ނެތިދިއުމުގެ ބިރު ހީވެފައިވާ "ލާ ގިބަން" އަކާއެކު އިންޑިއާގެ މަޝްހޫރު ތަމަޅަ ފިލްމީ ތަރި ވިކްރަމް ފެންނަ ވީޑިއޯއެއް އާންމުވުމާ ގުޅިގެން، އޭތި އޭނާއާ ހަމައަށް އައި ގޮތް ބެލުމަށް އިންޑިއާގެ ވައިލްޑްލައިފް އޮފިޝަލުން ތަހުގީގެއް ފަށައިފި އެވެ.
އިންޑިއާގެ ދެކުނުގެ ސްޓޭޓެއް ކަމަށްވާ ޓެމިލް ނާޑޫއަށް ނިސްބަތްވާ، ގިނަ އެވޯޑުތަކެއް ހާސިލްކޮށްފައިވާ އެކްޓަރު ވިކްރަމް، ލާ ގިބަންއަކާއެކު ހުރި ވީޑިއޯއެއް މިދިޔަ ހޯމަ ދުވަހު އިންސްޓަގްރާމްގައި އާންމުކޮށްފައިވާއިރު، މިހާރު އެ ވީޑިއޯ ވަނީ ޑިލީޓްކޮށްލާފަ އެވެ.
އެ ވީޑިއޯއާ ގުޅިގެން ޓެމިލް ނާޑޫގެ ފޮރެސްޓް ޑިޕާޓްމަންޓުން މިހާރު ވަނީ، އަމިއްލަ މީހެއްގެ ގޭގައި އެފަދަ ޖަނަވާރެއް އޮތް ގޮތާއި، އެފަދަ ތަކެތި ގެންގުޅުމާއި އުފުލުމުގައި އަމަލުކުރަންޖެހޭ ގަވާއިދުތަކާ އެއްގޮތަށް އަމަލުކޮށްފައިވޭތޯ ބެލުމަށް ތަހުގީގެއް ފަށާފަ އެވެ.
ނަމަވެސް، އެ ޖަނަވާރަކީ ވަގަށް އެތެރެކޮށްފައިވާ އެއްޗެއް ކަމަކަށް ނުވަތަ އެއީ ވިކްރަމްގެ އަމިއްލަ އެއްޗެއް ކަމަކަށް ނުވަތަ އޭތި އިންޑިއާއަށް އެތެރެކުރުމުގައި ވިކްރަމްގެ ބައިވެރިވުމެއް އޮތް ކަމަކަށް ތަހުގީގީ އިދާރާތަކުން އަދި ނިންމާފައެއް ނުވެ އެވެ.
މި މައްސަލައިގައި ވިކްރަމް އަދި މިހާތަނަށް އެއްވެސް އެއްޗެއް ބުނެފައެއް ނުވެ އެވެ. ވިކްރަމްގެ ޕަބްލިކް ރިލޭޝަންސް އޮފިސަރު ޔުވަރާޖް ބުނީ، އެކްޓަރުގެ ފަރާތުން އެއްވެސް ބަޔާނެއް ނެރޭނަމަ މީޑިއާތަކަށް އެކަން އަންގާނެ ކަމަށެވެ.
ލާ ގިބަން އަކީ ދެކުނު އިރުމަތީ އޭޝިއާގެ ގައުމުތަކަށް ނިސްބަތްވާ، ކުދި މަކުނުގެ ބާވަތެކެވެ. މިއީ ބައިނަލްއަގުވާމީ ވިޔަފާރީގައި ވަރަށް ބޮޑަށް ކޮންޓްރޯލް ކުރެވިފައިވާ ޖަނަވާރެކެވެ.
އޮފިޝަލުން ވިދާޅުވި ގޮތުގައި، އެ ޖަނަވާރު ފެނިފައިވަނީ ޓެމިލް ނާޑޫގެ ވެރިރަށް ޗެންނާއީގައި ހުންނަ ވިކްރަމްގެ ތިމާގެ މީހެއްގެ ގެއަކުންނެވެ.
ޓެމިލް ނާޑޫގެ ޗީފް ވައިލްޑްލައިފް ވޯޑަން ރާކޭޝް ކުމާރު ޑޯގްރާ ވިދާޅުވީ، ގާނޫނީ ގޮތުން ބޭނުންވާ ހުއްދަތަކާއި ލިޔެކިޔުންތައް ހުރި ނަމަ، އަމިއްލަ ފަރުދުންނަށް ލާ ގިބަން ގެންގުޅެވިދާނެ ކަމަށެވެ.
"އެ ލާ ގިބަން ގެނައީ ކޮންތަނަކުންތޯ ބެލުމަށް ތަހުގީގެއް ދަނީ ކުރިއަށް. އެއީ ގަވާއިދާ ހިލާފަށް އެތެރެކޮށްފައިވާ އެއްޗެއްކަން އެނގޭނީ އޭގެ ފަހުން،" އޭނާ ވިދާޅުވި އެވެ.
މި މައްސަލަ މިހާރު ވަނީ އިންޑިއާގެ ގައުމީ ސަމާލުކަމަށް އައިސްފަ އެވެ. އަސްލު ނަމުން ނަމަ ކެނެޑީ ޖޯން ވިކްޓަރަކީ އިންޑިއާގެ މަޝްހޫރު ތަމަޅަ ސިނަމާގެ އެންމެ ނުފޫޒުގަދަ އެއް ތަރި އެވެ. ތިން ދަހަރަށް ވުރެ ގިނަ ދުވަހުގެ ކާމިޔާބު ފިލްމީ ކެރިއަރެއް އޮތް ވިކްރަމް ފާހަގަކުރެވެނީ، އާދަޔާ ހިލާފު އަދި ހަށިގަނޑަށް ބުރަ ރޯލުތައް ކުޅޭ އެކްޓަރެއްގެ ގޮތުގަ އެވެ.
