އެކްޓަރު ޖަސްޓިން ބަލްޑޯނީ ހުށަހެޅި އަބުރުގެ ދައުވާއާ ގުޅިގެން ހިނގި ގާނޫނީ ހަރަދުތަކުގެ ބަދަލުގެ ގޮތުގައި 8 މިލިއަން ޑޮލަރު ހޯދުމަށް އެކްޓްރެސް ބްލޭކް ލައިވްލީ އެދުނު ނަމަވެސް، އޭގެ ތެރެއިން އެންމެ 400,000 ޑޮލަރު ދިނުމަށް ކޯޓުން ނިންމައިފި އެވެ.
ލައިވްލީ އެންމެ ފުރަތަމަ ބަލްޑޯނީއާ ދެކޮޅަށް ދައުވާކުރީ ޖިންސީ ފުރައްސާރަ ކުރުމާއި ބަދަލުހިފުމުގެ އަމަލުތަކެއް ހިންގި ކަމަށް ބުނެ އެވެ. ބަލްޑޯނީ އަކީ 2024 ވަނަ އަހަރު ނެރުނު "އިޓް އެންޑްސް ވިތް އަސް" ފިލްމުގައި ލައިވްލީއާއެކު މަސައްކަތްކުރި އެކްޓަރެއްގެ އިތުރުން އެ ފިލްމުގެ ޑައިރެކްޓަރުވެސް މެއެވެ. ލައިވްލީގެ އެ ދައުވާއާ ގުޅިގެން ބަލްޑޯނީ ވަނީ އޭނާގެ އަބުރު ކަތިލި ކަމަށް ބުނެ ރައްދުގައި ދައުވާކޮށްފަ އެވެ.
ބަލްޑޯނީ ހުށަހެޅި އަބުރުގެ ދައުވާ 2025 ވަނަ އަހަރު ފަނޑިޔާރު ބޭރުކޮށްލުމާ ގުޅިގެން، ލައިވްލީ ވަނީ ވަކީލުންގެ ފީގެ ގޮތުގައި ހިނގި 7.5 މިލިއަން ޑޮލަރާއި އެހެނިހެން ހަރަދުތަކަށް ހިނގި 540,000 ޑޮލަރު ހޯދުމަށް އެދިފަ އެވެ.
ނަމަވެސް، ފަނޑިޔާރު ނިންމެވީ ލައިވްލީއަށް ދޭންޖެހޭނީ އޭނާ އެދުނު މިންވަރަށްވުރެ މާ ކުޑަ އަދަދެއް ކަމަށެވެ. އެގޮތުން ޖުމްލަ 407,451 ޑޮލަރު ދިނުމަށް ނިންމެވީ، އަބުރުގެ ދައުވާއިން ދިފާއުވުމަށް ބޭނުންވާ މިންވަރަށްވުރެ އިތުރު މީހުންނާއި ވަގުތަށް ލައިވްލީ ފައިސާ ހޯދަން އެދިފައިވާތީ ކަމަށް ފަނޑިޔާރު ވިދާޅުވި އެވެ.
މީގެ އިތުރުން، މުޅި ގާނޫނީ މައްސަލައާ ގުޅިފައިވާ އެހެނިހެން ހަރަދުތައް ހޯދަން ލައިވްލީ އެދިގެން ނުވާނެ ކަމަށާއި، ވަކީލުން ހޭދަކުރި ވަގުތު ހިސާބުކުރުމުގައި އޭނާ އަމަލުކޮށްފައިވަނީ އެންމެ ރަނގަޅު އުސޫލުން ނޫން ކަމަށް ވެސް ފަނޑިޔާރު ފާހަގަކުރެއްވި އެވެ.
ބަލްޑޯނީ ވަނީ ލައިވްލީއަށް ޖިންސީ ފުރައްސާރަ ކުރި ކަމަށް ބުނާ ވާހަކަތަކާއި، އޭނާގެ އަބުރު ގެއްލުވާލުމަށް ރޭވުންތެރި ކެމްޕޭނެއް ހިންގި ކަމަށް ކުރެވޭ ތުހުމަތުތަކަށް އިންކާރުކޮށްފަ އެވެ.
މި އަހަރުގެ ކުރީކޮޅު ފަނޑިޔާރު ވަނީ ލައިވްލީ ހުށަހެޅި ދައުވާގެ ބައެއް ބައިތައް ބޭރުކޮށްލާފަ އެވެ. އޭގެ ތެރޭގައި ޖިންސީ ފުރައްސާރަ ކުރުމުގެ ބައިވެސް ހިމެނެ އެވެ. އޭގެ އެއް މަސް ފަހުން ދެ ފަރާތުން ވަނީ ކޯޓުން ބޭރުގައި މައްސަލަ ހައްލުކުރުމަށް އެއްބަސްވެފަ އެވެ.
