ބިންވެރިޔާ ސްކީމުގެ ދަށުން އިލެކްޝަންސް ކޮމިޝަނުގެ ކުރީގެ ރައީސް، މުހައްމަދު ޒާހިދުއަށް ދޫކޮށްފައި އޮތް ބިމެއް އަތުލަން މި ސަރުކާރުން ނިންމި ނިންމުން މަޑުޖައްސާލަން ސިވިލް ކޯޓުން އަމުރުކޮށްފި އެވެ.
ނިދިޔަ އަންގާރަ ދުވަހު ސިވިލް ކޯޓުން ކުރި ވަގުތީ އަމުރުގައި ބުނެފައި ވަނީ އެ ކޯޓުން ބަލަމުންދާ މައްސަލައިގައި ވަކި ގޮތެއް ކަނޑައަޅަންދެން އެ ބިމަށް ތިންވަނަ ފަރާތެއްގެ ހައްގެއް އުފަންވެދާނެ އެއްވެސް ކަމެއް ނުކުރުމަށް ހައުސިން މިނިސްޓްރީގެ މައްޗަށް އަމުރުކުރާ ކަމަށެވެ.
ހައުސިން މިނިސްޓްރީން ބާތިލުކޮށްފައި ވަނީ ބިންވެރިޔާ ސްކީމުގެ ދަށުން މުހައްމަދު ޒާހިދު ކިޔާ މީހަކަށް ހުޅުމާލެއިން ދީފައިވާ ގޯއްޗެކެވެ. އެ ގޯތީގެ އެއްބަސްވުން ބާތިލުކުރިކަން ހައުސިން މިިނިސްޓްރީން ޒާހިދުއަށް އަންގާފައި ވަނީ ޖުލައި 2، 2026 ގަ އެވެ.
އަދަދު އަށް އެނގިފައިވާ ގޮތުގައި، ޒާހިދުއަށް ބިންވެރިޔާ ސްކީމުން ދޫކޮށްފައިވާ ބިމުގެ އެއްބަސްވުން ބާތިލުކޮށްފައި ވަނީ މާލެއަށް އުފަން މީހަކަށް ނުވާތީ އެވެ.
އެ މައްސަލައިގައި ޒާހިދު ވަނީ ހައުސިން މިނިސްޓްރީގެ ނިންމުން ގޯސްކަމަށް ކަނޑައަޅައިދީ އެ ބިމަކީ ޒާހިދުގެ ބިމެއްކަމަށް ކަނޑައަޅައި ދިނުމަށް އެދި ސިވިލް ކޯޓަށް މައްސަލައެއް ހުށަހަޅައިފަ އެވެ.
ވަގުތީ އަމުރަކަށް އެދިފައި ވަނީ އެ މައްސަލައިގައި ސިވިލް ކޯޓުން ކުރާ ހުކުމަކާ ގުޅިގެން، އެ ބިން އަނބުރާ ޒާހިދުއަށް ދޭން ހުކުމްކުރި ނަމަވެސް، އެ ބިން ތިންވަނަ ފަރާތަކަށް ދީފައިވާނަމަ، ޒާހިދުއަށް އެ ބިން ލިބޭނެ މަގެއް ނޯންނާނެތީ އެވެ.
