ޕެންޝަން އޮފީހުގެ ޗީފް އޮޕަރޭޓިން އޮފިސަރު (ސީއޯއޯ) ގެ މަގާމުން މަރިޔަމް ޝިއުނާ ވަކިކޮށްފި އެވެ.
ޕެންޝަން ބޯޑުގެ ބައެއް މެންބަރުންގެ ހިތްހަމަނުޖެހުންތަކެއް ހުރުމުން މިދިޔަ ސެޕްޓެމްބަރު 23، އިން ފެށިގެން އޭނާ ހުރީ ސަސްޕެންޑުކޮށްފަ އެވެ. މިއަދުގެ ވަގުތެއްގައި އޭނާ މަގާމުން ވަކިކޮށްފައިވާކަން ވަނީ ކަށަވަރުކުރެވިފަ އެވެ.
އަދަދު އަށް މައުލޫމާތު ލިބިފައިވާ ގޮތުގައި އޭނާ ވަކިކުރީ ޕެންޝަން އޮފީހުގެ ޗެއާޕާސަން އަބްދުލްމަޖީދު އަލީއާ ގުޅުންހުރި މައްސަލައެއްގައި ހުރި ކަންބޮޑުވުންތައް، އެކަމަށް ކަނޑައެޅިފައިވާ އުސޫލުތަކުގެ ތެރެއިން ކަމާބެހޭ ރެގިއުލޭޓަރީ އިދާރާގެ ސަމާލުކަމަށް ގެނައުމުންނެވެ.
އޭގެ އިތުރުން އޭނާ ވަކިކުރި ސަބަބުތަކުގެ ތެރޭގައި ޕެންޝަން އޮފީސް މެދުވެރިކޮށް ސަރުކާރުން ފައިސާ ޗާޕުކުރި މުއާމަލާތާ ދެކޮޅު ހެދުން ހިމެނެ އެވެ.
ޝިއުނާ ޕެންޝަން އޮފީހާ ގުޅިވަޑައިގަތީ އެޕްރީލް، 2023، ގަ އެވެ. އޭގެ ކުރިން ޝިއުނާ ހުންނެވީ އޭސީސީގެ ރައީސްގެ މަގާމުގަ އެވެ. އަދި ޓްރާންސްޕޭރެންސީ މޯލްޑިވްސްގެ އެގްޒެކެޓިވް ޑިރެކްޓަރުކަން ވެސް އޭނާ ކުރެއްވި އެވެ.
ޔުނިވާސިޓީ އޮފް ލަންޑަންގެ ސްކޫލް އޮފް އޮރިއެންޓަލް އެންޑް އެފްރިކަން ސްޓަޑީޒްއިން އިންޓަރނޭޝަނަލް ޑިވެލޮޕްމަންޓް ދާއިރާއިން މާސްޓާސް ޑިގްރީ އަދި ލަންޑަން މެޓްރޮޕޮލިޓަން ޔުނިވަސިޓީން ބެޗްލާ އޮފް އާޓްސް އިން ހިސްޓްރީ ޝިއުނާ ހާސިލްކުރައްވާފައިވެ އެވެ.






