ފެން ބިލުތަކަށް އަރާފައި ހުރި ޖޫރިމަނާތައް މައާފް ކުރަން ސަރުކާރުން މިއަދު ނިންމައިފި އެވެ.
އެމްޑަބްލިއުއެސްސީ އިން މިއަދު ނެރުނު ނޫސް ބަޔާނެއްގައި ބުނީ ފެން ބިލު ނުދެއްކުމުގެ ސަބަބުން އަރާފައިވާ ޖޫރިމަނާ މައާފްކޮށްދޭން ނިންމީ ބިލުތަކަށް ފައިސާ ދައްކަން ލުއިފަސޭހެ ގޮތެއް ހޯދައިދިނުމަށް ކަމަށެވެ.
"ފެން ބިލްތައްކަށް ފައިސާ ދެއްކުމަށް ލުއިފަސޭހަ މަގެއް ފަހިކޮށްދިނުމަށް ކުރަމުންދާ މަސައްކަތްތަކުގެ ތެރެއިން، ގޭބިސީތަކާއި ވިޔަފާރިތަކުގެ ފެން ބިލް ނުދެއްކި ގިނަދުވަސް ވެގެން އަރާފައިވާ ޖޫރިމަނާ ފައިސާ މައާފުކޮށްދެއްވުމަށް އަނެއްކާވެސް ވަނީ ނިންމަވާފަ،" އެ ބަޔާނުގައި ބުނެފައިވެ އެވެ.
މައާފްކޮށްދޭން ނިންމީ ޑިސެމްބަރު 31، 2025، ގެ ނިޔަލަށް އަރާފައިވާ ޖޫރިމަނާތަކެވެ. އަދި އެ ޖޫރިމަނާ ފައިސާ މައާފްކޮށްދެވޭނީ މި ހިނގަމުންދާ އަހަރުގެ ޑިސެމްބަރު 31، ގެ ނިޔަލަށް ހުރިހާ ބިލަކަށް ފައިސާ ދެއްކުމުން ކަމަށް ފެން ކުންފުނިން ބުނެ އެވެ.
އޭގެ އިތުރުން، މަހުން މަހަށް ބަހާލައިގެން ބިލުތަކަށް ފައިސާ ދައްކަން ބޭނުން ނަމަ އެ އިންތިޒާމް ހަމަޖެއްސޭނެ ކަމަށް ވެސް އެމްޑަބްލިއުއެސްސީ އިން ބުނެ އެވެ.
"މަހުން މަހަށް ބަހާލައިގެން ފައިސާ ދައްކަވާ ކަސްޓަމަރުންނަށް ޖޫރިމަނާ މައާފްކޮށްދެވޭނީ އެއްބަސްވުމާއި އެއްގޮތަށް ފައިސާ ދައްކަވައި ޚަލާސްކުރެއްވުމުން،" އެ ބަޔާނުގައި ބުނެފައިވެ އެވެ.
މީގެ ކުރިން 2023 އަދި 2019 ވަނަ އަހަރު ވެސް އެމްޑަބްލިއުއެސްސީ އިން ވަނީ ފެން ބިލުތަކަށް އަރާފައިވާ ޖޫރިމަނާ މައާފްކޮށްދީފަ އެވެެ. ޖޫރިމަނާ މައާފް ކުރުމުން ފެން ބިލު ދައްކާ މީހުންގެ އަދަދު ގިނަވެ، ކުންފުނީގެ ރެވެނިއު އިތުރުވާނެ އެވެ.
އެމްޑަބްލިއުއެސްސީއަކީ ސަރުކާރު ހިއްސާވާ ކުންފުނިތަކުގެ ތެރެއިން ފައިދާ ނެރޭ މަދު ކުންފުނިތަކުގެ ލިސްޓުގައި ހިމެނޭ ކުންފުންޏެކެވެ. އެ ކުންފުނީގައި ސަރުކާރުގެ ހިއްސާއަކީ 80 ޕަސެންޓެވެ. އަނެއް 20 ޕަސެންޓު ހިއްސާ އޮންނަނީ ހިޓާޗީ ކުންފުނީގަ އެވެ.
އެމްޑަބްލިއުއެސްސީގެ 2024 ވަނަ އަހަރުގެ އަހަރީ ރިޕޯޓަށް ބަލާއިރު، އެ އަހަރު ފައިދާގެ ގޮތުގައި 217.5 މިލިއަން ރުފިޔާ ލިބުނެވެ. އެއީ އެ ކުންފުންޏަށް މިހާތަނަށް އެންމެ ފައިދާ ބޮޑު އަހަރެވެ. އޭގެ މައިގަނޑު ސަބަބަކީ ޔުޓިލިޓީ ސާވިސް އާއި މެނުފެކްޗަރިން އިތުރުވުމެވެ.
