ވިކްޓަރީ ސްޕޯޓްސް ކްލަބުން ކުރިއަށް އޮތް ދިވެހި ޕްރިމިއާ ލީގަށް ތައްޔާރުވުމަށްޓަކައި، މިހާރު ސްރީ ލަންކާގައި ކުރިއަށްގެންދާ ޓްރެއިނިން ކޭމްޕްގެ ތެރެއިން ހަތަރު މެޗު ކުޅޭ ގޮތަށް ހަމަޖެހިފައިވާ ކަމަށް އެ ކްލަބުން ބުނެފި އެވެ.
މި މަހު އެއް ވަނަ ދުވަހުން ފެށިގެން ހަތް ވަނަ ދުވަހުގެ ނިޔަލަށް ވިކްޓަރީން ލަންކާގައި ޓްރެއިނިން ކޭމްޕް ކުރިއަށްގެންދާއިރު، އިއްޔެ އާއި އަންނަ ހޮނިހިރު ދުވަހު ޓްރެއިނިން ކުރިއަށްގެންދާއިރު، ބާކީ ހަތަރު ދުވަހު އޮންނާނީ މެޗެވެ.
އެ ގޮތުން، ވިކްޓަރީން ކުޅޭ ފުުރަތަމަ ޓްރެއިނިން މެޗު ކުރިއަށްދިޔައީ މިއަދު ހަވީރު އެވެ. އެ ގޮތުން، ލަންކާގެ ސުގަތަދާސާ ސްޓޭޑިއަމްގައި، މިއަދު ހަވީރު ކުޅުނު މެޗުގައި ވިކްޓަރީން ބައްދަލުކުރީ ޖާވާ ލޭން ސްޕޯޓްސް ކްލަބާ އެވެ. އެ މެޗު ނިމުނީ 3-3 އިން އެއްވަރުވެގެންނެވެ.
ވިކްޓަރީން ކުޅޭ ދެ ވަނަ މެޗުގައި، މާދަމާ ހަވީރު، ނޭވީ ގްރައުންޑް ވެލިސަރާގައި ކުޅޭ މެޗުގައި ބައްދަލުކުރާނީ ސީ ހޯކްސް ސްޕޯޓްސް ކްލަބާ އެވެ.
ޓްރެެއިނިން ތިން ވަނަ މެޗުގައި އަންނަ އާދިއްތަ ދުވަހު، ބެއްދަގަނާ ޓްރެއިނިން ސެންޓަރުގައި ކުޅޭ މެޗުގައި ބައްދަލުކުރާނީ ސައުންޑާސް ސްޕޯޓްސް ކްލަބާ އެވެ. އަދި، ޓްރެއިނިން ފަހު މެޗުގައި އަންނަ ހޯމަ ދުވަހު ހަވީރު ބްލޫ އީގަލްސް ސްޕޯޓްސް ކްލަބާ ކުޅޭ މެޗު އޮތީ އެއާފޯސް ގްރައުންޑްގަ އެވެ.
ވިކްޓަރީގެ ކޯޗު، މުހައްމަދު ޝިޔާޒް (މޯހަން)، "އަދަދު ސްޕޯޓްސް" އަށް ބުނީ، ޓްރެއިނިން މެޗު ކުޅޭ ހަތަރު ޓީމުގެ ތެރެއިން ދެ ޓީމަކީ މިހާރު ވެސް ލަންކާގެ ފުޓްބޯޅަ ސީޒަނުގައި ވާދަކުރަމުން އަންނަ ޓީމުތައް ކަމަށެވެ. އަދި، ދެން އޮތް ދެ ޓީމަކީ ލަންކާގެ ދެ ވަނަ ޑިވިޝަންގެ ޗެމްޕިއަނާއި އެ ޑިވިޝަނުގައި ވާދަކުރާ އެހެން ޓީމެއްކަން މޯހަންގެ ވާހަކައިގައި ފާހަގަކުރި އެވެ.
ވިކްޓަރީން މި ސީޒަނުގައި ފުރަތަމަ ވާދަކުރަން ހަމަޖެހިފައިވަނީ، މި މަހުގެ 10 ވަނަ ދުވަހު ފަށާ ދިވެހި ޕްރިމިއާ ލީގުގަ އެވެ. ޖުމްލަ އެކު 10 ޓީމު ކުޅޭ މި ފަހަރުގެ ދިވެހި ޕްރިމިއާ ލީގު، ހޯމް އެންޑް އަވޭ ފޯމެޓަށް ކުޅެން ނިންމާފަައިވާއިރު، ރީޖަނަލް ލީގުތަކުން، ޕްރިމިއާ ލީގަށް އައި، ގދ. ގައްދޫ އާއި ހއ. ދިއްދޫގެ ހޯމް މެޗުތައް ކުޅެނީ އެ ދެ ރަށުގަ އެވެ. ވިކްޓަރީން ދިވެހި ޕްރިމިއާ ލީގުގައި ކުޅޭ ފުރަތަމަ މެޗު އޮތީ، މި މަހުގެ 11 ވަނަ ދުވަހު، ގަލޮޅު ދަނޑުގަައި ޓީސީ ސްޕޯޓްސް ކްލަބާ ދެކޮޅަށެވެ.
މި ސީޒަނަށް ވިކްޓަރީ ވަރުގަދަ ކުރުމަށްޓަކައި ގެނެސްފައިވާ ކުޅުންތެރިންނަށް ބަލާއިރު، މާޒިޔާ ސްޕޯޓްސް އެންޑް ރެކްރިއޭޝަނުން ގެނައި ހަމްޒާ މުހައްމަދު (ހަމްޕު)، ނާއިޒު ހަސަން (ދާދު)، ހުސެއިން ސިފާއު ޔޫސުފް (ކުރޯ)، ހަސަން ނަޒީމް (ޗޯޓު)ގެ އިތުރުން، ކްލަބް އީގަލްސް އިން ގެނައި، އަހުމަދު ރިޒުވާން (ރިޒޭ) އާއި ހިސާމް ސަލީމް (ކޮކީ)، އޮޑި ސްޕޯޓްސް ކްލަބުން ގެނައި ހުސެއިން ނިހާން (ނިހާޓް)، މުހައްމަދު ޝަފީއު (ޗެކް)، ޓީސީ ސްޕޯޓްސް ކްލަބުން ގެނައި އަހުމަދު މާއިޝް ރަޝީދު (މާއި) އަދި ހުސެއިން ޝަރީފް (ހުސީ) ހިމެނެ އެވެ.
ވިކްޓަރީ ޓީމަށް ގެނައި ބިދޭސީ ކުޅުންތެރިންނަށް ބަލާއިރު، އުޒްބެކިސްތާންގެ ޑިފެންޑަރު ފުރްކަތޯން ހަސަންބޮއޭވް، ބްރެޒިލްގެ ޑިފެންޑަރު އާތޫރް އަރަައުހޯ އަދި އުޒްބެކިސްތާންގެ މިޑްފީލްޑަރު މިރްޖަލޯލް ކަސީމޯވް އެވެ.
މީގެ ކުރިން ރާއްޖޭގެ ބައެއް ކްލަބްތަކުން އެފްއޭއެމްގެ ހަރަދުގައި، އޭއެފްސީ މުބާރާތްތައް ކުޅުމުގެ ކުރިން، ޓްރެއިނިން ކޭމްޕްތަކެއް ފުރިހަމަކޮށްފައިވެ އެވެ.
