ވެރިކަންކުރާ ޕީއެންސީ އާއެކު އަދާލަތު ޕާޓީން ކޯލިޝަން ހެދުމަކީ އެ ޕާޓީ އުވުމުގެ ފެށުން ކަމަށް ވިދާޅުވެ އަދާލަތު ޕާޓީގެ ކުރީގެ ނައިބުރައީސް، އަލީ ޒާހިރު އެކަމަށް ފާޑުވިދާޅުވެއްޖެ އެވެ.
އެކްސްގައި ފިލި ނުޖައްސަވައި އަލީ ޒާހިރު ކުރެއްވި ޕޯސްޓެއްގައި ވިދާޅުވީ މިއަދަކީ ހިތާމަވެރި ދުވަހެއް ކަމަށެވެ. ނަމަވެސް، "އެމީހެއްގެ ރޮނޑުން ހަންދަމަން އެނގޭނީ އެ މީހަކަށް" ކަމަށް އޭނާ ލިޔުއްވައިފައިވެ އެވެ.
"އެންމެ ދުވަސްވީ ޕާޓީތަކުގެ ތެރޭގައި ހިމެނޭ ޕާޓީއެއް ނެތިގެން އުވިގެން ދާތަން ފެނުނީމަ ހިތާމަކުރަން، ވަރަށް ގިނަ ބައެއްގެ އުއްމީދުތަކާއި ބުރަ މަސައްކަތް ފޮހެވިގެން މި ދަނީ،" އަލީ ޒާހިރު ކުރެއްވި ޕޯސްޓުގައި ލިޔުއްވައިފައިވެ އެވެ.
އަދާލަތު ޕާޓީގެ ތަރުޖަމާނުކަމާއި އެ ޕާޓީގެ ނައިބުރައީސްކަން ކުރެއްވި އަލީ ޒާހިރު މިފަދަ ޕޯސްޓެއް ކުރައްވައިފައި މި ވަނީ 2028 ގެ ރިޔާސީ އިންތިހާބުގައި ރައީސް މުހައްމަދު މުއިއްޒުއަށް ތާއީދުކޮށް، ޕީއެންސީއާއެކު އަދާލަތު ޕާޓީން މިއަދު ކޯލިޝަން ހަދާފައި ވަނިކޮށެވެ.
އަދާލަތު ޕާޓީއަކީ މި ވަގުތު ހިންގަމުންދާ ޕާޓީތަކުގެ ތެރެއިން ދެވަނައަށް އެންމެ ދޮށީ ސިޔާސީ ޕާޓީ އެވެ. އެ ޕާޓީ ރެޖިސްޓްރީކުރީ އޯގަސްޓު 18، 2005 ގަ އެވެ.
މި ވަގުތު 5736 މެންބަރުން ތިބި އަދާލަތު ޕާޓީއަކީ ނިމިދިޔަ އެމްޑީޕީގެ ވެރިކަމުގައި އެމްޑީޕީގެ ވެސް ކޯލިޝަން ބައިވެރިއެކެވެ. އަދި، އޭގެ ކުރިން 2013 އިން 2018 ކުރި ޕީޕީއެމްގެ ވެރިކަމުގެ މެދަކާ ހަމައަށް އަދާލަތަކީ ޕީޕީއެމްގެ ވެސް ކޯލިޝަން ބައިވެރިއެކެވެ.
ޕީއެންސީއާއެކު ކޯލިޝަން ހެދުމަށް އަދާލަތު ޕާޓީގެ މަޝްވަރާ މަޖިލީހުން ނިންމީ މިދިޔަ ހޮނިހިރު ދުވަހު އެވެ.
އަދާލަތު ޕާޓީން މިގޮތަށް ނިންމާފައި މި ވަނީ، ރަސްމާލެ ފަދަ ބިޔަ މަޝްރޫޢުތަކުގެ ދަށުން ބިދޭސީންނާއި އެހެން ދީންތަކުގެ މީހުން ރާއްޖޭގައި ވަޒަންވެރިކުރުވުމަށް ސަރުކާރުން މަސައްކަތްކުރަމުން ދަނިކޮށެވެ.
ސަރުކާރާއި އަދާލަތު ޕާޓީގެ އިތުބާރު ކުރެވޭ މަސްދަރުތަކުން އަދަދު ނޫހަށް މައުލޫމާތު ދިން ގޮތުގައި، މިގޮތަށް އެ ޕާޓީން ނިންމުމާއެކު ސަރުކާރުގެ އިސް މަގާމުތައް އެ ޕާޓީގެ ބައެއް މެންބަރުންނަށް ދޭނެ އެވެ.








