ކައުންސިލްތަކަށް މުވައްޒަފުން ނެގުމުގެ ކުރިން ލޯކަލް ގަވަމަންޓް އޮތޯރިޓީ (އެލްޖީއޭ) ގެ ހުއްދަ ހޯދަން އެންގީ ގާނޫނާ ހިލާފަށް ކަމަށް ކުޅުދުއްފުށި ސިޓީގެ މޭޔަރު އަހްމަދު އާތިފް މިއަދު ވިދާޅުވެއްޖެ އެވެ.
ސޯޝަލް މީޑިއާގައި އާތިފް ކުރެއްވި ޕޯސްޓެއްގައި އާތިފް ވިދާޅުވީ އޮތޯރިޓީގެ މެންޑޭޓާއި، ގާނޫނީ އިމުގެ ބޭރުން މިފަދަ އެންގުންތައް އަންގާ، ކައުންސިލްތަކުގެ މަސައްކަތަށް ހުރަސްއަޅަމުން ދާދިއުން ހަރުކަށި އިބާރާތުން ކުށްވެރިކުރާ ކަމަށެވެ.
އެލްޖީއޭގެ ސީއީއޯ މުހައްމަދު ނިމާލް ސޮއިކުރުމަށްފަހު ކައުންސިލްތަކުގެ ރައީސުންނަށް ފޮނުވާފައިވާ ސިޓީގައި ބުނީ އެލްޖީއޭގެ ހުއްދަ ހޯދުމަކާ ނުލައި ރަށްރަށުގެ ކައުންސިލްތަކުން ވަޒީފާތަކަށް އިއުލާންކުރުން މަނާކުރީ ސަރުކާރުގެ ހަރަދުކުޑަކުރުމުގެ ސިޔާސަތުގެ ދަށުން ކުރި ކަމެއް ކަމަށެވެ.
އެލްޖީއޭގެ ހުއްދަ ނެތި ކައުންސިލްތަކުން ވަޒީފާއަށް މީހުން ނެގުން މަނާކޮށްފި
ސަރުކާރުގެ ހަރަދު ކުޑަކުރުމުގެ ސިޔާސަތުގެ ދަށުން، އެލްޖީއޭގެ ހުއްދަ ނެތި ކައުންސިލްތަކުން ވަޒީފާއަށް މީހުން ނެގުން އެ އޮތޯރިޓީން މަނާކޮށްފިއެވެ. މި ނިންމުމުގެ ދަށުން ދާއިމީ މަގާމުތަކާއި، ކޮންޓްރެކްޓް އަދި ދުވަހު މުސާރައަށް ނަގާ މުވައްޒަފުން ހިމެނޭ ގޮތަށް އެއްވެސް ވަޒީފާއަކަށް މީހަކު ނެގޭނީ އެލްޖީއޭގެ ލިޔުމުން ލިބޭ ހުއްދައަކާ އެކުގައެވެ.
މިގޮތުން ލިޔުމުން ހުއްދަ ނުލިބޭނަމަ އެއްވެސް މުވައްޒަފަކު ކައުންސިލެއްގެ ވަޒީފާއިން ނެގުން އެލްޖީއޭއިން ވަނީ މަނާކޮށްފަ އެވެ.
އޭގެ ތެރޭގައި ދައުލަތުގެ ބަޖެޓާއި ކައުންސިލުގެ ބަޖެޓުން ހަރަދުކޮށްގެން އަލަށް އުފައްދާ ނުވަތަ ހުސްވާ ދާއިމީ މަގާމުތައް ހިމެނެ އެވެ. ދުވަހު މުސާރައަށް މަސައްކަތްކުރާ މުވައްޒަފުންނާއި ކޮންޓްރެކްޓް މުވައްޒަފުން ވެސް ހިމެނެ އެވެ.
އެލްޖީއޭއިން މިފަދަ އުސޫލެއް ހަދާފައިވާއިރު ރަށްތަކާއި ސިޓީ ކައުންސިލުތަކުގެ އިހުތިސޯސުގެ ތެރޭގައި ހިމެނޭ ބިންތައް ސަރުކާރަށް ބޭނުން އިރެއްގައި ނެގޭ ގޮތަށް ލާމަރުކަޒީ ގާނޫނަށް ގެނައި ބަދަލު އިއްޔެ ވަނީ ތަސްދީގުކޮށްފަ އެވެ.
