އެއްގަމު ދަތުރުފަތުރުގެ ގާނޫނަށް އަމަލުކުރަން ފަށާތާ ތިން އަހަރު ފަހުން 20 އަހަރު ވެފައިވާ ހުރިހާ އެއްގަމު އުޅަނދުތަކުގެ ރަޖިސްޓްރީ ބާތިިލުކުރަން ޖެހޭ ގޮތަށް ހަދަން ރައްޔިތުންގެ މަޖިލީހުން އިއްޔެ ފާސްކޮށްފި އެވެ.
މަޖިލީހުން އިއްޔެ ފާސްކުރި ބިލުގައި ވަނީ، އިސްތިސްނާ ކުރެވޭ ހާއްސަ ގިންތީގެ އުޅަނދުތައް ފިޔަވައި އެހެން އެއްވެސް އެއްގަމު އުޅަނދެއް ބޭނުންކުރެވޭނީ އެ އުޅަނދެއް އުފެއްދި ތާރީހުން ފެށިގެން 20 އަހަރު ދުވަހުގެ މުއްދަތަށް ކަމަށެވެ. މި މުއްދަތު ހަމަވުމުން އެ އުޅަނދުތަކުގެ ވެރިފަރާތަށް ނޯޓިސް ދިނުމަށް ފަހު، އުޅަނދުގެ ރަޖިސްޓްރީ ބާތިލުކުރެވޭނެ އެވެ.
މިހެން ކަމުން، މިހާރު 20 އަހަރު ވެފައިވާ އުޅަނދުތަކާއި 2029 ވަނަ އަހަރުގައި 20 އަހަރުވާ 20 އުޅަނދުތަކުގެ ރަޖިސްޓްރީ ބާތިލުކުރެވޭނެ އެވެ. ރަޖިސްޓްރީ ބާތިލުކުރުމުން އިސްތިސްނާ ވަނީ، އުޅަނދުގެ ބާވަތާއި ތާރީހީ ގޮތުން މުހިންމުވާ އުޅަނދު ކަމުގައި ކަނޑައަޅާ އުޅަނދެވެ.
ހާއްސަ ގިންތީގެ އުޅަނދުތަކުގެ ޝަރުތުތައް ކަނޑައަޅާނީ ގާނޫނުގެ ދަށުން ހަދާ ގަވާއިދުގެ ދަށުން ކަމަށެވެ. މި ގަވާއިދުގައި ހާއްސަ ގިންތީގެ ޝަރުތު ހަމަވާ މިންގަނޑުަކާއި، އެފަދަ އުޅަނދު ރީފާބިޝްކުރުމުގެ ޝަރުތުތަކާއި ރޯޑްވާދިނަސް ފުރިހަމަ ކުރުމުގެ ޝަރުތުތަކާއި އެ ނޫން ވެސް ޝަރުތުތައް ބަޔާންކުރަން ޖެހެ އެވެ.
އެެއްގަމު ދަތުރުފަތުރުގެ ބިލު ދިރާސާކުރި ގައުމީ ތަރައްގީ އާއި ތަރިކައިގެ ކޮމިޓީން ބުނީ، އުޅަނދުފަހަރު ބޭނުންކުރެވޭ އެންމެ ދިގު މުއްދަތެއް ކަނޑައެޅުމުން މަގުމަތީގައި ބޭނުންކުރެވޭ އުޅަނދުފަހަރަކީ ވަކި މިންގަނޑަކަށް ފެތޭ އުޅަނދުތަކެއްކަން ކަށަވަރުކުރުވޭނެ ކަމަށެވެ. އަދި، މީގެ ސަބަބުން އާންމުންގެ ސަލާމަތާއި ރައްކާތެރިކަން ކަށަވަރުކޮށް، ކުރިމަތިވެދާނެ ނުރައްކާތައް މަދުކުރުމަށް މަގުފަހި ވެގެން ދާނެ ކަމަށް ވެސް ކޮމިޓީން ބުންޏެވެ.
މިހާރު އަމަލުކުރަމުން އަންނަ އެއްގަމު ދަތުރުފަތުރުގެ ގާނޫނުގައި އުޅަނދު ބޭނުންކުރެވޭނެ އުމުރެއް ކަނޑައަޅާފައި ނޯވެ އެވެ. ނަމަވެސް އެ ރަށެއްގެ ނުވަތަ ސިޓީއެއްގެ ކައުންސިލަށް އުޅަނދުތައް ބޭނުންކުރެވޭނެ މުއްދަތު ކަނޑައެޅުމުގެ ބާރު އޮތީ ދީފަ އެވެ،
