ހިއުމަން ރައިޓްސް ކޮމިޝަނަށް މި އަހަރު ހުށަހެޅި މައްސަލަތަކުގެ ތެރެއިން އެ ކޮމިޝަނުން ތަހުގީގުކުރަން ނިންމި މައްސަލަތަކުގެ ބޮޑުބައި ނުނިމޭކަމަށް ތަފާސްހިސާބުތަކުން ދައްކައިފި އެވެ.
އެޗްއާރުސީއެމްއިން އާންމުކޮށްފައިވާ ތަފާސްހިސާބުތަކުގައި ވާގޮތުން، މި އަހަރުގެ އޯގަސް`ޓު 31 ގެ ނިޔަލަށް އެ ކޮމިޝަނަށް ޖުމުލަ 589 ޝަކުވާއެއް ހުށަހަޅާފައިވެ އެވެ. އޭގެ ތެރެއިން ތަހުގީގުކުރަން އެޗްއާރުސީއެމުން ނިންމާފައި ވަނީ 284 މައްސަލަ އެވެ.
އެޗްއާރުސީއެމުން މި އަހަރު ތަހުގީގުކުރަން ނިންމި މައްސަލަތަކުގެ ތެރެއިން މިހައިތަނަށް ނިންމިފައި ވަނީ 96 މައްސަލަ އެވެ. ބާކީ 188 މައްސަލަ އަދިވެސް އެ ކޮމިޝަނުން ދަނީ ތަހުގީގުކުރަމުންނެވެ.
އެ ރިޕޯޓުގެ މުއްދަތުގައި ކުރީ އަހަރުތަކުގެ މައްސަލަތައް ހިމަނައިގެން ޖުމުލަ 297 މައްސަލައެއް އެޗްއާރުސީއެމުން ނިންމާފައިވެ އެވެ.
އެޗްއާރުސީއެމުން އާންމުކޮށްފައިވާ މައުލޫމާތުން އެނގޭގޮތުގައި، ކުރީގެ އަހަރުތަކުގައި އެ ކޮމިޝަނަށް ހުށަހެޅުނު މައްސަލަތަކުގެ ތެރެއިން 415 މައްސަލައެއް އަދިވެސް ތަހުގީގުކޮށް ނިމިފައި ނުވެ އެވެ. އޭގެ ތެރެއިން 102 މައްސަލައަކީ ދެ އަހަރަށްވުރެ މުއްދަތު އިތުރުވެފައިވާ މައްސަލަތަކެވެ.
އެޗްއާރުސީއެމްގައި ނުނިމި ހުރި މައްސަލަތައް
| Label | Value |
|---|---|
| 2021 | 5 |
| 2022 | 8 |
| 2023 | 20 |
| 2024 | 69 |
| 2025 | 125 |
| 2026 | 188 |
އެޗްއާރުސީއެމްއިން އާންމުކުރި ތަފާސްހިސާބުތަކުގައި ވާގޮތުން އެ ކޮމިޝަނަށް އެންމެ ގިނައިން މައްސަލަ ހުށަހަޅާފައި ވަނީ ކަރެކްޝަނަލް ސާވިސް އާއި ފުލުހުންގެ ހިދުމަތާ ގުޅޭ ގޮތުންނެވެ. އެގޮތުން، ކަރެކްޝަނަލް ސާވިސްގެ ބެލުމުގެ ދަށުގައި ތިބޭ މީހުންގެ ފަރާތުން 254 މައްސަލައެއް ހުށަހަޅާފައިވާއިރު، ފުލުހުންނާ ގުޅޭ 234 މައްސަލައެއް އެ ކޮިމޥަނަށް ހުށަހަޅާފައިވެ އެވެ.
އޭގެ ތެރޭގައި އެންމެ ގިނައިން ހިމެނެނީ އެ ދެ މުއައްސަސާގެ ބެލުމުގެ ދަށުގައި ތިބޭ މީހުންގެ ސިއްހީ ހާލަތާ ގުޅުންހުރި މައްސަލަ ކަމަށް އެ ރިޕޯޓުގައިވެ އެވެ.
