އަންނަ ކީ ސްޓޭޖް 1 ގެ ފޮތްތަކަށް ބޮޑެތި ބަދަލުތަކެއް ގެންނަން ނިންމާފައިވާ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެ އެވެ.
އަށް ވަނަ އިންޓަނޭޝަނަލް ޓީޗާސް ކޮންފަރެންސްގައި ޝަފީއު ވިދާޅުވީ އަންނަ އަހަރު ފޮތްތަކަށް ގެންނަ ބަދަލާއެކީ ހަގީގީ ބަދަލެއް އަންނާނީ ޓީޗަރުންވެސް ކުރާ މަސައްކަތުން ކަމަށެވެ.
"މި އަންނަ އަހަރުގައި ﷲ އިރާދަކުރެއްވިއްޔާމުން ކީ ސްޓޭޖް 1 ގެ، ގްރޭޑް 1 ގެ ފޮތްތަކަށް ބޮޑު ބަދަލެއް އަންނާނެ. އަދި މިއާ އެކުގައި އަޅުގަނޑުމެން ހަމަ ލޮބުވެތި ޓީޗަަރުންނަށް ދަންނަވާލަން ބޭނުންވަނީ ފޮތްތައް ބަދަލުކުރެވުނަސް ހަގީގީ ބަދަލެއް އަންނާނީ ތިޔަ ބޭފުޅުން ކުރާ މަސައްކަތަކުންނޭ. ފޮތެއް އޮތަސް އެދުރެއް ނުވާނެ،" ޝަފީއު ވިދާޅުވި އެވެ.
ކީ ސްޓޭޖް 1 ގެ ފޮތްތަކަށް ބަދަލު ގެނައުމާއެކު، ބަދަލު އަންނާނީ ގްރޭޑް 1 އާއި 2 އަދި 3 ގެ ފޮތްތަކަށެވެ. ޝަފީއު ވިދާޅުވީ ފޮތަށް ބަދަލު ގެނައުމަށްވުރެ އެންމެ މުހިންމީ ދަރިވަރުންގެ އެޑިއުކޭޝަން ބައްޓަންކުރަން ވިސްނާ ގޮތުން ކަމަށެވެ.
"ފޮތެއް ނޫން މުހިންމީ ހަގީގަތުގައި. މުހިންމީ އަޅުގަނޑުމެންގެ މި ތުއްތު ދަރިވަރުންގެ އެޑިއުކޭޝަން އަޅުގަނޑުމެން ބައްޓަންކުރަން ވިސްނާގޮތް ހަގީގަތުގައި މީގެ އެންމެ ބޮޑު ބަދަލެއް އަންނާނީ،" މިނިސްޓަރު ވިދާޅުވި އެވެ.
މީގެއިތުރުން ސެކަންޑްރީ އެޑިއުކޭޝަނުން ހަޔާ ސެކަންޑްރީ އެޑިއުކޭޝަނަށް އޮތް ގެޕް ކުޑަކުރުމަށް ކުރާ މަސައްކަތުގެ ދަށުން 30 ޕަސަންޓުން ގާތްގަނޑަކަށް 50 ޕަސަންޓަށް ބޮޑުކުރެވިފައިވާ ކަމަށް ޝަފީއު ވިދާޅުވި އެވެ.
މިނިސްޓަރު ވިދާޅުވީ ވޮކޭޝަނަލް ހައި ސްކޫލް ގާއިމުކޮށް ހުޅުވާލެވޭ ފުރުސަތުތަކާ އެކުގައި ކުރިއަށް އޮތް އަހަރުތަކުގެ ތެރޭގައި 60 ޕަސަންޓާ ހަމައަށް މަތީ ސާނަވީ މަރުހަލާގެ ކުދިންނަށް ޖާގަ އިތުރުކޮށް ފުރުސަތު ފަހިކޮށްދިނުމަކީއަމާޒެއް ކަމަށެވެ.
މި އަހަރު ސަރުކާރު ސްކޫލްތަކުގައި ގްރޭޑް އެކެއްގައި ކިޔަވަން 4،000 އަށްވުރެ ގިނަ ދަރިވަރުން ބަދަލުވިއިރު، އޭގެ ތެރޭގައި މާލެ ސަރަހައްދުން ގްރޭޑް އެކެއްގައި ކިޔަވާނެ 1،700 އަށް ގިނަ ދަރިވަރުން ހިމެނެ އެވެ.
މީގެއިތުރުން އަތޮޅުތެރެއިން މާލެއަށް 1،500 އަށްވުރެ ގިނަ ދަރިވަރުން ބަދަލުވިއިރު، އޭގެ ތެރެއިން އެންމެ ގިނަ ދަރިވަރުން ބަދަލުވީ ހުޅުމާލެއަށެވެ. އެއީ 800 އަށްވުރެ ގިނަ ދަރިވަރުންނެވެ.
މި އަހަރުގެ ދިރާސީ އަހަރުގެ ކިޔެވުން 219 ސްކޫލެއްގައި ފެށީ 77،000 އަށްވުރެ ގިނަ ދަރިވަރުންނާއި 9،000 އަށްވުރެ ގިނަ ޓީޗަރުންނާއެކުގަ އެވެ.
