ލޯކަލް ގަވަމަންޓް އޮތޯރިޓީ (އެލްޖީއޭ) ގެ ބޯޑަށް ކައުންސިލަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ ރައީސުންގެ ތެރެއިން މެންބަރުން ހޮވުމުގެ އިންތިހާބު އޮޅުވާލަން އުޅޭ ކަމަށް ވިދާޅުވެ، ކައުންސިލަރުންނަށް ސީރިއަސް ތުހުމަތުތަކެއް އެލްޖީއޭގެ ސީއީއޯ މުހައްމަދު ނިމާލު ކުރައްވައިފި އެވެ.
ޓީވީއެމް އިން ކުރިއަށްގެންދިޔަ "އަހާށޭ ބުނާނަން" ޕްރޮގްރާމުގައި ނިމާލް ވިދާޅުވީ އިންތިހާބު ނުބާއްވަން ނިންމީ އިންތިހާބުގައި ވޯޓުލާން ނުދާ ކައުންސިލަރުންގެ ބަދަލުގައި އެލްޖީއޭގެ ބްރާންޗުތަކުގައި ތިބި މުވައްޒަފުން ވޯޓުލައި ކައުންސިލަރުން އައި ކަމަށް ހަދަން އުޅޭ ކަމުގެ ޝަކުވާ ލިބުމާ ގުޅިގެން ކަމަށެވެ.
ނަމަވެސް ނިމާލްއަށް މިފަދަ ޝަކުވާތަކެއް ލިބުނީ ރަސްމީކޮށް ކަމެއް އޭނާ ވިދާޅެއް ނުވެ އެވެ. އޭނާ ވިދާޅުވީ އެލްޖީއޭގެ ބްރާންޗުތަކުގައި ތިބީ އަތޮޅު ކައުންސިލްތައް އުވާލިއިރު ތިބި ވަކި ސިޔާސީ ފިކުރެއްގެ ބައެއް ކަމަށެވެ.
"ބައެއް ކައުންސިލްތަކުން ނޫނީ އެމީހުން އެބަ ރާވައޭ އިންތިހާބުގައި ވޯޓުލާން ނުދާން. އެކަމަކު ސިޔާސީ ވަކި ފިކުރެއްގެ ބަޔަކު އެލްޖީއޭގެ ބްރާންޗުތަކުގައި ތިބީމާ އެބޭފުޅުން ބެލުމުގެ ދަށުގައި ދޯއޭ ވޯޓު ފޮށިތައް ހުރީ. އެހެންވީމަ ނާންނަ މީސްމީހުންގެ ވޯޓު ކަރުދާސްކޮޅުގެ ތެރޭގައި ފާހަނގަ ލާފައި ވޯޓާސް ރަޖިސްޓްރީން އޭނަ އައިކަން ފާހަގަކޮށްފައި،" ނިމާލް ވިދާޅުވި އެވެ.
"ދެން ވަރަށް ރަނގަޅެއް ނުންހެއްޔޭ ކައުންސިލަރުން ނުދެއޭ ވޯޓު ލާކަށް. އެކަމަކު ނަތީޖާ ނުކުންނައިރުގައި އެހެންވީމަ އެލްޖީއޭ އެ ބަދުނާމުން ސަލާމަތްވުމަށްޓަކައި އަޅުގަނޑުމެން ނިންމި ނިންމުމެއް އެއީ. އެއީ ހަމަ އަޅުގަނޑު ނިންމި ނިންމުމެއް އެނގޭތޯ އެއީ. މިދެންނެވީ އެ ޝަކުވާތައް އެހެން އަންނާތީވެ."
މި މައްސަލަ ހައްލުކުރުމަށް މާލޭގައި ތިބި އެލްޖީއޭގެ މުވައްޒަފުން ރަށްރަށަށް ފޮނުވައިގެން އިންތިހާބުގެ ކަންކަން ކުރިއަށްގެންދަން ނިންމާފައިވާ ކަމަށް ނިމާލް ވިދާޅުވި އެވެ.
އެލްޖީއޭގެ ބޯޑަށް ކައުންސިލަރުން ހޮވާ އިންތިހާބު ބާއްވާ ތާރީހެއް އަދިވެސް ނޭނގޭ
އެލްޖީއޭގެ ބޯޑަށް ކައުންސިލަރުންނާއި ޑަބްލިއުޑީސީގެ ރައީސުން އިންތިހާބުކުރުމަށް އޮގަސްޓް 8، ގައި ބާއްވަން އުޅުނު އިންތިހާބު ފަސްކުރުމަށްފަހު، އެ އިންތިބުހާބާއްވާނެ ތާރީހެއް އަދިވެސް ކަނޑައެޅިފައި ނުވާކަމަށް އެލްޖީއޭއިން ބުނޭ. މި އިންތިބުހާގައި ސިޓީ ކައުންސިލްތަކާއި ރަށު ކައުންސިލްތަކުގެ އިތުރުން ޑަބްލިއުޑީސީތަކުން މެންބަރުން ވާދަކުރޭ.
ނިމާލް ވިދާޅުވީ އިންތިހާބު މުއްދަތެއް ނެތް ގޮތަށް ފަސްކުރެވުނީ ނޫން ކަމަށާއި މިހާރު ދިމާވެފައިވާ އޮތް އިދާރީ ކަންކަން ހައްލުކޮށް ވަރަށް އަވަހަށް އިންތިހާބު ބާއްވާނެ ކަމަށެވެ. ނަމަވެސް އިންތިހާބު ބޭއްވޭނެ ތާރީހެއް އޭނާ ވިދާޅެއް ނުވެ އެވެ.
އެލްޖީއޭގެ އިންތިހާބު ބޭއްވުމަށް ފުރަތަމަ ތާވަލުކުރީ މިދިޔަ އޮގަސްޓް 8، ގަ އެވެ. އެލްޖީއޭއިން ހުޅުވާލީ އެ އޮތޯރިޓީގެ ބޯޑަށް ސިޓީ ކައުންސިލަރުންގެ ތެރެއިން މެންބަރަކާއި، ރަށު ކައުންސިލަރުންގެ ތެރެއިން މެންބަރަކާއި، ޑަބްލިއުޑީސީގެ ރައީސުންގެ ތެރެއިން މެންބަރަކު އިންތިހާބު ކުރުމަށެވެ.
އެލްޖީއޭގެ ބޯޑަށް މެންބަރަކު އިންތިހާބުކުރަން ބާއްވާ އިންތިހާބުގައި އެމްޑީޕީން ވާދަކުރަނީ ނ. މަނަދޫ ކައުންސިލްގެ ރައީސް އަލީ ޒާފިރު އަދި ލ. ގަމު ޑަބްލިއުޑީސީގެ ރައީސް މަރްޔަމް ނީނާ އެވެ. ޕީއެންސީން ވާދަކުރަނީ ފ. ނިލަންދޫ ކައުންސިލްގެ ރައީސް އަލީ އަހްމަދު އާއި ށ. ފުނަދޫ ޑަބްލިއުޑީސީގެ ރައީސް މަރްޔަމް ޒީނާ އެވެ.
މީގެއިތުރުން އެލްޖީއޭގެ އިންތިހާބުގައި ސިޓީ ކައުންސިލުގެ ތެރެއިން ވާދަކުރައްވަނީ ކުޅުދުއްފުށި ސިޓީގެ މޭޔަރު މުހައްމަދު އާތިފް އެވެ. އޭނާއާ ދެކޮޅަށް އެއްވެސް ބޭފުޅަކު ކުރިމަތިނުލައްވަ އެވެ.
މި އިންތިހާބު ވީހާވެސް އަވަހަށް ބާއްވަން އިދިކޮޅު އެމްޑީޕީން ގޮވާލާފައިވެ އެވެ. އޭގެއިތުރުން އެ ޕާޓީގެ ޗެއާޕާސަން ކުރީގެ ރައީސް މުހައްމަދު ނަޝީދުވެސް ކުރިން ވަނީ އިންތިހާބު އޮތް ތާރީހުގައި ބޭއްވުމަށް ގޮވާލައްވާފަ އެވެ.
އެލްޖީއޭގެ ބޯޑަށް ރައްޔިތުންގެ މަޖިލީހުން އައްޔަންކުރާ ޖެންޑާ އީކުއަލިޓީގެ ދާއިރާއިން ތަޖުރިބާ ލިބިފައިވާ އަންހެން މެންބަރަކަށް، އާއިޝަތު އާރިފާ އަދި ގަވާނެންސް ނުވަތަ ޕަބްލިކް އެޑްމިނިސްޓްރޭޝަންގެ ދާއިރާއިން ތަޖުރިބާ ލިބިފައިވާ މެންބަރަކަށް މުހައްމަދު އާރިފް އައްޔަންކުރަން މިދިޔަ މަހު ވަނީ ފާސްކޮށްފަ އެވެ.
މީގެއިތުރުން އެލްޖީއޭގެ ބޯޑުގައި ދެން ހިމެނެނީ އެ ބޯޑުގެ ރައީސް، ފިނޭންްސް މިނިސްޓަރު ހަސަން ޒަރީރު، ނައިބުރައީސް ފާތިމަތު ނިއުމާ، ސީއީއޯ މުހައްމަދު ނިމާލު، ބޯޑު މެންބަރު ފާތިމަތު ޒީނާ އަލީ، ބޯޑު މެންބަރު މުހައްމަދު އާޒާދު އަދި ބޯޑު މެންބަރު އަޒްހާ ޟަމީރު އެވެ.
