ކޭ-ޕޮޕް ތަރި ލީސާގެ އާ ޑޮކިއުމެންޓްރީ "އޯލްވޭޒް ލަލީސާ" ޕްރިމިއާ ކުރުމަށް ޓޮރޮންޓޯ އިންޓަނޭޝަނަލް ފިލްމު ފެސްޓިވަލްގެ ރެޑް ކާޕެޓަށް އޭނާ ހާޒިރުވުމުން، އެ ސަރަހައްދަށް އެއްވެ ތިބި ސަޕޯޓަރުންގެ ގަދަ އަޑުފަށްގަނޑުން އޭނާއަށް މަރުހަބާ ކިޔައިފި އެވެ.
ކޭ-ޕޮޕް ގާލް ގްރޫޕް "ބްލެކްޕިންކް" ގެ މެންބަރެއްގެ ގޮތުގައި މަޝްހޫރުކަން ހޯދި ލީސާ، އެ ބޭންޑުން ބްރޭކެއް ނަގައި ސޯލޯ ކެރިއަރެއް ފެށުމަށްފަހު އޭނާގެ ހަޔާތުން ވޭތުވި އެއް އަހަރު ދުވަހުގެ މައްޗަށް މި ފިލްމުގައި އަލިއަޅުވާލާފައިވެ އެވެ.
ހުކުރު ދުވަހު ބޭއްވި ޕްރިމިއާ އަށް ފަހު ރޮއިޓާސް އަށް ދިން އިންޓަވިއުއެއްގައި ލީސާ ބުނީ، އޭނާ މަސައްކަތް ކުރީ އާ ކަންތައްތަކެއް ހޯދުމަށް ކަމަށާއި، މިހާރު ކުރާ ކަންކަމަށް ވުރެ އިތުރަށް ކުރެވޭނީ ކޮން ކަމެއްތޯ ބަލަމުންދާ ކަމަށެވެ.
އަސްލު ނަމުން ނަމަ ލަލީސާ މަނޯބަލް ބުނި ގޮތުގައި، ފުރަތަމަ އޭނާ ހީކުރީ އެއް އަހަރު ދުވަހަކީ ފުދޭވަރުގެ ދިގު މުއްދަތެއް ކަމަށެވެ. ނަމަވެސް އޭނާ އެންމެ ލޯބިވާ ކަންކަމާއި އޭނާގެ ކުރިއަށް އޮތް ގޮންޖެހުންތަކަކީ ކޮބައިކަން ހޯދުމަށް އަދިވެސް މަސައްކަތް ކުރަމުންދާ ކަމަށް އޭނާ ބުންޏެވެ.
"އޯލްވޭޒް ލަލީސާ" ގައި 2024 އާއި 2025 އާ ދެމެދު އޭނާ ހޯދި ކާމިޔާބީތަކާއި ކުރިމަތިވި ހުރަސްތައް ދައްކުވައިދެ އެވެ. އޭގެ ތެރޭގައި އޭނާގެ ފުރަތަމަ ސޯލޯ އަލްބަމް "އަލްޓާ އީގޯ" ނެރުމާއި، އެޗްބީއޯގެ މަގުބޫލު ސިލްސިލާ "ދަ ވައިޓް ލޯޓަސް" އިން އެކްޓިންގެ ދާއިރާއަށް ތައާރަފްވުމުގެ އިތުރުން، ކޮޗެއްލާ މިއުޒިކް ފެސްޓިވަލްގައި ގިނަ އަދަދެއްގެ ބައެއްގެ ކުރިމަތީގައި އެކަނި ޕާފޯމް ކުރުމަށް އޭނާ ވި ތައްޔާރީތައް ހިމެނެ އެވެ.
މި ޑޮކިއުމެންޓްރީ ޑައިރެކްޓްކޮށްފައިވަނީ އެޕަލް ޓީވީން 2024 ވަނަ އަހަރު ގެނެސްދިން "ކޭ-ޕޮޕް އައިޑޮލްސް" ޑޮކިއުމެންޓްރީ ސިލްސިލާގެ އެގްޒެކެޓިވް ޕްރޮޑިއުސަރު ސޫ ކިމް އެވެ.
ލީސާ އަލުން ބޭންޑާ ގުޅުނު ފަހުން، ތިން އަހަރަށް ވުރެ ގިނަ ދުވަހުގެ މެދުކެނޑުމަކަށް ފަހު "ބްލެކްޕިންކް" އިން ވަނީ މިދިޔަ ފެބްރުއަރީ މަހު "ޑެޑްލައިން" ގެ ނަމުގައި މިނީ އަލްބަމެއް ނެރެފަ އެވެ.
"އޯލްވޭޒް ލަލީސާ" ސިނަމާތަކުގައި އަޅުވަން ފަށާނީ އަންނަ އޮކްޓޯބަރު މަހުގެ 12 ވަނަ ދުވަހު އެވެ.
