މާލެ ސަރަހައްދުގެ ޓްރެފިކް މައްސަލަ ހައްލުކުރަން ހާއްސަ ބާރުތަކެއް ދީގެން ވަކި މުއްދަތަކަށް އުފައްދާ "ގްރޭޓާ މާލެ ޓްރާންސްޕޯޓް އެންޑް މޮބިލިޓީ އޮފީސް" ގެ ވެރިޔަކަށް ކަސްޓަމްސްގެ ކުރީގެ ކޮމިޝަނަރު ޔޫސުފް މާނިއު އައްޔަންކޮށްފި އެވެ.
މިކަން ރަސްމީކޮށް އަދި އިއުލާން ނުކުރި ނަމަވެސް، އަދަދު ނޫހުން ގުޅުމުން މާނިއު ވަނީ އޭނާ އެ މަގާމަށް އައްޔަންކުރިކަން ކަށަވަރުކޮށްދެއްވާފަ އެވެ.
މި އޮފީހަކީ އެއްގަމު ދަތުރުފަތުރުގެ އާ ގާނޫނުގެ ދަށުން ގްރޭޓާ މާލެ ކަމަށް ބުނާ، މާލެ އާއި ވިލިމާލެ އާއި ހުޅުމާލޭގެ އެއްގަމު ދަތުރުފަތުރުގެ ކަންކަން ބަލަހައްޓަން އުފައްދާ އޮފީހެކެވެ. މި އޮފީހަށް ލިބޭ އެންމެ ބޮޑު ބާރަކީ ނުވަތަ މަސްއޫލިއްޔަތަކީ މާލޭ ސަރަހައްދަށް ރަޖިސްޓްރީ ކުރެވޭ އުޅަނދުގެ ކޯޓާ ސިސްޓަމެއް ތައާރަފު ކުރުމެވެ. އެއިރުން އުޅަނދެއް ރަޖިސްޓްރީ ކުރެވޭނީ ކޯޓާއެއް އޮވެގެންނެވެ.
މާލޭ ސަރަހައްދުގައި އުޅަނދު ރަޖިސްޓްރީ ކުރެވޭނެ ލިމިޓެއް ވެސް ގާނޫނުގައި ވަނީ ކަނޑައަޅައިފަ އެވެ. އެ ލިމިޓުގައި އޮންނަނީ އަލަށް ރަޖިސްޓްރީ ކުރެވޭނީ ނައްތާލާ އުޅަނދުގެ 30 ޕަސެންޓަށް ވުރެ ގިނަ ނުވާ އަދަދަކަށެވެ.
ގްރޭޓާ މާލެ ޓްރާންސްޕޯޓް އޮފީހުގެ މަސްއޫލިއްޔަތުތައް
- ޓްރެފިކާއި ތޮއްޖެހުމުގެ މައްސަލަތައް ހައްލު ކުރަން ސިޔާސަތެއް ކަނޑައެޅުން
- މަގުތައް ރޭވުމާއި ތަރައްގީ ކުރުން
- މާލެ ސަރަހައްދުގައި އެއްގަމު އުޅަނދު ރަޖިސްޓްރީ ކުރެވޭނެ ކޯޓާއެއް ކަނޑައެޅުން
- މާލެ ސަރަހައްދުން ނައްތާލެވޭ އުޅަނދުގެ 30 ޕަސެންޓަށްވުރެ އިތުރުނުވާ މިންވަރަކަށް އުޅަނދު ރަޖިސްޓްރީ ކޮށްދިނުން
- ޕާކު ކުރުމުގެ ހާއްސަ ނިޒާމުތަކާއި މިންގަނޑުތައް ކަނޑައެޅުން
- ސްކޫލް ކުދިންނަށް ބަހުގެ ހިދުމަތް ފޯރުކޮށްދިނުން
- އޮޓޮމޭޓެޑް ވެހިކަލް އިންސްޕެކްޝަން ނިޒާމެއް ގާއިމް ކުރުން
- މޮބިލިޓީ ރިފޯމް ޕްލޭނެއް އެކުލަވާލުން
އޭގެ އިތުރުން، މޮބިލިޓީ ރިފޯމް ޕްލޭނެއް ވެސް އެ އޮފީހުން ހަދަން ޖެހެ އެވެ. އެ ޕްލޭނުގައި، މާލޭގެ އާބާދީ އާއި އާބާދީ އިތުރުވާނެ މިންވަރަށް ބަލައި ބައެއް ކަންކަން ރާވަން ޖެހެ އެވެ. އަދި މަގުތަކާއި ގޯޅިތައް ރިސްޓްރަކްޗާ ކުރަން ޖެހޭ ނަމަ އެކަން ވެސް ޕްލޭނުގައި ހިމަނަން ޖެހެ އެވެ.
މާލެ ސަރަހައްދުގައި އެންމެ ގިނައިން ރަޖިސްޓްރީކޮށްދެވޭނެ އުޅަނދުގެ އަދަދު ވެސް ގާނޫނުގެ ދަށުން މޮބިލިޓީ އޮފީހުން ކަނޑައަޅަން ޖެހެ އެވެ. އެ އަދަދު ކަނޑައަޅަން ޖެހެނީ ގާނޫނަށް އަމަލު ކުރަން ފަށާތާ ހަ މަސް ދުވަހުގެ ތެރޭގަ އެވެ.
އެއްގަމު ދަތުރުފަތުރުގެ އާ ގާނޫނަށް އިތުރުކޮށްފައިވާ އާ އަދި އެންމެ މުހިންމު އެއް ބަޔަކީ މާލެ ސަރަހައްދަށް ހާއްސަކޮށް ހިމަނާފައިވާ ސަންސެޓު ބާބެވެ. އެ ބާބަށް އަމަލު ކުރެވޭނީ ގިނަވެގެން ތިން އަހަރު ދުވަސް ވަންދެކަށެވެ.
