަން ނުނިންމޭނެ. ދާއިމީ އަދި ވަގުތީ ކެޓެގަރީން ވެސް ފޫޅާކުރަން ޖެހޭ. ސިޑްސްގެ މެދުގައި ދައުރުވާ ގޮނޑިއެއް ހުންނަން ޖެހޭ،" އިނގިރޭސި ބަހުން ދެއްވި ތަގުރީރުގައި ނައިބު ރައީސް ވިދާޅުވި އެވެ.
ރާއްޖޭން ވަނީ ކުދި ދައުލަތްތަކުގެ އިތުރުން ގިނަ އަހަރުތަކެއް ވަންދެން އެފްރިކާ ބައްރުގެ ގައުމުތަކަށް އިންކާރުކޮށްފައިވާ ތަމްސީލު ލިބި ދިނުމަށް ވެސް ގޮވާލާފަ އެވެ. އޭގެ އިތުރުން ވީޓޯއާ ދެކޮޅަށް ވަކާލާތުކޮށް، އެ ބާރު އުވާލަން ވެސް ރާއްޖޭން ވަނީ ގޮވާލާފަ އެވެ.
ހުސެއިން މުހައްމަދު ލަތީފުގެ ތަގުރީރުގައި އޭނާ ވަނީ މޫސުމާއި، މާލިއްޔަތާއި، ވިޔަފާރީގެ އިތުރުން ސަޕްލައި ޗޭން އާއި، ސަލާމަތާ ގުޅިފައިވާ މިންވަރު ކުދި ދައުލަތްތަކަށް ވިސްނޭ ކަމަށް ވިދާޅުވެފަ އެވެ. އަދި، ކުދި ގައުމުތަކަށް ނުހަމަ ބާރުތަކުން އެންމެ ވަރުގަދަ ރައްކާތެރިކަމެއް ފޯރުކޮށްދެނީ ބައިނަލްއަގުވާމީ ގާނޫނުތައް ކަމަށް ވެސް އޭނާ ވިދާޅުވި އެވެ.
ނައިބު ރައީސް ވަނީ 2033 އިން 2034 އަށް ސަލާމަތީ މަޖިލީހުގެ ގޮނޑިއެއް ހޯދަން ރާއްޖޭން ކުރާ މަސައްކަތަށް އެހެން މެންބަރު ގައުމުތަކުގެ ތާއީދަށް ވެސް އެދިވަޑައިގެންފަ އެވެ.
