ގިނަ ބައެއްގެ މަގްބޫލުކަން ހޯދި އެކްޓްރެސް ހޭޑަން ޕެނެޓިއޭ މަރުވީ އޭނާގެ ހަށިގަނޑުގައި ފެންޓަނީލް އާއި ޒެނެކްސްގެ އިތުރުން އެހެނިހެން މަސްތުވާތަކެތީގެ ވިހަ މާއްދާތައް ހުރުމުގެ ސަބަބުން އޯވާޑޯޒްވެގެން ކަމަށް އޮޓޯޕްސީ ރިޕޯޓުން ދައްކައިފި އެވެ.
ކޮރޯނާސް އޮފީހުން ބުނި ގޮތުގައި ޕެނެޓިއޭގެ މަރުވީ ދިމާވި ހާދިސާއެއްގަ އެވެ. އަދި އޭނާ މަރުވާން މެދުވެރިވި ފަދަ އެއްވެސް އަނިޔާއެއްގެ ނިޝާނެއް ހަށިގަނޑުން ފެންނާކަށް ނެތެވެ.
އުމުރުން 36 އަހަރުގެ ޕެނެޓިއޭ މަރުވެފައި އޮއްވާ ފެނުނީ މިދިޔަ މަހު އެމެރިކާގެ ސައުތު ކެރޮލައިނާގެ ގެއެއްގެ ތެރޭގަ އެވެ،
މަޝްހޫރު ޓީވީ ސިލްސިލާތައް ކަމަށްވާ "ހީރޯސް" އަދި "ނޭޝްވިލް" އިން ފެނިގެންދިޔަ މި ތަރިއަކީ މަސްތުވާތަކެތީގެ ވަބާގައި އޭނާ އުޅެންޖެހުނު ދަތި އުނދަގޫ ހާލަތްތަކުގެ ވާހަކަ މީގެ ކުރިން ފާޅުގައި ދައްކާފައިވާ ފަންނާނެކެވެ.
ކޮރޯނާސް އޮފީހުން ހާމަކުރި ގޮތުގައި އޭނާގެ ހަށިގަނޑުން މަސްތަކަށް ލުއިދޭ ބޭހެއް ކަމަށްވާ މެތޯކާބަމޯލް އާއި، ނަފްސާނީ ބަލިތަކަށް ފަރުވާ ދިނުމަށް ބޭނުންކުރާ އެންޓިސައިކޮޓިކް ބޭހެއް ކަމަށްވާ ކުއެޓިއަޕިން ވެސް ވަނީ ފެނިފަ އެވެ.
މި މަޝްހޫރު ތަރީގެ މަރުގެ މައްސަލަ އެ ސަރަހައްދުގެ ފުލުހުން ތަހުގީގު ކުރަމުންދާއިރު، އެމެރިކާގެ ޑްރަގް އެންފޯސްމަންޓް އެޖެންސީ (ޑީއީއޭ) އިން ވެސް އެ ތަހުގީގުގައި ބައިވެރިވަމުންދާ ކަމަށް ރިޕޯޓްތައް ބުނެ އެވެ.
ފުލުހުންގެ ރިޕޯޓްތަކުން އެނގޭ ގޮތުގައި، ޕެނެޓިއޭ މަރުވި ދުވަހު އިމަޖެންސީ ސާވިސްގެ ޓީމު އެގެއަށް ދިޔައިރު، ކުރިން އޭނާއަށް އަނިޔާކުރި ކަމަށް އިއުތިރާފުވެފައިވާ ލޯބިވެރިޔާ ބްރަޔަން ހިކަސަން އާއި އޭނާގެ ކޮއްކޮ ޒެކް އެތަނުގައި ތިއްބެވެ.
މަރުވުމުގެ މަދު މަސްތަކެއް ކުރިން ޕެނެޓިއޭ ވަނީ އޭނާގެ ހަޔާތުގެ މައްޗަށް ލިޔެފައިވާ ފޮތެއް ނެރެފަ އެވެ. އެ ފޮތުގައި އޭނާ ވަނީ މަސްތުވާތަކެތީގެ ވަބާގައި ޖެހުނު ގޮތާއި، ވިހެއުމަށްފަހު ކުރިމަތިވި ނަފްސާނީ ބަލިމަޑުކަމާ (ޕޯސްޓްޕާޓަމް ޑިޕްރެޝަން) ބެހޭގޮތުން ތަފްސީލީ ގޮތެއްގައި ވާހަކަދައްކާފަ އެވެ.
ޕެނެޓިއޭ ބުނެފައިވާ ގޮތުގައި އޭނާއަށް މަސްތުވާތަކެތި ތައާރަފުވީ އުމުރުން 16 އަހަރުގަ އެވެ. އެއީ "ހީރޯސް" ސިލްސިލާގެ ރެޑް ކާޕެޓް ހަރަކާތަކަށް ދިޔުމުގެ ތެރޭގައި، އޭނާގެ ޕްރޮފެޝަނަލް ޓީމުގެ މެންބަރަކު ހަކަތަ ލިއްބައިދޭ "ހެޕީ ޕިލް" އެއްގެ ނަމުގައި ދިން ބޭހަކުންނެވެ.
ޕެނެޓިއޭގެ ކޮއްކޮ ޖެންސަން ވެސް ވަނީ އުމުރުން 28 އަހަރުގައި ހިތުގެ ބައްޔެއްގައި މަރުވެފަ އެވެ. ޕެނެޓިއޭގެ ފޮތުގައި ހާމަކޮށްފައިވާ ގޮތުގައި، އޭނާގެ ކޮއްކޮއަކީ ވެސް މަސްތުވާތަކެތީގެ ވަބާގައި އުޅުނު މީހެކެވެ. އަދި މަރުވުމާ ހަމައަށް އޭނާ ހެރޮއިން އާއި ކޮކެއިން ބޭނުންކުރަމުން ދިޔަ ކަމަށް ޕެނެޓިއޭ ލިޔެފައިވެ އެވެ.
