ރެޕް މިއުޒިކްގެ ލެޖެންޑް ޓޫޕާކް ޝަކޫރު، ލަސްވޭގަސް ސްޓްރިޕް ކައިރިން ބަޑިޖަހައި މަރާލިތާ ގާތްގަނޑަކަށް 30 އަހަރު ފަހުން، އެކަން ރޭވުމުގެ ތުހުމަތު ކުރެވޭ މީހާގެ ޝަރީއަތް ޖޫރީން ހޮވުމާއެކު މި ހަފުތާގައި ފަށައިފި އެވެ.
ހިޕް-ހޮޕްގެ ދުނިޔޭގައި ހިނގި އެންމެ ބޮޑު އެއް ހާދިސާ އަދި މިހާތަނަށް ހައްލެއް ނުލިބި އޮތް މި މަރުގެ މައްސަލައިގައި، ޝަރީއަތަށް ބޭނުންވާ ޖޫރީން ކަނޑައެޅުމަށްޓަކައި މީހުން ހޮވުމުގެ މަސައްކަތް ވަކީލުން ފަށާފައިވަނީ މިދިޔަ ހޯމަ ދުވަހު އެވެ. މި މަސައްކަތް އަންގާރަ އަދި ބުދަ ދުވަހު ވެސް ކުރިއަށްދިޔައިރު، ހަތް މީހަކަށް ބުރާސްފަތި ދުވަހުގެ މެންދުރުފަހު ކޯޓަށް ހާޒިރުވުމަށް ވަނީ އަންގާފަ އެވެ. އެއް މަސް ދުވަހުގެ މުއްދަތަށް ކުރިއަށްދާ މި ޝަރީއަތަށް ޖުމްލަ 16 ޖޫރީން ހޮވާނެ އެވެ.
އުމުރުން 63 އަހަރުގެ ޑުއޭން "ކެފޭ ޑީ" ޑޭވިސްގެ މައްޗަށް އުފުލާފައިވަނީ ނުރައްކާތެރި ހަތިޔާރެއް ބޭނުންކޮށްގެން، ކުށްކުރާ ގޭންގަކަށް އެހީތެރިވުމުގެ ނިޔަތުގައި މީހަކު މަރާލުމުގެ ދައުވާ އެވެ. ނަމަވެސް އޭނާ ވަނީ އެ ދައުވާއަށް އިންކާރުކޮށްފަ އެވެ. ޓޫޕާކް މަރާލި ދުވަސްވަރު ޑޭވިސްއަކީ ކެލިފޯނިއާގެ "ސައުތު ސައިޑް ކޮމްޕްޓަން ކްރިޕްސް" ގޭންގުގެ އިސް މީހެކެވެ.
މި ހަފުތާގެ ބޮޑު ބައެއްގައި ކުރިއަށްދާނެ ކަމަށް ބެލެވޭ ޖޫރީން ހޮވުމުގެ މަރުހަލާ ފެށުމާއެކު، ޓޫޕާކް ޝަކޫރުގެ އާއިލާގެ މެންބަރުން ވެސް ވަނީ ލަސްވޭގަސްގެ ކޯޓު ސަރަހައްދަށް އެއްވެފަ އެވެ.
ޓޫޕާކްގެ އާއިލާގެ ކެންޑްރިކް ލެސޭން ބުނި ގޮތުގައި، އެ މަރުގެ ހާދިސާއާ އެއްވެސް ގުޅުމެއް އޮތް، ނުވަތަ އެކަން ރޭވުމުގައި ބައިވެރިވި، ނުވަތަ އެކަމަށް އެހީތެރިވި ކޮންމެ މީހަކު ވެސް ޖަލަށްލާން ޖެހޭނެ އެވެ.
މަރުވިތާ 30 އަހަރު ވެފައިވީ ނަމަވެސް، ޓޫޕާކް ޝަކޫރަކީ އަދިވެސް މިއުޒިކީ ދުނިޔޭގެ ވަރުގަދަ ޝަހުސިއްޔަތެކެވެ. އަދި އޭނާއަކީ މިހާތަނަށް އުފެދުނު އެންމެ ނުފޫޒުގަދަ އަދި ހުނަރުވެރި ރެޕް ފަންނާނުންގެ ތެރޭގައި ހިމެނޭ މީހެކެވެ.
އުމުރުން އެންމެ 25 އަހަރުގައި ޓޫޕާކް މަރުވިއިރު، އޭނާގެ ހަތަރުވަނަ ސޯލޯ އަލްބަމްގެ ފަސް މިލިއަން ކޮޕީ ވަނީ ވިކިފަ އެވެ.
އެ ހާދިސާ ހިނގި 1996 ވަނަ އަހަރުގެ ސެޕްޓެމްބަރު މަހުގެ 7 ވަނަ ދުވަހު، ޓޫޕާކް އިނީ މިއުޒިކް މޮގުލް މެރިއަން "ސުޖް" ނައިޓާއެކު ބީއެމްޑަބްލިއު ކާރެއްގަ އެވެ. ޓްރެފިކް ލައިޓެއްގައި މަޑުކޮށްގެން އޮއްވައި، ހުދު ކުލައިގެ ކެޑިލެކް ކާރެއްގައި އައި ބަޔަކު ދިން ބަޑީގެ ހަމަލާތައް ކާރުގެ ކުރީ ސީޓުގައި އިން ޓޫޕާކަށް އަމާޒުވި އެވެ. އޭގެ ހަ ދުވަސް ފަހުން ޓޫޕާކް މަރުވިއިރު، ނައިޓް ވަނީ އެ ހަމަލާއިން ސަލާމަތްވެފަ އެވެ.
މި މައްސަލައިގެ ތަހުގީގު ހުއްޓިފައި އޮތުމަށްފަހު އަލުން ކުރިއަށްދާން ފެށީ، 2019 ވަނަ އަހަރު ޑޭވިސް ނެރުނު ފޮތެއްގައި އެ ހާދިސާއާ ގުޅޭގޮތުން ހާމަކުރި ވާހަކަތަކާ ގުޅިގެންނެވެ. އޭނާ ހައްޔަރުކުރީ 2023 ވަނަ އަހަރުގެ ތެރޭގަ އެވެ.
