ވިކްޓަރީ ސްޕޯޓްސް ކްލަބުން ކުރިއަށް އޮތް ފުޓްބޯޅަ ސީޒަނަށް ތައްޔާރުވުމުގެ ގޮތުން، ޕްރީ ސީޒަން ކޭމްޕަކަށް ސްރީ ލަންކާ އަށް ދިއުމަށް ހަމަޖެހިއްޖެ އެެވެ.
މި މަހު ކުރީކޮޅުގައި، އާ ސީޒަނަށް ޕްރެކްޓިސް ފެށި ވިކްޓަރީން މި ފަހަރު ވަނީ ޓީމު ވަރަށް ބޮޑުތަނުން ވަރުގަދަކޮށްފަ އެވެ. ޕްރޯ ލައިސަންސް ކޯޗު، މުހައްމަދު ޝިޔާޒް (މޯހަން)ގެ ކޯޗުކަމުގައި މި ސީޒަނުގައި ވާދަކުރާ ވިކްޓަރީން އަންނަ މަހު އެއް ވަނަ ދުވަހު، ސްރީ ލަންކާ އަށް، ހަފްތާއެއްހާ ދުވަހަށް ޓްރެއިނިން ކޭމްޕެއް ދިއުމަށް ވަނީ ނިންމައިފަ އެވެ.
"އަަދަދު ސްޕޯޓްސް" އަށް މޯހަން ބުނީ، ސްރީ ލަންކާގެ ކޭމްޕަކީ، ސީޒަނަށް ތައްޔާރުވުމަށްޓަކައި، ޓްރެއިނިންތައް ކުރިއަށްގެންދިއުމާއި މެޗުތަކެއް ކުޅުމަށްޓަކައި ހަމަޖެއްސި ކޭމްޕެއް ކަމަށެވެ.
ކުރިއަށް އޮތް ސީޒަނަށް ވިކްޓަރީ ވަރުގަދަ ކުރުމަށްޓަކައި ގެނެސްފައިވާ ކުޅުންތެރިންނަށް ބަލާއިރު، މާޒިޔާ ސްޕޯޓްސް އެންޑް ރެކްރިއޭޝަނުން ގެނައި ހަމްޒާ މުހައްމަދު (ހަމްޕު)، ނާއިޒު ހަސަން (ދާދު)، ހުސެއިން ސިފާއު ޔޫސުފް (ކުރޯ)، ހަސަން ނަޒީމް (ޗޯޓު)ގެ އިތުރުން، ކްލަބް އީގަލްސް އިން ގެނައި، އަހުމަދު ރިޒުވާން (ރިޒޭ) އާއި ހިސާމް ސަލީމް (ކޮކީ)، އޮޑި ސްޕޯޓްސް ކްލަބުން ގެނައި ހުސެއިން ނިހާން (ނިހާޓް)، މުހައްމަދު ޝަފީއު (ޗެކް)، ޓީސީ ސްޕޯޓްސް ކްލަބުން ގެނައި އަހުމަދު މާއިޝް ރަޝީދު (މާއި) އަދި ހުސެއިން ޝަރީފް (ހުސީ) ހިމެނެ އެވެ.
ވިކްޓަރީ ޓީމަށް ގެނައި ބިދޭސީ ކުޅުންތެރިންނަށް ބަލާއިރު، އުޒްބެކިސްތާންގެ ޑިފެންޑަރު ފުރްކަތޯން ހަސަންބޮއޭވް، ބްރެޒިލްގެ ޑިފެންޑަރު އާތޫރް އަރަައުހޯ އަދި އުޒްބެކިސްތާންގެ މިޑްފީލްޑަރު މިރްޖަލޯލް ކަސީމޯވް އެވެ.
މީގެ ކުރިން ރާއްޖޭގެ ބައެއް ކްލަބްތަކުން އެފްއޭއެމްގެ ހަރަދުގައި، އޭއެފްސީ މުބާރާތްތައް ކުޅުމުގެ ކުރިން، ޓްރެއިނިން ކޭމްޕްތަކެއް ފުރިހަމަކޮށްފައިވެ އެވެ.
ވިކްޓަރީން މި ސީޒަނުގައި ފުރަތަމަ ވާދަކުރަން ހަމަޖެހިފައިވަނީ، އަންނަ މަހުގެ 10 ވަނަ ދުވަހު ފަށާ ދިވެހި ޕްރިމިއާ ލީގުގަ އެވެ.
ޖުމްލަ އެކު 10 ޓީމު ކުޅޭ މި ފަހަރުގެ ދިވެހި ޕްރިމިއާ ލީގު، ހޯމް އެންޑް އަވޭ ފޯމެޓަށް ކުޅެން ނިންމާފަައިވާއިރު، ރީޖަނަލް ލީގުތަކުން، ޕްރިމިއާ ލީގަށް އައި، ގދ. ގައްދޫ އާއި ހއ. ދިއްދޫގެ ހޯމް މެޗުތައް ކުޅެނީ އެ ދެ ރަށުގަ އެވެ. ވިކްޓަރީން ދިވެހި ޕްރިމިއާ ލީގުގައި ކުޅޭ ފުރަތަމަ މެޗު އޮތީ، އަންނަ މަހުގެ 11 ވަނަ ދުވަހު، ގަލޮޅު ދަނޑުގަައި ޓީސީ ސްޕޯޓްސް ކްލަބާ ދެކޮޅަށެވެ.
މި ފަަހަރު ޕްރިމިއާ ލީގުގައި ކުޅޭ ޓީމުތަކަކީ، ނިއު ރޭޑިއަންޓް ސްޕޯޓްސް ކްލަބް، ބުރު ސްޕޯޓްސް ކްލަބް، ބިސް ބުރު ސްޕޯޓްސް ކްލަބް، މާޒިޔާ، ވިކްޓަރީ، އޮޑި، ޓީސީ، އީގަލްސް، ދިއްދޫ އަދި ގައްދޫ އެވެ.
