ފުރަތަމަ ޓާމްގެ ބަންދަށް ފަހު މިއަދު އަލުން ސްކޫލުތައް ހުޅުވިފައިވާ އިރު، ދަރިންގެ ކިޔެވުން އުފާވެރިކަމާއެކު ފެށުމަށްޓަކައި ސިއްހީ ގޮތުން ރަނގަޅު އާދަތަކަށް އެކުދިން އަހުލުވެރިކުރުވަން މިއީ އެންމެ މުނާސަބު ވަގުތެވެ. އެގޮތުން ދަރިފުޅު ތައްޔާރުކުރުމަށް ކުރެވިދާނެ ހަތް ކަމެއް ތިރީގައި އެވަނީ އެވެ.
އާދަކޮށް ކުރާ ކަންކަން އަލުން ތަރުތީބުކުރުން
ޗުއްޓީގެ ދުވަސްވަރު އާންމުކޮށް ކަންކަން ކުރާ އުސޫލުތަކަށް ދޫދެވުމަކީ މައްސަލައެއް ނޫނެވެ. ނަމަވެސް، ސްކޫލް ހުޅުވޭ ދުވަސް ގާތްވަމުން އަންނައިރު، އާއިލާގެ ދިރިއުޅުމުގެ އާދަތައް މަޑުމަޑުން ކުރީގެ ތަރުތީބަށް ފެއްތުމަކީ މުހިންމު ކަމެކެވެ. އެގޮތުން ނިދާނެ ވަގުތެއް ކަނޑައެޅުމާއި، ހެނދުނު ހޭލަން އެލާމް ބެހެއްޓުމާއި، ސްކްރީން ބަލާ ވަގުތު މަދުކުރުމުގެ އިތުރުން ފިލާވަޅުތައް ހެދުމާއި ގޭތެރޭގެ މަސައްކަތްތަކަށް ވަގުތު ކަނޑައަޅާށެވެ. ސްކޫލް ފެށުމުގެ ކުރިން މިފަދަ އާދަތަކަށް ދަރިފުޅު އަހުލުވެރިކުރުވުމުން، ކިޔެވުން ފެށުމާއެކު އެކުދިންނަށް އެ މާހައުލަށް ހޭނެން ފަސޭހަވާނެ އެވެ.
ހެނދުނުގެ ނާސްތާ ދޫކޮށްނުލުން
ދިރިއުޅުމުގެ އާދަތަކަށް ބަލާއިރު، ހެނދުނުގެ ނާސްތާއަކީ ސިއްހީ ގޮތުން ރަނގަޅު ކާނާއަކުން ފެށުމަށް ދަރިފުޅަށް ހިތްވަރު ދޭންޖެހޭ ކަމެކެވެ. މީގެ ސަބަބުން ސްކޫލްގައި ހޭދަކުރާ ވަގުތުތަކުގައި ދަރިފުޅުގެ ހަކަތަ އިތުރުވުމުގެ އިތުރުން، ސިއްހަތަށް ފައިދާހުރި ކާނާ ކެއުމުގެ އާދަ ހަރުލައި، ސިކުނޑީގެ މަސައްކަތްތައް ހަލުވިވެ، ފޫހިވުމުން ދުރުކޮށްދެ އެވެ. ހެނދުނު ނާސްތާ ކުރުމަކީ ދަރިފުޅުގެ އާދައެއް ނޫން ނަމަ، ސްކޫލް ފެށުމުގެ ކުރިން އެ އާދަ އަށަގަންނުވަން ފަށާށެވެ.
ސްކޫލް ސާމާނު ހޯދުން
ސްކޫލް ހުޅުވުމުގެ އެންމެ ފަހު ދުވަހަށް މަޑުނުކޮށް، ކުރިއާލާ ސްކޫލް ސާމާނު ގަނެ، އެ މަސައްކަތް ނިންމާލާށެވެ. ދަރިފުޅަށް ބޭނުންވާނެ ހުރިހާ ސާމާނެއް ހަމަކޮށްދީގެން ފުރަތަމަ ދުވަހު ސްކޫލަށް ފޮނުވުމަކީ ކިޔެވުމަށް އެކުދިންނަށް ލިބޭނެ ބޮޑު ހިތްވަރެކެވެ. އަދި ސްކޫލަށް ބޭނުންވާ ތަކެތި ގަންނަން ދިއުމަކީ ދަރިފުޅުގެ ހިތުގައި ޝައުގުވެރިކަން އުފެދޭނެ ކަމެއް ވެސް މެއެވެ.
މުދައްރިސުންނާ މުއާމަލާތްކުރުން
ދަރިފުޅުގެ މުދައްރިސާ މުއާމަލާތު ކުރުމަށް ފަސްނުޖެހޭށެވެ. ސްކޫލް ފެށުމުގެ ކުރިން މުދައްރިސަށް މެސެޖެއް ފޮނުވައި، ދަރިފުޅާ ގުޅޭ ގޮތުން މުދައްރިސަށް އެނގެންޖެހޭ މުހިންމު ކަންކަން ހިއްސާކުރާށެވެ. ކިޔެވުން ކުރިއަށްދާއިރު މުދައްރިސުންނާއި ބެލެނިވެރިންނާ ދެމެދު އޮންނަ ގާތް ގުޅުމުގެ ފައިދާ ބެލެނިވެރިންނަށާއި، މުދައްރިސުންނަށާއި، ހާއްސަކޮށް ދަރިފުޅަށް ކުރާނެ އެވެ.
ސިއްހަތަށް ފައިދާހުރި މެންދުރުގެ ކެއުން
ހެނދުނުގެ އަވަސްއަރުވާލުން ކުޑަކުރުމަށްޓަކައި، ދަރިފުޅުގެ މެންދުރުގެ ކެއުން (ލަންޗް ބޮކްސް) ކުރީ ރޭ ތައްޔާރުކުރާށެވެ. ރޭގަނޑުގެ ކެއުމަށްފަހު ދަރިފުޅާއެކު ބައިވެރިވެގެން ޖެހިގެން އަންނަ ދުވަހުގެ ކެއުން ތައްޔާރުކުރުމަކީ އާދައަކަށް ހެދިދާނެ އެވެ. ތައްޔާރުކޮށް ނިމުމުން، ލަންޗް ބޮކްސް ދަރިފުޅުގެ ދަބަހަށް ލާށެވެ ނުވަތަ ފިނިކުރަން ޖެހޭ އެއްޗެއް ނަމަ ފްރިޖަށް ލާފައި ބަހައްޓާށެވެ. އޭރުން ހެނދުނު އޮންނާނީ ހުރިހާ ކަމެއް ތައްޔާރުވެފަ އެވެ.
ފިލާވަޅު ހަދަން ހަމަހިމޭން ތަނެއް ތައްޔާރުކުރުން
ބައެއް ކުދިންނަށް ފިލާވަޅު ހެދުމަކީ ފަސޭހަ ކަމަކަށް ވިޔަސް، އަނެއްބައި ކުދިންނަށް އެހީތެރިކަމާއި ހިތްވަރު ބޭނުންވެ އެވެ. ދަރިފުޅަކީ ކަންކަމަށް ސަމާލުކަން ދޭން އުނދަގޫ ކުއްޖެއް ނަމަ، ފިލާވަޅުތަކަށް ސަމާލުކަން ދެވޭނެ ފަދަ މާހައުލެއް ގާއިމުކޮށްދިނުން މުހިންމެވެ. އެއީ ކާ މޭޒު ކައިރީގައި ހުންނަ ގޮނޑިއެއް ކަމުގައި ވިޔަސް ނުވަތަ ވަކި ހާއްސަ ކޮޓަރިއެއް ކަމުގައި ވިޔަސް މައްސަލައެއް ނެތެވެ. މުހިންމީ ކުޅޭ އެއްޗިއްސާއި، ޓީވީ ނުވަތަ އެހެން މީހުންގެ އުނދަގުލެއް ނެތި ހަމަހިމޭންކަމާއެކު ފިލާވަޅު ނިންމާލެވޭނެ ތަނަކަށް އެތަން ވުމެވެ.
އާއިލާއަށް ވަގުތު ހުސްކުރުން
ސްކޫލް ދުވަސްވަރު އާންމުކޮށް އުޅެންޖެހެނީ ވަރަށް ބުރަކޮށެވެ. ފިލާވަޅު ހެދުމާއި އިތުރު ހަރަކާތްތަކުގެ ސަބަބުން އެހެން ކަންކަމަށް ވަގުތު ހޯދުން ދަތިވެދާނެ އެވެ. އެހެންނަމަވެސް، ކޮންމެ ދުވަހަކު ވެސް ސްކޫލް ނިމޭ ގަޑީގައި، ނުވަތަ ރޭގަނޑު ނުވަތަ ހަފުތާ ބަންދުގައި ވިޔަސް ދަރިފުޅާއެކު ވަގުތު ހޭދަކޮށް، ވާހަކަދައްކާލަން ހާއްސަ ވަގުތެއް ކަނޑައަޅާށެވެ. ދަރިފުޅުގެ ދިރިއުޅުމުގައި ހިނގާ ކަންކަމަށް ބެލެނިވެރިން ޝައުގުވެރިވާކަން ދައްކައި، މިނިވަންކަމާއެކު ވާހަކަދެއްކޭނެ މާހައުލެއް އުފައްދާށެވެ.
