އެމެރިކާގެ މަޝްހޫރު ހުނަރު ދައްކާލުމުގެ މުބާރާތް ކަމަށްވާ "އެމެރިކާސް ގޮޓް ޓެލެންޓް" ގެ އެންމެ ފަހުގެ ސީޒަން، އުމުރުން 16 އަހަރުގެ ރޮކް ލަވަކިޔުންތެރިޔާ ނީނީ ރޯޔަލް ކާމިޔާބުކޮށްފި އެވެ.
މިއީ މި ޝޯގެ ދިގު ތާރީހުގައި ތައިލެންޑަށް ނިސްބަތްވާ ފަރާތަކުން މި މުބާރާތް ކާމިޔާބުކުރި ފުރަތަމަ ފަހަރެވެ.
ކެލިފޯނިއާގައި މިދިޔަ އަންގާރަ ދުވަހު ބޭއްވި މި މުބާރާތުގެ ފައިނަލްގައި، އަސްލު ނަމުން ނަމަ ރަޓިކާން އަމްލޯއީ (ނީނީ) ހުށަހަޅައިދިނީ އެމެރިކާގެ ރޮކް ބޭންޑެއް ކަމަށްވާ "ދަ ވައިޓް ސްޓްރައިޕްސް" ގެ މަޝްހޫރު ލަވަ "ސެވަން ނޭޝަން އާމީ" އެވެ.
ނީނީގެ ހެވީ މެޓަލް ހުށަހެޅުންތަކުން އޭނާ ވަނީ ފައިނަލްގައި ވާދަކުރި އެހެން ނުވަ ބައިވެރިންގެ މައްޗަށް ކުރިހޯދާފަ އެވެ. އޭގެ ތެރޭގައި ޖާދޫ ހަދާ މީހުންނާއި، ތަމްރީނުކޮށްފައިވާ ކުއްތާތަކުގެ ހުށަހެޅުންތަކުގެ އިތުރުން ރޮބޮޓް ޑާންސް ކުރޫއެއް ވެސް ހިމެނެ އެވެ.
ނީނީގެ މި ކާމިޔާބީއާ ގުޅިގެން ތައިލެންޑުގެ ގިނަ ބަޔަކު އަންނަނީ އުފާ ފާޅުކުރަމުންނެވެ. ބައެއް މީހުން ބުނާ ގޮތުގައި ދުނިޔޭގެ އެންމެ ބޮޑު އެއް ސްޓޭޖުގައި އޭނާ ހޯދި މި ކާމިޔާބީއަކީ މުޅި ގައުމަށް ލިބުނު ފަހުރެކެވެ. ތައިލެންޑް ސަރުކާރުން ވަނީ ނީނީއަކީ "ބޮޑެތި ހުވަފެންތައް ދެކެން ކެރޭ ކޮންމެ މީހަކަށް ހުރި ނަމޫނާއެއް" ކަމަށް ސިފަކޮށްފަ އެވެ.
މި މުބާރާތުގެ ކުރީކޮޅު ނީނީ ވަނީ ގިނަ ބައެއްގެ މަގުބޫލުކަން ހޯދާފަ އެވެ. އެގޮތުން އޭނާގެ އޮޑިޝަންގައި "ދަ ކްރޭންބެރީސް" ބޭންޑުގެ "ޒޮމްބީ" ލަވަ ހުށަހަޅައިދިން ވީޑިއޯއިން ފަނޑިޔާރުން ހައިރާންކޮށްލިއިރު، އެ ވީޑިއޯއަށް މިހާތަނަށް 20 މިލިއަނަށް ވުރެ ގިނަ ވިއުސް ވަނީ ލިބިފަ އެވެ.
ބުދަ ދުވަހުގެ ރޭ ނަތީޖާ އިއުލާން ކުރުމުގެ ކުރިން، ނީނީ ވަނީ މަޝްހޫރު ބޭންޑް "ލިންކިން ޕާކް" އާއެކު ސްޓޭޖަށް އަރައި، އެ ބޭންޑުގެ 2024 ވަނަ އަހަރުގެ ރޮކް ލަވަ "ދަ އެމްޕްޓިނަސް މެޝިން" ހުށަހަޅައިދީފަ އެވެ.
އެ ރޭގެ ފަހުގެ ވަގުތެއްގައި، މި ޝޯގެ 21 ވަނަ ސީޒަންގެ ޗެމްޕިއަންކަން ނީނީއަށް ލިބުނުކަން އިއުލާން ކުރުމާއެކު، އޭނާއަށް އުފަލުން ރޮވުނެވެ. މި ކާމިޔާބީއާއެކު އިނާމެއްގެ ގޮތުގައި އޭނާއަށް އެއް މިލިއަން އެމެރިކާ ޑޮލަރު ލިބޭނެ އެވެ.
ނީނީ ބުނި ގޮތުގައި އޭނާ ގިޓާ ކުޅެން ފެށީ އުމުރުން އެންމެ ހަތް އަހަރުގަ އެވެ. އަދި އޭނާގެ ހުވަފެނަކީ ދުނިޔޭގެ އެކި ކަންކޮޅުތަކުގައި މިއުޒިކް ހުށަހަޅައިދޭ ފަންނާނަކަށް ވުމެވެ.
ތައިލެންޑުގެ ފަތުރުވެރިކަމުގެ މަރުކަޒެއް ކަމަށްވާ ފޫކެޓަށް ނިސްބަތްވާ ނީނީއަކީ، އެ ރަށުގެ "ނާކާ ވީކެންޑް މާކެޓް" ސަރަހައްދުގައި މީގެ ކުރިން މިއުޒިކް ކުޅެ އުޅުނު ކުއްޖެކެވެ.
ނީނީގެ ކާމިޔާބީއާ ގުޅިގެން ނާކާ ވީކެންޑް މާކެޓްގެ ފޭސްބުކް ޕޭޖުން ވަނީ އޭނާއަށް މަރުހަބާ ކިޔާފަ އެވެ.
ނީނީ ތައުލީމު ހާސިލުކުރަމުންދާ ފޫކެޓްގެ ކަޖޮންކިއެޓް އިންޓަނޭޝަނަލް ސްކޫލުން ވެސް ވަނީ އޭނާ ހޯދި މި ބޮޑު ކާމިޔާބީއަށް މަރުހަބާ ކިޔާފަ އެވެ.
