ފާސްކޮށްފައިވާ ޖަބެޓާ އެއްގޮތަށް ފިނޭންސް މިނިސްޓްރީން މާލޭ ސިޓީ ކައުންސިލަށް ދޭންޖެހޭ 19 މިލިއަން ރުފިޔާ ކަނޑާލުމުންނާއި ލިބެމުންދިޔަ ވެހިކަލް ފީތައް ނުލިބޭ ގޮތަށް ގާނޫނު ބަދަލުކުރުމުން ރައްޔިތުންނަށް ހިދުމަތްތައް ފޯރުކޮށްދޭން ދަތިވާނެ ކަމަށް މާލެ ސިޓީގެ މޭޔަރު އާދަމް އާޒިމް އިއްޔެ ވިދާޅުވެއްޖެ އެވެ.
މާލެ ސިޓީ ކައުންސިލުން ބޭއްވި ރަސްމީ ޖަލްސާގައި އާޒިމް ވިދާޅުވީ މާލެ ސިޓީ ކައުންސިލް ހިންގުމަށް ދަތިވާނެ އެތައް ކަމެއް ސަރުކާރުން ކުރަމުންދާ ކަމަށެވެ. އެގޮތުން ގްރާންޓާއި ލިބެމުންދިޔަ ވެހިކަލް ފީތައް ކަނޑާލުމުން ރަނގަޅަށް ބަލަހައްޓަމުންދިޔަ މިސްކިތްތައް ބެލެހެއްޓުމަށް ކުރިއަށް އޮތްތަނުގައި ދަތިތައް ދިމާވާނެ ކަމަށް މޭޔަރު ވިދާޅުވި އެވެ.
"މިތަން ހިންގުމަށް ދަތިވާނެ އެތައް ކަމެއް ސަރުކާރުން ކުރަމުންދާކަން އަޅުގަނޑު ހަމަ ކައުންސިލްގެ މެންބަރުންގެ މައުލޫމާތަށްޓަކައި ހަމަ ހިއްސާކޮށްލަން ބޭނުންވޭ. ދެން އަޅުގަނޑުމެން މަސައްކަތްކުރާނީ ވިހާވެސް ހަރަދުކުޑަކޮށް މިތަން ހިންގޭތޯ،" އާޒިމް ވިދާޅުވި އެވެ.
"އެހެންނަމަވެސް އަޅުގަނޑު ފާހަގަކޮށްލަން ބޭނުންވޭ އަޅުގަނޑުމެންނަށް ލިބޭ ފައިސާގެ ތެރެއިން ގްރާންޓް ކަނޑާލުމާ ގުޅިގެން އަޅުގަނޑުމެން މިސްކިތްތައް ވަރަށް ފުރިހަމަކޮށް ބަލަހައްޓަމުން އެބަދަން. ނަމަވެސް މިސްކިތްތައް ބެލެހެއްޓުމަށް ބޮޑެތި ގޮންޖެހުންތައް ދިމާވާނެކަން އަޅުގަނޑު ފާހަގަކޮށްލަން ބޭނުންވޭ. ގްރާންޓް ކަނޑާލީމަ. އަޅުގަނޑުމެންގެ ވެހިކަލް ފީ ކަނޑާލީމަ."
މީގެއިތުރުން އާޒިމް ވިދުވީ ކައުންސިލަށް ލިބެންޖެހޭ ފައިސާ ހިފެހެއްޓުމުން މަގުތައް ހެދުމަށާއި މުވައްޒަފުންނަށް މުސާރަ ދިނުމުގެ އިތުރުން ފްލެޓްތަކުގެ މެއިންޓަނަންސް ކަންކަން ކުރުމަށްވެސް ދަތިތައް ދިމާވާނެ ކަމަށެވެ.
މި ސަރުކާރުން އަންނަނީ ކައުންސިލުން ރައްޔިތުންނަށް ވީ ވައުދުތައް ފުއްދުމަށް ކުރަމުންދާ މަސައްކަތަށް ހުރަސްއަޅަމުންކަން ފާހަގަކުރައްވާ އާޒިމް ވިދާޅުވީ އެކަން ސަރުކާރުން ކުރަމުންދަނީ ގާނޫނުތަކަށްވެސް ބަދަލު ގެނެސްގެން ކަމަށެވެ.
"ރައްޔިތުން މިއަދު ގަބޫލުކުރޭ މި ކައުންސިލުން އެ ލިބޭ ފައިސާއިން ރަނގަޅަށް މިތަން ހިންގާކަމާއި މަގުތައްވެސް ހަދާ ކަމާއި، މިސްކިތްތައް ބަލަހައްޓާކަމަށާއި، ފްލެޓްތައް ބަލަހައްޓާކަމާއި،ޕާކުތައް ހަދާކަމާއި، ޕާކުތައް ބަލަހައްޓާ ކަމާއި، އަދި ވިލިމާލެ، މާލޭގައި ގިނަ މަގުތަކެއް ހަދާ ނިމިފައިވާކަން ހުރިހާ ރައްޔިތުން ފާހަގަކުރޭ. އެހެންނަމަވެސް މި އައި ބަދަލާ ގުޅިގެން ރައްޔިތުންނަށް ގިނަ ގޮންޖެހުންތައް ހުންނާނެ ކަމަށް އަޅުގަނޑު ލަފާކުރަނީ،" މޭޔަރު ވިދާޅުވި އެވެ.
ނަމަވެސް އާޒިމް ވިދާޅުވީ މާލެ ސިޓީ ކައުންސިލުން އުންމީދު ކަނޑާނުލައި، ކައުންސިލަށް ލިބޭ އެއްޗަކުން ރައްޔިތުންނަށް ހިދުމަތްތައް ފޯރުކޮށްދެވޭތޯ މަސައްކަތްތައް ކުރަމުންދާނެ ކަމަށެވެ.
ބަޖެޓުގައިވާ ގޮތުން ސިޓީ ކައުންސިލަށް ބްލޮކް ގްރާންޓުގެ ގޮތުގައި 19،285،734 ރުފިޔާ ދޭންޖެހެ އެވެ. ޒަރީރު ނިންމީ އޭގެ ތެރެއިން 19 މިލިއަން ރުފިޔާ ކަނޑާލުމަށެވެ. އެއިރުން ކައުންސިލަށް ދެން ލިބޭނީ އެންމެ 285،734 ރުފިޔާ އެވެ.
އެ މައްސަލައިގައި ސިޓީ ކައުންސިލުން ޒަރީރަށް ފޮނުވި ސިޓީއެއްގައި ބުނެފައި ވަނީ، ބްލޮކް ގްރާންޓް ކަނޑާލައިފި ނަމަ އެ ކައުންސިލުގެ މުވައްޒަފުންނަށް މުސާރަ އާއި އެލެވެންސް ނުދެވޭނެ ކަމަށެވެ. އެ ސިޓީގައި ކައުންސިލުން އެދިފައި ވަނީ އެކަމާ ގުޅޭ ގޮތުން މަޝްވަރާ ކުރުމަށެވެ.
