ޔުނިވާސިޓީ އޮފް އީސްޓް އެންގްލިއާ (ޔޫއީއޭ) އިން ކުރި އާ ދިރާސާއަކުން ދައްކާ ގޮތުގައި، ކެންސަރަށް ފަރުވާ ދިނުމަށް ޓެސްޓުކުރަމުންދާ ބޭހަކުން ކަށީގެ ބައްޔެއް ކަމަށްވާ އޮސްޓިއޯޕޮރޯސިސް ހުއްޓުވައި، މެދުއުމުރުގެ އަންހެނުންގެ ހަށިގަނޑުގެ ބަރުދަން އެއްވަރެއްގައި ހިފެހެއްޓުމަށް އެހީތެރިވެދެ އެވެ.
"އެންޕީޖޭ ޑްރަގް ޑިސްކަވަރީ" މަޖައްލާގައި ޝާއިޢުކޮށްފައިވާ މި ދިރާސާގައި ބުނެފައިވަނީ، އަސްލު ކެންސަރާ ދެކޮޅަށް އުފެއްދި މި ބޭހަކީ ކަށި ފީވުމުން ރައްކާތެރިކޮށްދިނުމުގެ އިތުރުން، ހަށިގަނޑުގެ ސަރުބީ މަދުކޮށް، އިއްދައިން ވަކިވުމާ ގުޅިގެން މެޓަބޮލިޒަމަށް އަންނަ ބައެއް ބަދަލުތައް އިޢާދަކޮށްދޭ މާއްދާއެއް ކަމަށެވެ.
"ސީއޭޑީޑީ522"ގެ ނަމުން ނަންދެވިފައިވާ މި ބޭހަކީ ބައެއް ބާވަތްތަކުގެ ކެންސަރު ފެތުރުމަށް އެހީތެރިވާ ޕްރޮޓީނެއް ހުއްޓުވުމަށް އުފެއްދި ބޭހެކެވެ. ނަމަވެސް، އުމުރުން ދުވަސްވެފައިވާ މީދާ ބޭނުންކޮށްގެން ކުރި ޓެސްޓުތަކުން ސައިންސްވެރިންނަށް ފާހަގަވީ، މި ބޭހުގެ ސަބަބުން ކަށިތައް ވަރުގަދަވުމުގެ އިތުރުން، ހަށިގަނޑުގެ ބަރުދަން ލުއިކޮށް ބެހެއްޓުމަށް ވެސް އެހީތެރިވެދޭ ކަމެވެ.
މި ދިރާސާގައި އިސްކޮށް އުޅުއްވި ޔޫއީއޭގެ ނޮރިޗް މެޑިކަލް ސްކޫލްގެ ޑރ. ޑަރެލް ގްރީން ވިދާޅުވި ގޮތުގައި، އުމުރުން 50 އަހަރުން މަތީގެ ކޮންމެ ތިން އަންހެނަކުން އެކަކަށް ކަށި ފީވުމުގެ މައްސަލަ ކުރިމަތިވެ އެވެ. މީގެ ސަބަބުން ކަށިތައް ބިންދައިގެން ދިއުމުގެ ފުރުސަތު ބޮޑުވެ، ދިރިއުޅުމުގެ ފެންވަރަށް ނޭދެވޭ އަސަރުތަކެއް ކުރެ އެވެ.
"މިހާރު ވެސް މި ބައްޔަށް ފަރުވާތައް އެބަހުރި. ނަމަވެސް އޭގެ ތެރެއިން ގިނަ ފަރުވާތަކަކީ ނޭދެވޭ އަސަރުތައް ގިނަ، ރައްކާތެރިކަމުގެ ކަންބޮޑުވުންތައް ހުރި ނުވަތަ ގަވާއިދުން ބޭނުންކުރަން އުނދަގޫ ފަރުވާތަކެއް ކަމުން، ދިގު މުއްދަތަކަށް އެ ބޭނުންކުރުން ވަނީ ދަތިވެފައި،" ޑރ. ގްރީން ވިދާޅުވި އެވެ.
އޭނާ އިތުރަށް ވިދާޅުވީ، މި ދިރާސާގެ ސަބަބުން މި ބައްޔަށް ފަރުވާކުރާނެ މުޅިން އާ ގޮތެއް ފެނިފައިވާ ކަމަށެވެ.
"އަޅުގަނޑުމެންނަށް ފެނުނު ގޮތުގައި، އަސްލު ކެންސަރު ހުއްޓުވުމަށް އުފެއްދި ބޭހަކުން، ކަށިތައް ބަލިކަށިވުމާއި މެދުއުމުރުގައި ބަރުދަން އިތުރުވުމުގެ ދެ މައްސަލައާ ކުރިމަތިލާންޖެހިފައިވާ އެތައް މިލިއަން އަންހެނުންނަށް އެހީތެރިކަން ލިބިދާނެ،" ޑރ. ގްރީން ވިދާޅުވި އެވެ.
މައުލޫމާތު: މެޑިކަލް އެކްސްޕްރެސް
