އެމެރިކާގެ ޓެކްސަަސްއަށް ނިސްބަތްވާ ރެޕް ލަވަކިޔުންތެރިޔާ ބިގް އެކްސް ދަ ޕްލަގް، މަސްތުގެ ހާލަތުގައި އިނދެ އުޅަނދު ދުއްވުމާއި، މަސްތުވާތަކެތީގެ ބާވަތެއް ކަމަށްވާ މަރުއާނާ ގެންގުޅުމުގެ އިތުރުން މަނާ ހަތިޔާރެއް ގެންގުޅުނު ކަމުގެ ތުހުމަތުގައި ހައްޔަރުކޮށްފި އެވެ.
އަސްލު ނަމުން ނަމަ ޒޭވިއާ ލެންޑަމް، އުމުރުން 28 އަހަރުގެ މި ފަންނާނު މިދިޔަ ހުކުރު ދުވަހު ފުލުހުން ހުއްޓުވިކަން އެލަން ކައުންޓީ ފުލުހުން ވަނީ ކަށަވަރުކޮށްދީފަ އެވެ. އޭނާ ކޮލިން ކައުންޓީ ޖަލުގައި ބަންދުކުރުމަށްފަހު، މިހާރު ވަނީ ދޫކޮށްލާފަ އެވެ.
މީގެ އިތުރުން، މީގެ އަހަރެއްހާ ދުވަސް ކުރިންވެސް މިފަދަ މައްސަލައެއްގައި އޭނާ ހައްޔަރުކޮށްފައިވާއިރު، މިހާރުވެސް އޭނާ ހުރީ އެ މައްސަލައިގެ ކަފާލާތުގެ ދަށުން ދޫކޮށްލާފަ އެވެ.
ސަަަދަން ހިޕް-ހޮޕް، ޓްރެޕް އަދި ކަންޓްރީ-ރެޕް މިއުޒިކް ކުޅޭ މި ފަންނާނު މަގުބޫލުވެފައިވަނީ އޭނާގެ "ޓެކްސަސް"، "ދަ ލާޖެސްޓް" އަދި "މްމްމްހްމްމް" ފަދަ ވައިރަލްވި ސިންގަލް ލަވަތަކުންނެވެ.
އޭނާ ވަރަށް އަވަހަށް އާ މިއުޒިކް ރިލީޒް ކުރާނެ ކަމަށް ދާދި ފަހުން އިންސްޓަގްރާމްގައި ހާމަކޮށްފައިވާއިރު، މިދިޔަ ހުކުރު ދުވަހު ބޭއްވި "ކަންޓްރީ ރައިޒިން" ފެސްޓިވަލްގައި ޕާފޯމް ކުރުމަށް ވެސް އޮތީ ތާވަލުކޮށްފަ އެވެ.
ނަމަވެސް، އެ ފެސްޓިވަލް އިންތިޒާމުކުރި ފަރާތްތަކުން އިންސްޓަގްރާމްގައި ކުރި ޕޯސްޓެއްގައި ބުނެފައިވަނީ، "ޒާތީ ކުއްލި ކަމެއް" ދިމާވުމުގެ ސަބަބުން ބިގް އެކްސް ދަ ޕްލަގް އެ ފެސްޓިވަލްގައި ޕާފޯމް ނުކުރާނެ ކަމަށެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، ހޮނިހިރު ދުވަހު އިއޯވާ ސްޓޭޓް ފެއާގައި ތާވަލާ އެއްގޮތަށް އޭނާ ވަނީ ޕާފޯމްކޮށްފަ އެވެ. ޝޯ ފަށަމުން އޭނާ ބުނެފައިވަނީ "އަހަރެން އަންނާނެ ކަމަށް އެމީހުން ހީއެއް ނުކުރޭ" މިހެންނެވެ.
މިދިޔަ އަހަރުގެ އޮގަސްޓް މަހުވެސް، ހުއްދަނެތި ހަތިޔާރު ގެންގުޅުމާއި މަދު މިންވަރެއްގެ މަރުއާނާ ގެންގުޅުނު ކަމުގެ ތުހުމަތުގައި އޭނާ ހައްޔަރުކުރި އެވެ. އެ މައްސަލައިގެ ޝަރީއަތް އަދިވެސް ދަނީ ކުރިއަށެވެ.
