ނިމިދިޔަ އެމްޑީޕީ ސަރުކާރުން ހިންގި ގެދޮރުވެރިޔާ ސްކީމްގެ ދަށުން އެޅި އަމާން އުދަރެސް އަދި އަމާން ދޯދީގެ ފްލެޓްތަކުން ފެން ލީކުވެ، ފެން ބިލު އާދަޔާ ހިލާފަށް ބޮޑުވާ މައްސަލަ ފެންމަތިވެއްޖެ އެވެ.
އަދަދު އަށް އެނގިފައިވާ ގޮތުގައި 200 އެއްހާ ގިނަ ފްލެޓްތަކުން ފެން ލީކުވާ މައްސަލަ ފާހަގަވީ ބައެއް ފްލެޓްތަކުގެ ބިލުތަކަށް 20،000ރ. އަށްވުރެ ގިނައިން އަރަން ފެށުމުންނެވެ. އޭގެ ތެރެއިން ބައެއް ފްލެޓްތަކުގެ ބިލުތައް އާދަޔާ ހިލާފަށް ބޮޑުވީ ފްލެޓްތަކަށް މީހުން ބަދަލުވެސް ނުވަނީސް ކަމަށް މައުލޫމާތު ލިބެ އެވެ.
މިކަމާ ގުޅިގެން ފަހި ދިރިއުޅުން ކޯޕަރޭޝަނުގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވީ އަމާން އުދަރެސް އަދި އަމާން ދޯދިގެ 57 ފްލެޓުން ފެން ލީކުވާ މައްސަލަ ފާހަގަކުރެވިގެން އެކަން އެމްޑަބްލިއުއެސްސީއާ ވާހަކަ ދައްކައިގެން ކޮންޓްރެކްޓަރު މެދުވެރިކޮށް ހައްލުކުރަމުންދާ ކަމަށެވެ.
"މިހާތަނަށް 57 ފްލެޓަކުން ފެން ލީކުވާ މައްސަލަ ވަނީ ފާހަގަކުރެވިފައި. އެމްޑަބްލިއުއެސްސީއާ ވާހަކަދައްކައިގެން ކޮންޓްރެކްޓަރު މެދުވެރިކޮށް މައްސަލަ ހައްލުކުރަން މިދަނީ މަސައްކަތްކުރަމުން. ޑިފެކްޓް ލައިބިލިޓީ ޕީރިއަޑްގައި އެއްވެސް ލީކޭޖްގެ މައްސަލައެއް ފާހަގަކުރެވިފައިވާނަމަ ކޮންޓްރެކްޓަރު އެކަން ހައްލުކުރާނެ،" އޭނާ ވިދާޅުވި އެވެ.
ފެން ލީކުވެގެން ބިލު ބޮޑުވާ އެއްވެސް ފްލެޓަކުން އެ ފްލެޓެއްގެ ވެރިން ފައިސާ ދައްކަން ނުޖެހޭނެ ކަމަށާއި އެކަމާ ގުޅިގެން ހުރިހާ ހަރަދެއް ކުރާނީ ކޮންޓްރެކްޓަރު ކަމަށް ހަމްދާން ވިދާޅުވި އެވެ. ނަމަވެސް މިހާތަނަށް ބިލުތަކަށް އެގޮތަށް ދެއްކި ފައިސާގެ އަދަދު ނޭނގޭ ކަމަށް އޭނާ ވިދާޅުވި އެވެ.
"ޓެސްޓުކުރުމުގެ މަރުހަލާގައި ބިލްތައް ބޮޑުވާނެ. އެއީ ކުއްޔަށް ހިފާ ފަރާތުން ދައްކަން ޖެހޭނެ ބިލްތަކެއް ނޫން. ބިލްތައް ކުއްޔަށް ހިފާ އެކައުންޓުން ނަގައި ވަކި މީޓަރަކަށް އެމްޑަބްލިއުއެސްސީއާ ވާހަކަ ދައްކައިގެން މިދަނީ ބަދަލުކުރަމުން،" ހަމްދާން ވިދާޅުވި އެެވެ.
މިކަމާ ގުޅިގެން އެމްޑަބްލިއުއެސްސީގެ ބަހެއް ހޯދުމަށް އަދަދު އިން ތަކުރާރުކޮށް އެ ކުންފުންޏަށް ގުޅައި މެސެޖުކުރުމުންވެސް އެއްވެސް ޖަވާބެއް މިހާތަނަށް ދީފައެއް ނުވެ އެވެ.
ނިމިދިޔަ އެމްޑީޕީ ސަރުކާރުން އެޅި 4،000 ފްލެޓުތައް މި ސަރުކާރުން ހަވާލުކޮށް، އެ ފްލެޓްތަކަށް މީހުން ބަދަލުވާން ވަނީ ފަށާފަ އެވެ. މި ސަރުކާރުން އެ ފްލެޓްތައް ހަވާލުކުރުމުގެ ތެރޭގައި ލިސްޓުގައި ހިމެނުނު 450 މީހުން އަތުން ފްލެޓްތައް އަތުލި އެވެ.
ގެދޮރުވެރިޔާ ސްކީމުގެ ދަށުން ފްލެޓު ލިބޭ މީހުންނަށް އެ ތަންތަން މި ސަރުކާރުން ހަވާލު ކުރީ 25 އަހަރުދުވަސް ވަންދެން އެފްޑީސީއަށް ކުލި ދެއްކުމުން މިލްކުވާ ގޮތަށެވެ. އޭގެ ތެރޭގައި ހިމެނެނީ ދެ ކޮޓަރީގެ ފްލެޓާއި ތިން ކޮޓަރީގެ ފްލެޓެވެ.
ދެ ކޮޓަރީގެ ފްލެޓަށް ކުލީގެ ގޮތުގައި ދައްކަން ޖެހެނީ 7000ރ. އެވެ. މެއިންޓެނެންސް ފީގެ ގޮތުގައި ދައްކަން ޖެހެނީ މަހަކު 1000ރ. އެވެ. ތިން ކޮޓަރީގެ ފްލެޓަށް ކުލީގެ ގޮތުގައި ދައްކަން ޖެހެނީ 9000ރ. އެވެ. މެއިންޓެނެންސް ފީގެ ގޮތުގައި ދައްކަން ޖެހެނީ 1500ރ. އެވެ.
