ޑޮލީ ޕާޓަން އޭނާގެ އެންމެ ފުރަތަމަ ލަވަ "ލިޓްލް ޓައިނީ ޓެސެލްޓޮޕް" ލިޔުނީ އުމުރުން އެންމެ ހަ އަހަރުގަ އެވެ. އެއީ އޭނާ ގެންގުޅުނު، ކުޅޭ ބުދަކަށް ހާއްސަކޮށްގެން ލިޔުނު ލަވައެކެވެ. އޭނާގެ މަންމަ އެ ލަވައިގެ ކަރުދާސްކޮޅު ވަރަށް ފަރުވާތެރިކަމާއެކު ބޫޓު ފޮށިގަނޑެއްގައި ރައްކާކުރި އެވެ.
އޭގެ އެތައް އަހަރެއް ފަހުން ޕާޓަން ލިޔެފައިވާ ގޮތުގައި، އޭނާ އެ ކުޑަކުޑަ ބުދުދެކެ ވަރަށް ލޯބިވި އެވެ. އޭނާގެ ޝުއޫރުތަކާއި އިހުސާސްތައް ފާޅުކުރީ ލިޔުންތެރިކަމުގެ ތެރެއިން ކަމަށާއި، އެ ދުވަސްވަރު އޭނާގެ ހިތަށްއެރީ "ޓެސެލްޓޮޕް" އަށް ހާއްސަ ލަވައެއް އޮންނަންވާނެ ކަމަށް އޭނާ ބުންޏެވެ.
އޭގެ ފަހުން ޕާޓަން މިއުޒިކް އުފެއްދުން ދުވަހަކުވެސް ހުއްޓައެއް ނުލަ އެވެ. ގާތްގަނޑަކަށް ފަސްދޮޅަސް އަހަރު ވަންދެން އޭނާގެ ހިތްގައިމުކަމާއި، އަސަރުގަދަ ލަވަތަކާއި، ހުނަރުވެރިކަމުން އާންމުންގެ މަގުބޫލުކަން ހޯދާފައިވާ ކަންޓްރީ މިއުޒިކް ލަވަކިޔުންތެރިޔާ އަދި އެކްޓްރެސް، އުމުރުން 80 އަހަރުގައި މިދިޔަ އަންގާރަ ދުވަހު މަރުވެފައިވާ ކަމަށް އޭނާގެ އާއިލާއިން ނެރުނު ބަޔާނެއްގައި ބުނެފައިވެ އެވެ.
ޕާޓަން މަރުވި ސީދާ ސަބަބެއް ހާމަކޮށްފައި ނުވި ނަމަވެސް، އޭނާ މަރުވީ ނޭޝްވިލްގައި ވަރަށް އަމާންކަމާއެކު ކަމަށް އޭނާގެ ޕަބްލިސިސްޓް ބުންޏެވެ. "ޕީޕަލް" މެގަޒިންއިން އޭނާގެ މަންދޫބުންނާ ހަވާލާދީ ރިޕޯޓްކޮށްފައިވާ ގޮތުގައި، ޑޮލީ ޕާޓަން މަރުވީ ކެންސަރު ބައްޔާ ދެކޮޅަށް ކުރު މުއްދަތަކަށް ކުރި ހަނގުރާމައަކަށް ފަހުގަ އެވެ. މަރުވުމުގެ ދުވަސްކޮޅެއް ކުރިން ޕާޓަން އެ މެގަޒިންއަށް ދިން އިންޓަވިއުއެއްގައި ބުނެފައިވަނީ ސިއްހީ ބައެއް މައްސަލަތައް ހުރި ނަމަވެސް މަސައްކަތުގައި ކުރިއަށްދާން ރާވާފައިވާ ކަމަށެވެ.
"ކޯޓް އޮފް މެނީ ކަލާސް"، "ޖޮލީން" އަދި "އައި ވިލް އޯލްވޭޒް ލަވް ޔޫ" ފަދަ މަޝްހޫރު ލަވަތަކާއެކު، ޕާޓަން ވެފައިވަނީ 100 މިލިއަނަށްވުރެ ގިނަ ރެކޯޑް ވިއްކައިގެން ތާރީހުގައި އެންމެ ގިނަ ރެކޯޑް ވިއްކި އަންހެން ފަންނާނުންގެ ތެރެއިން އެކަކަށެވެ. އޭނާ ވަނީ ލައިފްޓައިމް އެޗީވްމަންޓް އެވޯޑް ހިމެނޭހެން ޖުމްލަ 11 ގްރެމީ އެވޯޑް ހާސިލްކޮށްފަ އެވެ.
ޕާޓަންގެ ހިތްހެޔޮ މިޒާޖާއި، އޭނާގެ ފާހަގަކޮށްލެވޭ ރަންކުލައިގެ އިސްތަށިގަނޑާއި، ކުލަގަދަ ހެދުންތަކުގެ އިތުރުން ސްޓޭޖްމަތީގައި އޭނާ ދައްކުވައިދޭ އުފާވެރިކަމުގެ ސަބަބުން، އެމެރިކާގެ ހުރިހާ ފަންތިއެއްގެ މީހުންގެ ލޯބި އޭނާއަށް ލިބުނެވެ. އަދި މިއީ ބައިނަލްއަގުވާމީ ފެންވަރުގައި ކަންޓްރީ މިއުޒިކް މަގުބޫލުވުމަށް މެދުވެރިވި ސަބަބެއް ވެސް މެއެވެ.
އަހަރުތަކުގެ ތެރޭގައި ޕާޓަން ވަނީ ޓީވީ ޝޯތައް ހުށަހަޅައިދީ، ފިލްމުތަކުގައި އެކްޓްކޮށް، އަދި އޭނާގެ އުފަން ސްޓޭޓް ކަމަށްވާ ޓެނެސީގައި "ޑޮލީވުޑް" ގެ ނަމުގައި މަގުބޫލު ތީމް ޕާކެއް ވެސް އުފައްދާފަ އެވެ. މިއީ ލަވަލިޔުންތެރިއެއްގެ ގޮތުގައި އޭނާ ކުރި އަގުހުރި މަސައްކަތްތަކުގެ އިތުރުން ކުރި ކަންކަމެވެ.
ކޮވިޑް-19 ގެ ބަލިމަޑުކަމާ ގުޅިގެން، 2020 ވަނަ އަހަރު ވެކްސިން ދިރާސާ ކުރުމަށް ވެންޑަބިލްޓް ޔުނިވާސިޓީއަށް ޕާޓަން އެއް މިލިއަން ޑޮލަރު ހަދިޔާކުރި އެވެ. މިއާއެކު އޭނާ ވެގެންދިޔައީ މޮޑާނާ ވެކްސިން އުފެއްދުމަށް އެންމެ ފުރަތަމަ އެހީތެރިކަން ފޯރުކޮށްދިން އެކަކަށެވެ.
އޭނާ ވަނީ އެމެރިކާގެ އިތުރުން ކެނެޑާ، އިނގިރޭސިވިލާތް، އޮސްޓްރޭލިއާ އަދި އަޔަލޭންޑްގެ ޕްރީ-ސްކޫލް ކުދިންނަށް އަމާޒުކޮށްގެން ފޮތް ކިޔުމުގެ ޕްރޮގްރާމެއް ހިންގައި، އޭނާ އުފަންވި ޓެނެސީގެ ކައުންޓީގެ ހައިސްކޫލް ދަރިވަރުންނަށް ސްކޮލަޝިޕް ފުރުސަތުތައް ފަހިކޮށްދީފަ އެވެ.
