އެފްރިކާ ބައްރުގެ ހަގީގީ ބޮޑުމިން ދައްކުވައިދޭ އާ ދުނިޔޭގެ ޗާޓެއް ބޭނުންކުރުމަށް އދ.ގެ އާންމު މަޖިލީހުން ތާރީހީ ނިންމުމެއް ނިންމައިފި އެވެ.
ޓޯގޯއިން ހުށަހަޅައި އެފްރިކާ އިއްތިހާދުގެ ގައުމުތަކުން ތާއީދުކުރި މި ގަރާރު ފާސްވީ 164 ގައުމެއްގެ ވޯޓާއެކުގަ އެވެ. މި ގަރާރާ ދެކޮޅަށް ވޯޓުދިން ހަމައެކަނި ގައުމަކީ އެމެރިކާއެވެ. އަދި ހަ ގައުމަކުން ވަކި ފަރާތަކަށް ނުޖެހުމަށްޓަކައި ވޯޓުގައި ބައިވެރިނުވެ އެވެ.
މިހާތަނަށް ދުނިޔޭގައި އާންމުކޮށް ބޭނުންކުރަމުން އައި މާކޭޓާ ޕްރޮޖެކްޝަން ޗާޓަކީ 1569 ވަނަ އަހަރު ޔޫރަޕުގެ ދަތުރުވެރިންނަށް މަގުދެއްކުމަށް ތައްޔާރުކުރި ޗާޓެކެވެ. ނަމަވެސް މި ޗާޓުގައި އެފްރިކާގެ ބޮޑުމިން ދައްކުވައިދެނީ ގްރީންލޭންޑާ އެއްވަރުގެ ސަރަހައްދެއްގެ ގޮތުގައެވެ. ހަގީގަތުގައި އެފްރިކާއަކީ ގްރީންލޭންޑަށްވުރެ 14 ގުނަ ބޮޑު ބައްރެކެވެ. އދ.ގެ މި ނިންމުމަކީ ގާނޫނީ ގޮތުން މަޖުބޫރު ނިންމުމެއް ނޫން ނަމަވެސް، މީގެ ސަބަބުން ދުނިޔޭގެ އެކި މުއައްސަސާތަކުން ބޭނުންކުރާ ޗާޓުތަކަށް ބޮޑެތި ބަދަލުތަކެއް އަންނާނެއެވެ.
އާންމުކޮށް ބޭނުންކުރާ މާކޭޓާ ޗާޓަކީ ދުނިޔޭގެ ބައްރުތަކުގެ ބައްޓަން ސީދާ ކަރުދާހަކަށް ތިރިކުރުމުގައި ދިމާވާ ދަތިތަކުގެ ސަބަބުން، ދުނިޔޭގެ މެދުތެރޭގައި ހުންނަ ގައުމުތައް ކުޑަކޮށް އަދި ދެކޮޅުގައި ހުންނަ ގައުމުތައް ބޮޑުކޮށް ދައްކުވައިދޭ ޗާޓެކެވެ. މީގެ ސަބަބުން އެފްރިކާ ފަދަ ބޮޑެތި ބައްރުތަކުގެ ތަރައްގީގެ ބޭނުންތަކާއި އެ ގައުމުތަކުގެ މުހިންމުކަން ދުނިޔޭގެ ކުރިމަތީގައި ކުޑަވެގެންދާ ކަމަށް ފާޑުކިޔާ ފަރާތްތަކުން ބުނެއެވެ.
މި ބަދަލު ގެނައުމަށް މަސައްކަތްކުރާ ކެމްޕޭން ގްރޫޕްތަކުން ބުނާ ގޮތުގައި، އެފްރިކާގެ ބޮޑުމިނަށް ބަލާއިރު އެމެރިކާ، ޗައިނާ، އިންޑިއާ، ޖަޕާން، މެކްސިކޯ އަދި ޔޫރަޕުގެ ބޮޑު ބައެއް އެ ބައްރުގެ ތެރެއަށް ފައްތާލުމަށްފަހުވެސް ބިން އިތުރުވާނެ އެވެ.
ޓޯގޯގެ ފޮރިން މިނިސްޓަރު ރޮބަޓް ޑޫސޭ ވިދާޅުވީ އިންސާފުވެރި ދުނިޔެއެއް ފެށެނީ އިންސާފުވެރި ޗާޓަކުން ކަމަށެވެ. އަދި ޗާޓަކީ ހަމައެކަނި ކުރެހުމެއް ނޫން ކަމަށާއި، އެއީ ދުނިޔޭގެ ގައުމުތަކާއި މީސްތަކުންނާ މެދު މީހުން ދެކޭގޮތް ބަދަލުކޮށްދޭ ވަސީލަތެއް ކަމަށް އޭނާ ވިދާޅުވިއެވެ.
ފްރާންސުން ވެސް ވަނީ މި ބަދަލަށް ތާއީދުކޮށް، އެ ގައުމުގެ ވުޒާރާތަކުން މާކޭޓާ ޗާޓު ބޭނުންކުރުން ހުއްޓާލާނެ ކަމަށް ބުނެފައެވެ. ނަމަވެސް އެމެރިކާއިން ވަނީ މި ގަރާރަށް ވަރަށް ބޮޑަށް ފާޑުކިޔާފައެވެ. އދ.ގައި ހުންނަވާ އެމެރިކާގެ މަންދޫބު ވިދާޅުވީ ދުނިޔޭގެ ސުލްހައާއި ތަރައްގީގެ މުހިންމު މައްސަލަތަކަށް މަޝްވަރާ ކުރުމުގެ ބަދަލުގައި، 16 ވަނަ ގަރުނުގެ ޗާޓުތަކާ ބެހޭގޮތުން ބަހުސްކުރުމަކީ އދގެ މަގްސަދާ ހިލާފު ކަމެއް ކަމަށެވެ.
އާ ޗާޓެއްގެ ގޮތުގައި ބޭނުންކުރުމަށް ނިންމާފައިވަނީ 2018 ވަނަ އަހަރު ތައްޔާރުކުރި އީކުއަލް އާާތު ޕްރޮޖެކްޝަން ޗާޓެވެ. މި ޗާޓުގައި ދުނިޔޭގެ ހުރިހާ ބައްރުތަކެއްގެ ބޮޑުމިން ހަގީގީ މިންގަނޑުން ދައްކުވައިދެއެވެ. ކެންޔާގެ ޖިއޮގްރަފީ މާހިރެއް ކަމަށްވާ ކިއޯކޯ މުއެންޑޯ ބީބީސީއަށް މައުލޫމާތު ދެމުން ވިދާޅުވީ، ޗާޓުތަކަކީ ހަމައެކަނި ދަތުރުވެރިންނަށް އޮންނަ މަގުދައްކާ އެއްޗެއް ނޫން ކަމަށާއި، އެއީ ސިޔާސީ އަދި އިގްތިސާދީ ގޮތުން ސަރަހައްދުތަކާ މެދު ދެކޭގޮތް ބައްޓަންކުރާ އެއްޗެއް ކަމަށެވެ. އެފްރިކާގެ ވަސީލަތްތަކާއި އިންވެސްޓްމަންޓްގެ ފުރުސަތުތައް ދުނިޔެއަށް ކުޑަކޮށް ފެންނަނީ މިފަދަ ނުބައި ޗާޓުތަކުގެ ސަބަބުން ކަމަށްވެސް އޭނާ ފާހަގަކުރެއްވި އެވެ.
