ރަށްރަށުގެ ރަށްވެހިކަން ދޫކޮށްލާއިރު، ރާއްޖޭގެ ބައެއް ކައުންސިލްތަކުން މާބޮޑެތި ފީތައް ނަގަމުންދާ ކަމަށް ބުނެ އެކަން ވެސް ކޮންޓްރޯލް ކުރުމަށް ގަވާއިދެއް ހަދަން ނިންމާފައިވާ ކަމަށް ލޯކަލް ގަވަމެންޓް އޮތޯރިޓީގެ ސީއީއޯ، މުހައްމަދު ނިމާލު ވިދާޅުވެއްޖެ އެވެ.
ސަން އޮންލައިންއަށް އޭނާ ދެއްވި އިންޓަވިއުއެއްގައި ވިދާޅުވީ ރަށްވެހިކަން ދޫކޮށްލާނަމަ، ބައެއް ރަށްރަށުގެ ކައުންސިލްތަކުން މާބޮޑެތި ފީތައް ނަގަމުންދާ ކަމަށެވެ. އެގޮތުން، ބައެއް ކައުންސިލްތަކުން އެޑްމިނިސްޓްރޭޓިވް ފީއެއްގެ ގޮތުގައި 5000ރ. ވެސް ނަގަން ނިންމާފައިވާ ކަމަށް ވިދާޅުވެ އެކަމަށް ނިމާލް ވަނީ ފާޑުވިދާޅުވެފަ އެވެ.
"މިހާރު 5،000 ރިފިޔާއިން 6،000 ރުފިޔާއިން ފީދައްކަން ވެއްޖިއްޔާ އާންމު މީހާއަށް ވަރަށް ބޮޑު ތަކުލީފަކަށް ދޯ އެކަން ވާނީ. ވިސްނަވާ ދެމަފިރިންނާ ދަރިޔަކު ބަދަލުވާން ވިޔަސް އޭރުން ދައްކަން އެބަޖެހޭ 15،000 ރުފިޔާ. ބޮޑު ހަރަދެއްނު އެއީ ވެސް،" ނިމާލް ވިދާޅުވެފައިވެ އެވެ.
ރަށްރަށުގެ ރަށްވެހިކަން ދޫކޮށްލާނަމަ، އެޑްމިނިސްޓްރޭޓިވް ފީގެ ގޮތުގައި ނަގާ އަދަދު ކައުންސިލްތަކުން ބޮޑުކުރަނީ ރަށްރަށުގެ އާބާދީ މަދުވުން ކޮންޓްރޯލް ކުރުމަށެވެ. ނަމަވެސް، އެއީ ހައްލެއް ހޯދަންޖެހޭ މައްސަލައެއް ކަމަށް ނިމާލް ވިދާޅުވެފައިވެ އެވެ.
"އަޅުގަނޑުމެން ވަރަށް އަވަހަށް އެކަމާ ބެހޭ [ކައުންސިލްތަކުން ބޮޑެތި އަދަދުތަކުން ފީނެގުމާބެހޭ] އުސޫލެއް ނެރޭނަން،" ނިމާލް ވިދާޅުވި އެވެ.
މިފަކަށް އައިސް އެލްޖީއޭއިން ދަނީ ކައުންސިލްތަކުގެ ބާރުތައް ހަނިކޮށް، ލޯކަލް ކައުންސިލްތައް ކޮންޓްރޯލް ކުރުމަށްޓަކައި ތަފާތު އެކި ގޮތްގޮތުން މަސައްކަތް ކުރަމުންނެވެ.
އެގޮތުން، އެލްޖީއޭގެ ހުއްދަ ހޯދުމަކައި ނުލައި ރަށްރަށުގެ ކައުންސިލްތަކުގެ ވަޒީފާތަކަށް އިއުލާނުކުރުން ވެސް އެ އޮތޯރިޓީން ވަނީ މަނާކޮށްފަ އެވެ.
މި މަހުގެ ކުރީކޮޅު ނިމާލް ސޮއިކުރައްވައި ރަށްރަށާއި ސިޓީތަކުގެ ކައުންސިލްތަކަށް ފޮނުވި ސިޓީއެއްގައި ބުނެފައި ވަނީ އެއީ ސަރުކާރުގެ ހަރަދު ކުޑަކުރުމުގެ ސިޔާސަތުގެ ދަށުން އަޅާ ފިޔަވަޅެއް ކަމަށެވެ. ލިޔުމުން ހުއްދަ ނުދޭނަމަ، އެއްވެސް ކައުންސިލެއްގެ ވަޒީފާއަށް މީހުން ނެގުން އެލްޖީއޭއިން ވަނީ މަނާކޮށްފަ އެވެ.
