ޔޫޓިއުބްގެ ތާރީހުގައި އެންމެ ގިނަ މީހުން ބަލާފައިވާ "ބޭބީ ޝާކް ޑާންސް" ވީޑިއޯއިން މަގުބޫލުކަން ހޯދި ކުޑަކުއްޖާ، އޭނާގެ ފުރަތަމަ ކޭ-ޕޮޕް ޑިޖިޓަލް ސިންގަލް މިދިޔަ ބުރާސްފަތި ދުވަހު ނެރެފި އެވެ.
މިއީ އޭނާ ދުނިޔޭގެ ސަމާލުކަމަށް އައިތާ 10 އަހަރު ފަހުން ނެރުނު ލަވައެކެވެ.
އުމުރުން ހަތް އަހަރުގައި އެ ވީޑިއޯއިން ފެނިގެންދިޔަ ޕާކް ގިއޮންރޫންގް، ކޭ-ޕޮޕް ދާއިރާއަށް ނުކުންނަނީ "ބޭބީ ޝާކް ބޯއި" ގެ ނަމުގަ އެވެ. އޭނާގެ މި މަސައްކަތަށް އެހީތެރިކަން ފޯރުކޮށްދެނީ "ބޭބީ ޝާކް" ގެ ކޮޕީރައިޓް އޮންނަ ޕިންކްފޮންގް ކުންފުނިންނެވެ.
ޕާކް ބުނި ގޮތުގައި "ބޭބީ ޝާކް ޑާންސް" އަކީ މުޅި ދުނިޔޭގެ އެތައް ބަޔަކަށް އުފާވެރިކަން ގެނެސްދިން ވީޑިއޯއެކެވެ. އަދި 10 އަހަރު ފަހުން ވެސް އެތައް ބަޔަކު އޭނާގެ މަތިން ހަނދާން ހުންނާތީ އެކަމާ އުފާކުރާ ކަމަށާއި، މިއީ މިއުޒިކްގެ ތެރެއިން އަލުން އާންމުންނާ ގުޅުން ބަދަހިކުރަން ލިބުނު ހިތްވަރެއް ކަމަށް އޭނާ ފާހަގަކުރި އެވެ.
މިޔަރު އާއިލާއެއްގެ މައްޗަށް ތައްޔާރުކޮށްފައިވާ މި މަގުބޫލު ލަވަ ފުރަތަމަ ނެރުނީ 2016 ވަނަ އަހަރު އެވެ. އޭގެ ފަހުން މިހާތަނަށް އެ ވީޑިއޯއަށް 17.2 ބިލިއަނަށް ވުރެ ގިނަ ވިއުސް ލިބިފައިވެ އެވެ. އެމެރިކާގެ ރިޔާސީ ގަނޑުވަރު، ވައިޓް ހައުސްގައި ވެސް މި ލަވަ ޖަހާފައިވާއިރު، އެމެރިކާގެ ރައީސް ޑޮނަލްޑް ޓްރަމްޕާއި، ޓެސްލާގެ ސީއީއޯ އީލޮން މަސްކްގެ އިތުރުން ދުނިޔޭގެ މަޝްހޫރު އެތައް ފަންނާނުންނެއް ވަނީ މި ލަވައަށް ތައުރީފުކޮށްފަ އެވެ. އަދި މި ލަވައާ ގުޅިގެން ތަފާތު ޕެރޮޑީތަކާއި ނެށުމުގެ ފޯރިއެއް މުޅި ދުނިޔޭގައި ފެތުރިގެންދިޔަ އެވެ.
"ބޭބީ ޝާކް" ވީޑިއޯއަށް ފަހު ވޭތުވެދިޔަ އަހަރުތަކުގައި ޕާކް ވަނީ ޕިންކްފޮންގްގެ އެހެން ބައެއް ޝޯތަކުން ވެސް ފެނިގެން ގޮސްފަ އެވެ. އޭނާ ބުނި ގޮތުގައި "ވޭވް"ގެ ނަމުގައި ނެރުނު އާ ޑިޖިޓަލް ސިންގަލް ފެށިގެން އަންނަނީ "ބޭބީ ޝާކް" ގެ މަޝްހޫރު ރާގުންނެވެ. ނަމަވެސް އެއަށްފަހު އެ ލަވަ ބަދަލުވެގެންދަނީ އިލެކްޓްރޯޕޮޕް މިއުޒިކަކަށެވެ. މި ލަވައިގެ ބައެއް ބައިތައް ލިޔުމުގައި ޕާކް އަމިއްލައަށް ވެސް ބައިވެރިވެފައިވެ އެވެ.
މި ލަވައަކީ އޭނާގެ މިއުޒިކީ ދަތުރުގެ ފެށުން ކަމަށް ޕާކް ގަބޫލުކުރެ އެވެ.
"ވޭވް އަކީ ހަމައެކަނި އެއްފަހަރުން ނިންމާލާނެ ޕްރޮޖެކްޓެއް ނޫން، މިއީ އާ ފެށުމެއް. މިއުޒިކާއި އެހެނިހެން އުފެއްދުންތަކުގެ ޒަރީއާއިން އަހަރެންގެ ހުނަރުގެ ތަފާތު ދާއިރާތައް ކުރިއަށް އޮތް ތަނުގައި ވެސް ފެނިގެންދާނެ ކަމަށް އުންމީދުކުރަން،" ޕާކް ބުންޏެވެ.
