ގަވާއިދުން ސިޑިން އެރުމަކީ ހިތުގެ ބަލިތަކުގައި މަރުވުމުގެ ފުރުސަތު ވަރަށް ބޮޑަށް ކުޑަކޮށްދޭ ކަމެއް ކަމަށް އާ ދިރާސާއަކުން ދައްކައިފި އެވެ.
ޔުނިވާސިޓީ އޮފް އީސްޓް އެންގްލިއާ އާއި ނޯފޯކް އެންޑް ނޮރިޗް ޔުނިވާސިޓީ ހޮސްޕިޓަލްގެ ދިރާސާވެރިން ކުރިއަށް ގެންދިޔަ މި ދިރާސާ ޝާއިއުކޮށްފައިވަނީ "އެމެރިކަން ޖާނަލް އޮފް ކާޑިއޯވަސްކިއުލާ ޑްރަގްސް" ގަ އެވެ.
ދުނިޔޭގައި ހިތުގެ ބަލިތައް ޖެހޭ މިންވަރު އިތުރުވަމުންދާ ދަނޑިވަޅެއްގައި، މި ދިރާސާއިން ފާހަގަވި ކަންތައްތަކަކީ ވަރަށް ބޮޑު ސަމާލުކަމެއް ދޭންޖެހޭ ކަންތައްތަކެކެވެ.
މި ދިރާސާގައި ބައިވެރިވި ޕްރޮފެސަރު ވާސިލިއޯސް ވާސިލިއޫ ނެރުއްވި ބަޔާނެއްގައި ވިދާޅުވީ، ހިތުގެ ބަލިތަކަކީ މުޅި ދުނިޔޭގައި ވެސް މީހުން މަރުވާ އެންމެ ބޮޑު ސަބަބު ކަމަށެވެ. އަދި 1990 އާއި 2019 އާ ދެމެދު މިފަދަ ބަލިތައް ޖެހޭ މިންވަރު ގާތްގަނޑަކަށް ދެގުނަ އިތުރުވެފައިވާ ކަމަށް އޭނާ ފާހަގަކުރެއްވި އެވެ.
ދިރާސާވެރިން ބުނާ ގޮތުގައި ހިތުގެ މައްސަލަތަކާއި ސްޓްރޯކް ހިމެނޭހެން، ހިތުގެ ބަލިތައް ޖެހިފައިވާ 523 މިލިއަން މީހުން މުޅި ދުނިޔޭގައި އެބަ ތިއްބެވެ.
ޖިސްމާނީ ހަރަކާތްތެރިކަން ކުޑަވުމަކީ ހިތުގެ ބަލިތަކަށް މަގުފަހިވާ ކަމެއްކަން އެނގޭތީ އާއި، މީގެ ކުރީގެ ދިރާސާތަކުން ވެސް ކަސްރަތަކީ ބަލިތަކުން ރައްކާތެރިކޮށްދޭ ކަމެއްކަން ހާމަވެފައިވާތީ، ދިރާސާވެރިން ބޭނުންވީ ބޮޑެތި މީހުންނަށް ކަސްރަތު ކުރުމަށް ދީފައިވާ އިރުޝާދުތަކާ އެއްގޮތަށް އަމަލުކުރުމަށް އެހީތެރިވެދޭނެ ފަސޭހަ ގޮތެއް ހޯދުމަށެވެ.
ޕްރޮފެސަރު ވާސިލިއޫ ވިދާޅުވީ ސިޑިން އެރުމަކީ ދުވަހުން ދުވަހަށް ކުރާ ކަންކަމުގެ ތެރެއަށް ޖިސްމާނީ ހަރަކާތްތައް އިތުރުކުރުމަށް އޮތް، އާންމުކޮށް މީހުން މާ ބޮޑު ސަމާލުކަމެއް ނުދޭ ނަމަވެސް ވަރަށް ފަސޭހަ ކަމެއް ކަމަށެވެ. އަދި މީގެ ސަބަބުން ފުރާނަ ސަލާމަތްކުރުމަށް އެހީތެރިވެދޭ މިންވަރު ދެނެގަތުމަށް ދިރާސާވެރިން ބޭނުންވި ކަމަށް އޭނާ ވިދާޅުވި އެވެ.
ސިޑިން އެރުމަކީ ހަށިގަނޑަށް ބުރަ، ވަރުގަދަ ޖިސްމާނީ ހަރަކާތެކެވެ. މީގެ ކުރީގެ ދިރާސާތަކުން ދައްކާ ގޮތުގައި، ހަފުތާގެ ތާވަލުގައި ސިޑިން އެރުން ހިމެނުމަކީ ސިއްހީ އެތައް ފައިދާތަކެއްގެ އިތުރުން، ހިތާއި ފުއްޕާމޭގެ ދުޅަހެޔޮކަން އިތުރުކޮށްދޭ ކަމެކެވެ.
މައުލޫމާތު: މެޑިކަލް ނިއުސް ޓުޑޭ
