ކުޅުދުއްފުށީ ސިޓީ ކައުންސިލުން އެ ރަށުގެ ތިން ސްކޫލަކަށް މި އަހަރު ދިނުމަށް ހަމަޖެހިފައިވާ "ސްކޫލް ގްރާންޓް" ހަވާލުކުރުމުގެ އެއްބަސްވުމުގައި އިއްޔެ ސޮއިކޮށްފި އެވެ.
މި ގްރާންޓް ލިބިފައިވަނީ ހދ. އަތޮޅު ތައުލީމީ މަރުކަޒަށާއި ޖަލާލުއްދީން ސްކޫލްގެ އިތުރުން އަފީފުއްދީން ސްކޫލަށެވެ. ގްރާންޓް އެއްބަސްވުމުގައި ސޮއިކުރެއްވީ ކުޅުދުއްފުށީގެ މޭޔަރު މުހައްމަދު އާތިފް އާއި ސްކޫލްތަކުގެ އިސްވެރިންނެވެ.
ކުޅުދުއްފުށި ސިޓީ ކައުންސިލުން ބުނީ ގްރާންޓަށް ހުޅުވާލުމުން ސްކޫލްތަކުން ޕްރޮޕޯޒަލްތައް ހުށަހަޅާފައިވާ ކަމަށެވެ. އެގޮތުން ފައިސާ ދޫކުރަން އެއްބަސްވުން ހެދީ އެ ޕްރޮޕޯޒަލްގައި ހިމެނޭ ކަންކަން ތަންފީޒު ކުރަން ކަމަށް އޭޏާ ވިދާޅުވި އެވެ.
މި ގްރާންޓްގެ މަގްސަދަކީ ކުޅުދުއްފުށީގެ ސްކޫލްތަކުގެ ފެންވަރު ރަނގަޅުކުރުމަށް ސްކޫލްތަކުގެ ވަސީލަތްތައް ތަރައްގީކޮށް، ދަރިވަރުންގެ ކުރިއެރުމަށް ސްކޫލްތަކުން ހިންގަމުން އަންނަ ހަރަކާތްތަކަށް އެހީތެރިވެ، ސްކޫލްތަކުގެ ޕީޓީއޭ އިން ސްކޫލްގެ ތަރައްގީއަށް ފަންޑް ހޯދުމަށް ކުރަމުން އަންނަ މަސައްކަތް ފާހަގަކޮށް އެ މަސައްކަތްތަކަށް ވެސް އެހީތެރިކަން ފޯރުކޮށްދިނުން ކަމަށް ކައުންސިލުން ބުންޏެވެ.
މި ގްރާންޓް ޕްރޮގްރާމްގެ ދަށުން 2024 އަހަރާއި 2025 ވަނަ އަހަރުވެސް ކޮންމެ ސްކޫލަކަށް އެއް ލައްކަ ރުފިޔާ ދޫކޮށްފައިވާއިރު، 2022 ވަނަ އަހަރު ކޮންމެ ސްކޫލަކަށް 50،000 ރުފިޔާ ދޫކޮށްފައިވެ އެވެ.
ކުޅުދުއްފުށި ސީޓީ ކައުންސިލުން އަންނަނީ އެ ރަށުގެ ތަރައްގީއަށް ގިނަ މަޝްރޫއުތައް ރާވައި ހިންގަމުންނެވެ. ނަމަވެސް ސަރުކާރުން އަންނަނީ ކައުންސިލްތަކުން ހިންގަމުންދާ އެކި މަޝްރޫއުތަކާއި މަސައްކަތްތަކަށް ހުރަސްއަޅަމުންކަން ފާހަގަކުރެވެ އެވެ. އެގޮތުން ހދ. އަތޮޅުގެ ރަށްތަކުން ހަދަން މަސައްކަތް ކުރާ ބޯޑު ހެދުމުގެ މަސައްކަތަށް ސަރުކާރުން ދަނީ ހުރަސް އަޅަމުންނެވެ.
