މާދަމާ ރޭ ސޯޝަލް ސެންޓަަރުގައި ބޭއްވުމަށް ތާވަލުކޮށްފައިވާ އޮސްޓްރޭލިއާގެ ބޭންޑު "ބިޔޯން އަގެއިން" ގެ ޝޯ ނުބޭއްވޭނެކަން އިންތިޒާމުކުރާ ފަރާތްތަކަށް ސަރުކާރުން އެންގީ "ޕްރައިޑް ފެސްޓިވަލް"ތަކުގައި އެ ބޭންޑުން ހުށަހެޅުންތައް ދީފައިވާތީކަން އެނގިއްޖެ އެވެ.
މި ޝޯ އޮންނާނެކަން އޫބާ އިވެންޓްސްއިން އިއުލާންކުރީ ޖޫން ހައެއްގަ އެވެ. އެ ދުވަހަށް ފަހު ވަރަށް ބޯޑަށް ޝޯ އިޝްތިހާރުކޮށް ޓިކެޓު ދިޔައީ ވިއްކަމުންނެވެ. ޓިކެޓުގައި ޝޯ އޮންނާނެ ތަނެއް ކަމަށް އޮތީ ވެސް ސޯޝަލް ސެންޓަރުގަ އެވެ.
އެހެން ނަމަވެސް، ސޯޝަލް ސެންޓަރުގައި ޝޯ ނުބޭއްވޭނެކަން އެންގީ 48 ގަޑިއިރަށް ވެފައި ވަނިކޮށެވެ. އޭރު ޝޯގެ ސްޓޭޖު ޖެހުމާއި ސައުންޑާއި ލައިޓު އެޅުމުގެ ކަންކަން އޮތީ ވަރަށް ބޮޑަށް ކުރިއަށް ގޮސްފަ އެވެ. އަދި ރޭގެ ވަގުތެއްގައި ބޭންޑުގެ މެންބަރުން ވެސް ވަނި ރާއްޖެއަށް އައިސްފަ އެވެ.
ސަރުކާރުން ރާއްޖޭގެ ބައެއް މީޑިއާތަކަށް ބުނެފައިވާ ގޮތުގައި ޝޯ ކެންސަލް ކުރުމަށް އަންގާފައި ނުވެ އެވެ. އޭގެ ބަދަލުގައި އެންގީ ސޯޝަލް ސެންޓަރު ނޫން އެހެން ތަނެއްގައި ޝޯ ބޭއްވުމަށެވެ. އެއީ މަރާމާތުތަކެއް ކުރާތީ ކަމަށް ސަރުކާރުން ބުނެފައިވެ އެވެ.
މި އިވެންޓުގެ މައުލޫމާތު އެނގޭ މަސްދަރުތަކުން ބުނި ގޮތުގައި އެތައް މަހެއްގެ ކުރިން އެއްބަސްވުންތަކެއް ހަދައި ޔޫތު ސެންޓަރަށް ބޭނުންވާ ގޮތަށް ސައުންޑު ހެދުމަށް ވެސް އެތައް ހަރަދެއް ކޮށްފައި ކުއްލިއަކަށް ތަން ބަދަލުކުރަން ބުނުމަކީ ގަބޫލު ކުރެވޭނެ ކަމެއް ނޫން ކަމަށެވެ.
"ސަރުކާރުން އެ ދައްކަނީ ބަހަނާ،" ވާހަކަ ދެއްކި އެކަކު ބުންޏެވެ.
އަދަދު ނޫހަށް މައުލޫމާތު ލިބިފައިވާ ގޮތުގައި ޝޯ ހުއްޓުވުމަށް ގޮވާލައި ފޭސްބުކްގައި މީހަކު ކުރި ޕޯސްޓެއް ސަރުކާރުގެ ސަމާލުކަމަށް ގެނައުމުން، ސަރުކާރުގެ އެންމެ މަތިން ވަނީ ޔޫތު މިނިސްޓަރު އަބްދުالله ރާފިއު މެދުވެރިކޮށް އެ ޝޯ ސޯޝަލް ސެންޓަރުގައި ނުބޭއްވެނެކަން އިންތިޒާމުކުރާ ފަރާތްތަކަށް އަންގާފަ އެވެ. އެ ޕޯސްޓުގައި އޮތީ އެ ބޭންޑަކީ އެއް ޖިންސުން ގުޅުން ހިންގުން ޕްރޮމޯޓުކުރާ ބޭންޑެއް ކަމަށެވެ.
ޝޯ ނުބޭއްވޭނެކަން އެންގީ އެ ބޭންޑުން އެއް ޖިންސުން ގުޅުން ހިންގުން ޕްރޮމޯޓުކުރާ "ޕްރައިޑް ފެސްޓިވަލް"ތަކުގައި ބައިވެރިވެ ހުށަހެޅުންތައް ދީފައި އޮތުމުންކަން ވަނީ އެނގިފަ އެވެ. މި އަހަރު އިނގިރޭސިވިލާތުގެ ބާމިންގްހަމްގައި ބޭއްވި އެފަދަ ފެސްޓިވަލެއްގައި ވެސް އެ ބޭންޑު ބައިވެރިވި އެވެ.
ރާއްްޖޭން ބޭރުގެ ބައެއް ކުންފުނިތަކުން ޝޯއަށް ސްޕޮންސާ ވެސް ދީފައިވެ އެވެ. އޭގެ އިތުރުން، މާލެ ސިޓީ ކައުންސިލާއި އެމްއެމްޕީއާރުސީގެ އިތުރުން ރާއްޖޭގެ ބައެއް ކުންފުނިތައް ހިމެނެ އެވެ.
އެހެން ތަނެއްގައި ޝޯ ބޭއްވުމަށް ދެ ދުވަހަށް ވުރެ ކުރު މުއްދަތެއް ދިނުމުން މިހާރު ޝޯ ވަނީ ކެންސަލްވެފަ އެވެ. "ބިޔޯން އަގެއިން" ގެ ކުރިން އޯޕެނިން އެކްޓުތަކުގެ ގޮތުގައި ރާއްޖޭގެ މަޝްހޫރު ފަންނާނުންގެ ހުށަހެޅުންތަކެއް ވެސް ކުރިއަށްގެންދަން އޮތީ ނިންމާފަ އެވެ.
"ބިޔޯން އަގެއިން" ބޭންޑަކީ 1970 ގެ އަހަރުތަކުގެ ތެރޭ މަޝްހޫރުވި ސްވިޑެންގެ "އެބާ" ބޭންޑުގެ ލަވަތައް ކަވަރުކުރާ ޓްރިބިއުޓް ބޭންޑެކެވެ. އެ ބޭންޑުން ވަނީ ފާއިތުވި އަހަރުތަކުގައި ދުނިޔޭގެ 72 ގައުމެއްގައި 5،300 އަށްވުރެ ގިނަ ޝޯ ދީފަ އެވެ.
